12
Jamasai Koahs
1 Jounkadehde pwiai inenin dir pidekihpene kisai doahr koasoau koalik oau. A doari, kisai en kerpwihla joang ohroj ma kadroapwoa kisai apel dihp ma koldi kisai soang. Kisai en ngoangki kijou nehn weirro ma mine mwohn kisai.
2 Kisai en jipwoallahng Jesus, ma ioar asai pwojon anahne jang sapin lel imwin. Ih johpwa poakmahk jang lohpwuhwo! A in mehlel, ki perenno ma joujowi Ih, Ih johpwa mehkki mehdi pohn lohpwuhwo. Apkas, Ih ne mwindi loap moaun in mwoalen Koahs.
3 Lemleme joang kan Ih lelloang loaloa; ia uhwen Ah kanangmahioang kalioas ma Ih oaloahjang armaj dipan kan! Doari, johpwa mweidoahng pein kamwai en lamlam siksikla ke uhdi.
4 Oang amwai kahpwal in pallan dihp, kamwai kahjikkoar anahne uhwoang oaroh lel irair in mehkihdi.
5 Kamwai ne moalkoahla nehn en Koaunno kin poanoauwi kamwai, doahroar Nah jeri?
“Noai jeri, soahk kanaihoang dahkij Koaunno kin koapwung oang koawoa,
apel johpwa lamlam siksikla nehn Ah poanoauwi koawoa.
6 Pwa Koaunno kin poanoauwi ohroj ma Ih ipwilki
apel kin koalkoa ohroj ma Ih oaloahda en wiahla Nah jeri.”
7 Kanangmahioang da kamwai kin loklokki en wia doahroar en pahpa men koalkoa nah; oamw loklok kan kajalehda pwa Koahs wiahki koawoa doahroar Nah jeri. Mine jeri men kahjik pak oau poanoau ipen jamahu?
8 Ma kamwai johkin koaloklok doahroar Nah jeri ohroj, a doari me woahwoahki pwa jaudi kamwai uhdahn Nah, a pwen nihn emen sohrohr.
9 Nehn irair in pahpahn armaj, irai koalkoa kisai a kisai woaunki irai. A doari, ia uhwen koalikin asai anahne mweidla kisai oang Jamasai pali ngen apel mour!
10 Asai pahpahn armaj kan kin koalkoa kisai nehn anjoau mwosmwos, ma mwomwen pwung oang irai; a Koahs kin koalkoa kisai oang pein asai mwehu, pwa kisai en kak pwili Ih joarwihla.
11 Anjoau ma kisai kin koaloklok, ih mwomwen wia mehkij ma kainjinjuwed, johpwa kapiren oang kisai anjoauwo. A mwuhr, iraihok ma ne pwungla jangin koaloklok ma irai oaloa, irai injenmwahuki kijakij moaloailoai in mour pwung.
Kaweid apel Kangoang
12 Doari, kamwai pwoakda poahmwai kan ma ne koakoahkla apel kasihkeida pwukkoamwai kan ma roarroarla!
13 Joah uhdihjang allalu pohn al inen, pwa loap mwoasor in ehn en joah johla kak, a ih en mwehula.
14 Jong en anki moaloailoai ipen armaj ohroj, apel jong en mourki mour joaroawi, pwa emen ma johpwa, ih jehpirin pwili kapang Koaunno.
15 Kalkehr emen kerpwihla kalahngan in Koahs. Kalke emen doahrla suhkoa kasik ma kin koapda kioang armaj apwal dir ki ah pwoaisin.
16 Mweidoahng pwa joh emen en sapda nenek, ke joah joaroawi doahr Esau, ma noaskihla ah pwungin mehjeni oang pileis in mwinge oau.
17 Kamwai kidal pwa mwuhr, Esau nimen oaloa en ah pahpahu kapai a ih kapwurihekjang ipen jamahu pwa Esau johkak rapahkihda wioapoan ukudla da ma ih ne wiahda, mihndahr ma pilen mijoa koarkoar.
18 Pwa kamwai kahjik lel ke poahm mehkij doahr en mihn Israel-ok ma lel Nahna Sinai ma ngang in oai, ros koalik apel melmel,
19 koalikin ngilen kornihda, apel ngil oau. Anjoauwo armajjok rong ngillo, irai ken poakmahkki pwa irai en joah pwuroahng rong pel oau lal,
20 pwa irai johkak oaloahda ruwoj ma pwa, “Ma pel mahn men pukkoangdi nahna oauwe, ih uhdahn pirin kaskas ki sakai oaroh mehdi.”
21 Dahioau ma janjal armaj kapang pwanah inenin kamajpwehk kahrehng Moses en pwa “Ngoahi roarroarroar apel majpwehk.”
22 A pwen joah, pwa kamwai ne leldohng Nahna Zion apel kahnihmw in Koahs mourro; kahnihmw oauwe ioar Jerusalem in nehnloannge, ma sohnloang kid pwi pel pwili mine o.
23 Kamwai ne indoahng in kapokon kapiren in jeri johjohn Koahs, ma oadoarai ne insingdi nehnloannge. Kamwai ne indoahng ipen Koahs, ma ioar jounkoapwung in armaj ohroj apel ipen ngenin armaj mwehu ma ne unjekla.
24 Kamwai ne leldo ipen Jesus, ma ne koajoanehdi inoau koalik kappwo apel oang in dingding in insahu ma kin inoauki joang mwehu dir pwi jang inoau in insahn Abel.
25 Doari, kamwai kanaihoang apel johpwa kia rong Ih ma siksikesik. Iraihok ma ne kia rong Ih ma ne pouje padahk unjekko pohn jampah johpwa pisla. A doari, ia uhwen siksikin asai en kak pisla ma kisai jipwoaljang Ih ma sikesik jang nehnloannge!
26 Nehn anjoauwo, Ngiloahu kamwoakidihda jampah pwon; a apkas, Ih ne inoaukihda, “Ngoahi pirin pwuroahng kamwoakidihda jaudihoar jampah pwon apwen pel nehnloannge.”
27 Loapin lal kan “pirin pwuroahng” kajalehda janjal pwa mehkan ma kapikpikda pirin roarda apel kihekjang, pwa mehkan ma johkak isikekda pirin onohn.
28 Doari, kisai en anki kaping pwa kisai oaloahdi wei oau ma johkak roarda. Kisai en kajpahlkalahngan apel pwongi Koahs in mwomw oau ma kapwuriamwei apel woaun ma pirin kaperenihda Koahs;
29 pwa asai Koahsso wia oai ngang oau ma kin jirepihla me ohroj.