1 En anki pwojon ioar kamehlele mehkan ma kisai kin kajkajik, apel kamehlele mehkan kisai johkak kapang. 2 Ioar arai pwojon ma armaj in mehjjok ken pwungla ipen Koahs. 3 +Ioar jangin pwojon ma kisai woahwoahkihla pwa jampah pwon kapikpikkihda en Koahs Mahjan pwa mehkan ma armaj kak kapang wiawihda jang mehkan ma armaj johkak kapang. 4 +Ioar pwojon ma wiahng Abel en meiroangkihoang Koahs meiroang oau mwehujang en Cain meiroanngo. Jangin ah pwojon, Abel pwungla ipen Koahs ma kaminahla ih en wia armaj pwung men pwa pein Koahs kin kaminahla Ah kijakij kan. Jangin ah pwojon, mihndahr ma Abel ne pwen mehdi, ih pwen siksikesikkoar. 5 +Ioar pwojon ma koljang Enoch mehdi. A ioar ih ne wijikdahlahng Koahs; joh armaj kak rapahkihda ih pwa Koahs ne wahdahla ih. Puk Joarwiho pwahla pwa mwohn en Enoch wijikdahla, ih ne kaperenda Koahs. 6 Joh emen kak kaperenda Koahs ma joh pwojon, pwa emen ma indoa ipen Koahs anahne pwojon pwa mine Koahs apel Koahs kin ijoa irai kan ma kin rapahki Ih. 7 +Ioar pwojon ma wiahng Noah en rong en Koahs kaperihki joang kan nehn anjoau ma pirin indoa ma ih johkak kapang. Ih peikkoang Koahs apel kouda warihmw oau ma ih apel ah peneinei mourla loaloa. Imwlahn ah peik, jampah kadeikda; a Noah oaloahdi jang Koahs pwunngo ma kin indoa jangin pwojon. 8 +Ioar pwojon ma wiahng Abraham en peik anjoauwo Koahs pangin ih en jeiloaklahng japw oau ma Koahs ne inoaukihda en kioang ih. Abraham injang pein ah weiho, nehn ah jehjoa pwa ia wija ih pirin inla. 9 +Jangin pwojon, Abraham ne koaujoanla doahroar armaj in likin men nehn jappwo ma Koahs ne inoaukihoang ih. Ih koaujoan nehn umpwal, pel doahroar Isaac apel Jacob, ma oaloahdi inoauwohr jang Koahs. 10 Pwa Abraham ne kajkajik kahnihmmwo ma Koahs ne koakonehpene apel kouda, kahnihmmwo ma poahjoanin soang. 11 +Ioar pwojon ma kioang Sarah en kak noaisik jeri nehn ah ne daulihla johnpar in noaisik, pwa ih pwen kamehlele, pwa Ih ma inoaukihdi kolkol Ah inoau. 12 +Mihndahr Abraham ne pwen mehdi, indoahjang ipen woal mene ioar kadaudokoa ma dir in oar ujuhn pehn loannge, apel dir in oar pik in poahrinjeddo ma johkak wadwaddi. 13 +Ioar nehn pwojon ma ohroj irai pwiai mehdi. Irai johpwa oaloa mehkan Koahs ne inoaukihda, a jang wija inenin doh, irai ne kapangda apel kajamwo mehkan. Irai woahkda in janjal pwa irai mihn likin pwi apel mihn keiru pwi nehn jampah. 14 Irai ma sikoa joang pwiok kadehdehda pwa irai raprapahki oau weiho ma pein arai. 15 Irai johkin lemlemehr weiho ma irai ne injang; pwa ma ioar, irai nen pel anki anjoau mwehu in pwurla. 16 A pwen joah, wei oau ma mwehujang ioar irai inenin mwehuki, ioar wein nehnloannge. A doari, Koahs pel johkin mehkki ma irai panginki Ih arai Koahs, pwa Ih ne koaunopda kahnihmw oau oang irai. 17 ++Ioar pwojon ma wiahng Abraham en kihda nah jermweinno Isaac en wia meiroang oau anjoauwo Koahs jong ih. Ioar Abraham ma Koahs wiahng Ah inoauwo, a Abraham pwanah onop in kihda nah iehrojjo en meiroangla. 18 Koahs ne pwehng Abraham, “Ioar jang Isaac ma koah pirin nainki kadaudokoamw kan ma Ngoahi inoauki oang koawoa.” 19 Abraham dehdehki pwa Koahs kak kamourihda Isaac jang mehdi; a doari, kak en sikoa pwa Abraham ne oaloa Isaac jang mehdi. 