1 Sapin inoau koalikko kouda koajoandi pwi oang wioapoan joaroawi apel oang wijahioau wiawihdahng joaroawi nah jampah. 2 +A umpwal oau kokouda, a perehu likinno ma adanki Wija Joaroawi. Nehn perehioauwe ioar dohien lahmmo apel sehpillo ma pilahwahu meiroang oang Koahs. 3 +Likinjarkin kariau in kahdenngo ioar perehu ma adanki Wija Keiou Joaroawi. 4 +Nehn Wija Keiou Joarwiho ioar mwoal kohl oau oang okojla mihn meiroang karahdin apel Jepjeppin Inoauwo ma kidkidkihla kohl wija ohroj. Nehn Jepjeppin Inoauwo, mine rume kohl oau ma manna nekidek loaloa, nihn Aaron jokonno ma soah pwi ne poujda jang in, apel loapin sakai riauwo ma Kojonned kan insingdi puwoa. 5 +Pohn Jepjeppin Inoauwo, cherub (mahn mine poahnsangin) pwi mine ma kin kajkajale en Koahs mine wijahu, a poahnsanngok pwainla wijahu ma dihp kin mahkla. A apkas jaudi anjoau in kawoahwoa oarsik in me ohroj. 6 +Ioar mwomwen mehpwiok ne koajoanjoandi. Jamwrouwok kin dilda rehn ohroj nehn perehu likin kahdenngo, pwa irai en wiahda arai pwukoa doadoahkkok. 7 +A Jamwrou Laplappo kalahpwuk kin dilda nehn perehu nehn kahdenngo; a ih kin wia me pehn oau nehn johnpar oau. Ih kin wahdahla insa ma ih kin meiroangki oang Koahs ki pein ah dihp apel dihp ma armaj ne kin wiahda nehn arai johpwa kidal pwa irai wihwia dihp. 8 Ngen Joaroawi padahkki, in janjal, jang ohroj koajoandi pwiai pwa alin dildahng nehn Wija Keiou Joaroawi kahjik pirin risda nehn en perehu likin kahdenngo pe minminehr. 9 Joanngoauwe wia kilel oau ma uhdohng anjoau pwiai. Joanngoauwe woahwoahki pwa kijakij apel meiroanngok oang Koahs johkak kaunjekihla mohngiong in sohn joaroawi, 10 pwa meiroanngok pid oar mihn mwinge, mihn nim, apel mihn kajarawihn kamwkel. Joang pwiai ohroj pid koajoandihn majlikin kan, ma ioarroar en kin doadoahk oaroh lel anjoauwo Koahs pirin koajoanehdi koajoandi kappwo. 11 A Christ ne indoa wia Jamwrou Laplap in joang ohroj mwehu ma ne pwen mine. Nehn umpwallo Ih papah inenin koalik apel unjek. Umpwallo johpwa wiawihkihda poahn armaj; ioar pwa, ih johpwa wia kijehn jampah kapikpikda oauwe. 12 Anjoauwo Christ dilda nehn umpwallo lellahng nehn Umpwal Keiou Joarwiho, Ih johpwa wahla insahn kuhs apel kahu woal en meiroangki; a Ih wahla pein Ah insahu apel oaloahdi koamoaur poaspoas oang kisai. 13 +Pwa ma insahn kuhs, kahu woal apel poahj in kahu woal men kin kujup oang pohn armaj ma jamin oang kaudek. Joangoan siahk oauwe kin kamwkelehjang arai jamin pwa irai en kak kaudek. 14 Pwa joanngoauwe pwen mehlel, ia uhwen koalik in doadoahk kan ma kak unjekla ki insahn Christ! Jangin Ngen poaspoasso, Ih meiroangkihla pein Ih ma wia meiroang unjek oau oang Koahs. Ah insahu pirin kamwkelehda asai lamlam kan jang siahk joh kaspoa kan pwa kisai en papah Koahs mourro. 15 Ioar kahrpoahioauwe Christ ioar Ih ma koajoane inoau koalik kapw oauwe pwa irai ma Koahs ne pangin en kak oaloahdi kapaihok ma poaspoas ma Koahs ne inoaukihda. Joanngoauwe kak wiawi pwa mine mehdi oau ma ne kajaldekihla armaj jang japwunngok ma irai ne wiahda nehn anjoauwo ma sapin inoau koalikko pwen manmannoar. 16 Nehn irair in inoau in johjo oau, uhdahn kin mine anahn in kadehdehda pwa armajjo ma koajoanehdi ne mehdi, 17 pwa manman in inoau in johjo joh kaspoa ma armajjo wiahda inoauwo pe mour oar. Joangoan inoau oauwe kin manmanla mwerin en armajjo ma wiahda inoauwo ne mehdi. 18 Ioar kahrpoan keiou in inoau koalikko ken manmanla pwa insa pwili. 19 +Keiou, Moses wadek oang armajjok ohroj kojonned ohroj ma mine nehn pukin kojonneddo. A mwuhr ih oaloa rahn hyssop apel winen jihpw mwoahr wahssa kadu nehn insahn kahu woal apel kuhs doalkihda pil ujupki pukin kojonneddo apel armajjok ohroj. 20 Ih pwa, “Me ioar insahwa ma kilelehdi Inoau Koalikko ma Koahs ne wiahng kamwai pwa kamwai en kapwaihahda.” 21 +Doari, Ih pel ujupki insahu umpwal joarwiho apel koapwoahn wia wioapoan joarwihok ohroj. 22 +In mehlello, kojonneddo pwa enkennoar joang ohroj kin mwakelkelkihda insa, pel joh lapwdakoan dihp kin mine ma insa johpwa koardi.

23 Doari, dipwjoau pwiai pwen ioar kajalpen dipwjoaun nehnloannge kan, irai uhdahn pirin mwakelkelkihda siahk pwiai. A mehkan ma uhdahn mihn nehnloannge anahne mehlel meiroang oau ma mwehu jang siahk pwiai. 24 Pwa Christ johpwa dilda nehn wija joaroawi oau ma poahn armaj wiahda, ma doahr mwomwen uhdahnno. Pwa Ih dilda nehnloannge wijahu ma Ih minmine apkas mwohn Koahs pwa Ih en jeuweje kisai. 25 Jamwrou laplap in mihn Jew-ok kin dilda nehn Wijahu ma Keiou Joaroawi nehn pahr ohroj wijik insahn mahn. A Christ johpwa dilda pwa Ih en meiroang kihla pein Ih pehn dir, 26 pwa ma pwen ioar, Ih uhdahn pirin loklok pehn dir jang sapin en jampah kapikpikda. A pwen joah, pwa Ih indoa pehn oauwoar koaroandohng imwin di ohroj, pwa en kajohrla dihp jangin Ah meiroangkihla pein Ih. 27 Ne pwen koajoandi pwa armaj ohroj pirin mehdi pehn oauwoar, a mwuhr irai en oaloa kadeik ipen Koahs. 28 +Pel doahroar, Christ meiroangla pehn oauwoar pwa en kihjang dipen armaj dihrdir. Ih pirin japahldo kariau, jaudi ki dihp, a Ih en kamourihla irai kan ma joujowi Ih.