10
1 Kojonned in mihn Jew-ok johpwa wia mihn kajanjal unjek apel poaspoas oau in dahkij ma uhdahn mehlel. Ih wia kamwomwda oau ma johpwa dehde nehn kamwahu kan ma pirin indoa, joangoan meiroang pwiok kin wihwiawi kaukaule nehn johnpar ohroj. A ia mwomwen kojonneddo en kak kaunjekihla irai kan ma indoa ipen Koahs?
2 Ma armaj kan ma kin joaroawi oang Koahs uhdahn mwakelkella jang nehn diparai kan, irai nen johla poahm kasoausoau in dihp, apel meiroang in mehj ohroj nen uhdi.
3 A pwen joah, pwa meiroanngok kin kasmankihoang armaj kan diparai kan nehn pahr ohroj.
4 Pwa insahn kahu woal apel kuhs nen johkak kajohrla dipen armaj kan.
5 Kahrpoahioauwe ioar ma Christ indoahki jampahioauwe, Ih pwehng Koahs:
“Koah johpwa mwehuki meiroang apel kijakij in mahn,
a palwar oau ma Koah koaunop oang Ngoahi,
6 Koah johpwa perenki kijakij in mahn jirepla,
ke meiroang in kihjang dihp.
7 Doar Ngoah ken pwa,
‘Ngoahi me, Maing Koahs,
Ngoah ne indoahng kapwaihahda injenoamw
ma doahr ne insingdi nehn Puk in kojonned ki Ngoahi.’ ”
8 Keiou, Ih pwa, “Koah johpwa mwehuki ke perenki meiroang apel kijakij in mahn, kijakij in mahn jirepla, ke meiroang in kihjang dihp.” Ih pwa me mihndahr ma meiroang pwiai ohroj kin pel wiawi doahr kojonneddo.
9 Ih pel pwa “Ngoahi me, Ngoahi ne indoahng kapwaihahda injenoamw.” Doar Koahs ken kajohla meiroang mering ohroj, apel koajoanehdi pwa en Christ meiroang en wiliandi.
10 Ki en Jesus Christ kapwaihahda injenen Koahs, kisai ne mwakelkelda jang dipasai kan ki meiroang in palwoaroa ma Ih wiahda pehn oauwoar.
11 Rehn ohroj jamwrou ohroj kin wihwia arai doadoahk, pehn dir ihr kin wihwia joangoan meiroang koahr, a meiroang pwiai johkak kihjang dihp.
12 A Christ ne wiahla meiroang pehn oauwoar ma manman poaspoas. Doari Ih ne mwindi in loap moaun in Koahs.
13 Wijahu Ih ne joujowihla anjoauwo ma Koahs pirin wiahkihla Ah imwinsihsi kan dohien pwoalkoa.
14 Ki meiroang oauwoar Ih kaunjekihla poaspoas irai kan ma ne mwakelkel jang dihp.
15 Ngen Joaroawi pel kihdoahng kisai Ah kadehde. Keiou Ih pwa,
16 “Ioar Inoau Koalik wa me Ngoahi pirin kouda nehn pwungen Ngoahi apel irai,
nehn rehn kan ma pirin indoa, Koaunno pwa:
Ngoahi pirin kihdihoang Oai kojonned kan nehn arai mohngiong
apel insingehdi oang nehn arai lamlam.”
17 Ih pel pwa, “Ngoah johla pirin saman diparai kan apel arai doadoahk nauna kan.”
18 Doari nehn mehpwiai ne mahkla, meiroang in kihjang dihp ne johla anahn.
Kisai Indoa Koaroannoang Koahs
19 Rioai kan, insahn Jesus kahrehda kisai anki koapwoarpwoar unjek in dilda nehn Wijahu ma Keiou Joaroawi.
20 Ih ne risingdahng kisai al kapw oau apel al mour oau pasoahla kahdenngo, jang in pein Palwoaroa.
21 Mine asai Jamwrou Koalik men kin apwali umwen Koahs.
22 Kisai indoa koaroandohng Koahs ki mohngiong mehlel apel pwojon soangsoang, mweidoahng asai mohngiong en kamwkelehjang poapoahm nauna kan apel ki palwar ma kamwkelkihda pil mwakelkel.
23 Kisai koldi soang kadehdehn asai koapwoarpwoar pwa Koahs ma kin wiahda inoau kan kin uhdahn kapwaihahda Ah inoau.
24 Kisai en pel soahk emenemen pwa en jeuweje emenemen, kajalehda limpoak apel doadoahk mwehu.
25 Kisai joah uhdihjang asai siahk in pokonpene ma doahr epwi kin wihwia. A kisai engdehn kangoange emenemen pwa kamwai kidal Rehn in Koaunno ne koaroando.
26 Joh meiroang oau nen kak kamwkelehjang kisai nehn dihp, ma kisai kin injenki wihwiahr dihp, mwerin asai ne loalkoangkihla dahkij ma mehlel.
27 A ioarroar luhwoa, kajik nehn majpwehk joujowihdo kadeikko apel pwideng in oaiho ma pirin kajohrla irai kan ma kin uhwoang Koahs!
28 Emen ma kin koauwehla Kojonned in Moses kin kojkojdi nehn joh mahk, jang in kadehdehn armaj roahmen ke jilmen.
29 Ia woahr koaloklok ma kamwai leme nen lelloang emen ma lioassoang Nihn Koahs Iehrojjo? Emen ma wiahki pwa insahn Inoau Kappwo johpwa joaroawi nehn insahu ne kamwkelehda ih? Emen ma pel lahlahwehla Ngen en kalahngan?
30 Pwa kisai kidal inje Ih ma pwa, “Ngoah ma pirin dupuk, Ngoah ma pirin kajpahli.” A Ih pel pwa, “Koaunno ma pirin koapwung Nah armaj.”
31 Inenin kamwajpwehk kippoang nehn poahn Koahs mourro.
32 Saman mwomwen kamwai kan mehjwa. Nehn rehn pwiok, mwerin maram in Koahs ne dakda pohmwai kan, kamwai loklokki joang dir pwi, apwen joh emen lohdihoang nehn apwal.
33 Mine anjoau, armaj kan kin, in janjal, mwamwahlki apel koaukoauwe kamwai; a epwi anjoau kamwai ne onop in passoang iraihok ma ne oaloa joangoan loklok pwiai.
34 Kamwai ne pwili koaloklok doahroar iraihok nehn kalpwuhj apel malau nehn amwai koapwoahkan ne liklikjang kamwai pwa kamwai kidal pwa pein kamwai anki koapwoa ma mwehujang apel johkak rojla.
35 Kamwai joah kerpwihla amwai koapwoarpwoar pwa koapwoarpwoar kin wahdo kijakij koalik.
36 Kamwai anahne kanangmah, pwa kamwai en kapwaihahda kupwuren Koahs apel oaloa da ma Ih ne inoaukihda.
37 Ma doahr Puk Joaroawi ne pwa,
“Ekijjoar anjoau luhwoa,
a Ih ma pirin indoa pirin indoa;
Ih jehpirin kos.”
38 A armaj emen ma pwungla Ipoai ki pwojon pirin mourla;
a ma emen irai kerpwihla arai pwojon,
Ngoahi jehpirin injenmwahu oang irai.
39 Kisai jaudi armaj ma kin japahlla mwerin doari ken joaloangla. A kisai anki pwojon apel ne koamoaurla.