20 +Ioar pwojon ma wiahng Isaac en inoauki kapai kan nehn rehn in mwuhr kan oang Jacob apel Esau. 21 +Ioar pwojon ma wiahng Jacob, mwohnnoar ah mehdi, en kapaida emenemen nihn Joseph jermweinnok. Ih enngoang pohn nah jokonno, pwongi Koahs. 22 +Ioar pwojon ma wiahng Joseph, mwohnnoar ah mehdi, sikoahda mihn Israel kan irai pirin diljang Egypt apel kihdi kaweid ma koanoahng da en wiawihoang palwoaroa. 23 + Ioar pwojon ma wiahng jemen apel inen Moses en oakihla Moses oaroain johnpwong jiluh mwerin ah noaisikdi. Ira kapang pwa ih wia jeri mwehu men. Ira johpwa majpwehk ki ara en japeik oang en nahmwarkiho koajoandi. 24 + Ioar pwojon ma wiahng Moses, nehn anjoauwo ih ne koalikla, en kia en adanki jerihn nihn nahmwarki Pharaoh jerpeinno. 25 Ih pilda pwili nihn Koahs armaj kan loklok jang perenki dihp nehn anjoau mwosmwos kij. 26 Ih dehdehki pwa nehn ah pirin wia mwahlla in oadoan Messiah pwanah kaspoa koalik jang koapwoa kajampwal ohroj in Egypt, pwa ih jipwjipwoalwehng oar kijakij in rehn in mwuhr kan. 27 Ioar pwojon ma wiahng Moses en injang Egypt, nehn ah johpwa mijik en nahmwarkiho lioas. Doahrma ih ne pwen kapang Koahsso ma johkin janjal, ih johpwa nimen japahlla. 28 +Ioar pwojon ma wiahng ih en koajoanehdi Passover apel koajoanehdi insa en kujupek oang pohn wanihmw kan, pwa Sohnloang in Kojkojjo en joah kojukdi mehjeni woal in mihn Israel kan. 29 +Ioar pwojon ma wiahng mihn Israel kan en kak aluhla oaloap Jed Wahssahu, doahr ma pwen japw enngeng; nehn en mihn Egypt kan jong en wia, jeddo pwurpene kaduhla irai. 30 + Ioar pwojon ma wiahng kel in Jericho en mwoardi mwerin en mihn Israel-ok pideki rehn ijuh. 31 +Ioar pwojon ma koldi Rahab, lihn noaski palwoaroa, jang ah en kojkojdi pasoahng iraihok ma japeik oang Koahs pwa ih kajamwo mwehu lipoahrok in Israel-ok. 32 +A doar da ngoah en pel pwehng kamwai? Anjoau nen joah isar oang ngoahi en sikoa Gideon, Barak, Samson, Jephthah, David, Samuel, apel joukohppok. 33 +Jangin pwojon, irai kin mahwin oang wei unjek apel kalwehdi. Irai wia da ma pwung apel kin oaloa da ma Koahs ne inoaukihda. Irai kakuhpene oawoan laian kan, 34 +kakunla oai ngang kan, apel pisjang kojkojkihdi kodlaij. Irai pwen jasihkei, a ken sihkeila; irai pwen sihkei nehn mahwin apel kalwehdi jounpei in mihn likin kan. 35 + Jangin pwojon, lihpwi ne oaloa arai peneinei kan ma ne mehdi pwuroahng mourda.

Epwi, ma kin kia oaloa jaldek, ne mehdi nehn loklok pwa irai en kak iejda oang oau mour ma mwehujang mour oauwe. 36 +Epwi wiahla mihn kapis a epwi koaloklok, pokpokki joal; a epwi joalkihdi joal pahrang apel wijikla nehn kalpwuhj. 37 +Irai kaskaskihdi sakai, soahpijoang nehn pwunge, apel kojkojkihdi kodlaij. Irai aluhjili likkoauki kilin jihpw ke kuhs, joamwoahmwoa, koaloklok, apel wia mwahlla. 38 Jampah johpwa wia wija mwehu oang irai! Irai aluhjili doahroar iraihok ma rapahki wijahn oak nehn japwsoahn apel dol kan, koaujoan nehn pwohkung apel pwoar kan. 39 Kajampwal in da minmine nehn poadpoad in irai pwiai ohroj ma kalwehdi nehn arai pwojon! A irai johpwa oaloa da ma Koahs ne inoaukihda, 40 pwa Koahs ne koajoanehdi pilahn oau oang kisai ma mwehujang me: irai pasoahng kisai a irai nen unjekla.