13
Mwomwen kaperenihda Koahs
1 Kolkol amwai kin ipwilki emen emen doahroar joauloang.
2 Saman kajamwo mihn keiru kan nehn umwamwai kan. Mine irai pwi ma wia me apel ne kajamwohdo sohnloang nehn irai jehjoa.
3 Saman iraihok ma mine nehn kalpwuhj, ma doahrma kamwai pwen mine iparai nehn kalpwuhj. Saman iraihok ma mine nehn loklok, ma doahrma kamwai pwen loklok doahroar irai.
4 Pwoapwoaud wia inoau oau ma ohroj en woaunki; woal apel li inoau in pwoapwoaud anahne loalpwoas oang emen emen. Koahs pirin kadeik iraihok ma kin kamwahl apel iraihok ma kin mour in nenek.
5 Kamwai kalkehjang kamwai ipwilin mwani apel kamwai en isarki da kamwai anki. Pwa Koahs ne pwahla pwa, “Ngoah jehpirin injang koawoa; Ngoah jehpirin kerpwihla koawoa.”
6 Doari, kisai en eimah apel pwahla,
“Koaunno ioar oai sohn jauwaj,
ngoah jehpirin majpwehk.
Dahkij armaj kak wiahng ngoahi?”
7 Saman amwai koaun in mehjjok, ma sikoahng kamwai en Koahs padahkko. Lemehla anjoauwo mwomwen irai kin mour apel mehdi, apel japjang arai pwojon.
8 Jesus Christ pwen doahdoahrwahr aio, rehn oauwe, pel pirin allaluhla.
9 Johpwa mweidoahng joangoan padahk sohrohr kan ohroj en kahlwa kamwai jang al pwunngo. Mwehu ngenimwai kan en kin sihkeiki kalahngan en Koahs, a jaudi kojonned in mwinge kan; pwa ihr ma kin peik oang kojonned pwiai, johkin oaloa jauwaj jang in kojonned kan.
10 Jamwrouwok ma papah nehn en mihn Jew kan umpwal likkoauwo kin joh arai pwung in kang mihn meiroanngok pohn asai pei joaroawi.
11 Nihn mihn Jew jamwrou laplappo kin wahdo insahn mahn in meiroanngok nehn Wija Keiou Joaroawi en meiroangkihla, wia meiroang in dihp kan; a palwoaroan mahn kan kin okjekla likin kahnihmpwallo.
12 Ioar kahrpoahioauwe Jesus pel mehkihdi likin kahnihmmwo, pwa pein Ah insa en kamwkelehda armaj jang dihp.
13 Doari, kisai en inla Ipoa likin kahnihmmwo apel pwili anki Ah mehkko.
14 Pwa joh asai kahnihmw oau ma poaspoas nehn jampah; kisai raprapahki kahnihmw oau ma pirin indoa.
15 Jangin jauwaj in Jesus, kisai en anjoau ohroj kihda kaping oang Koahs pwa ioar wia asai meiroang, ma ioar meiroang wa kisai sikoa kadehdehda pwa Jesus ioar Koaun.
16 Johpwa moalkoahla wihwia mwehu apel jeuweje emen emen, pwa ioar meiroang pwiai ma kin kaperenda Koahs.
17 Peik oang amwai koaun kan apel kapwaihahda arai koajoandi kan. Irai johkin koammoal pwa irai kin jiljiloa ngenimwai kan; pwa irai anahne kadehdehng Koahs pwukoahn arai papah. Ma kamwai peik oang irai, irai pirin wia arai doadoahk malmalau; ma joah, irai pirin doadoahk nehn injinjuwed, a joanngoauwo nen johpwa wia jauwaj oang kamwai.
18 Joah uhdi kapkapki kamai. Kamai kadehde pwa kamai anki lamlam mwakelkel pwa kamai nimen wia me pwung anjoau ohroj.
19 Doari, ngoahi poaki in ngidngid kamwai en kapkapki pwa Koahs en kajpahlihwe ngoahi ipamwai nehn anjoau koaroan.
Kapkap in Risingdi
20 Koahs ne kaiejda asai Koaun Jesus, ma ioar Jilepen Jihpw Laplap in jihpw jangin Ah insahu, ma ne kasoangehdi inoau poaspoasso.
21 Koahs in popohl en kioang kamwai joang mwehu ohroj kamwai anahne pwa kamwai en kapwaihahda kupwuroa; apel mweidoahng Ih, ki Jesus Christ, en kamwoakid nehn kisai da ma kaperenihda Ih. Klohri en inlahng Christ apkas apel allaluhla! Amen.
Koarjoahklahn Sikesik
22 Rioai kan, ngoah poaki kamwai en kanangmah rong padahk in kangoang oauwe; pwa kijilikoau oauwe ngoah ne insingehwehng kamwai johpwa nohn roairoai.
23 Ngoah nimen kamwai en kidal pwa riasai woal Timothy ne diljang nehn kalpwuhj. Ma ih leldo anjoau koaroando, ih pirin pasoahng ngoahi anjoauwo ngoah en suhwoang kamwai.
24 Kioang amai rahnmwahu oang ohroj amwai koaun kan apel oang ohroj nihn Koahs armaj kan. Joauloang kan jang Italy kadarwehng kamwai arai rahnmwahu.
25 Kalahngan en Koahs en minmine ipamwai ohroj.