8
Jesus Asai Jamwrou Laplap
1 Kahrpoan iroa kai kamai siksikoa ioar ma pwa mine asai Jamwrou Laplap men, ma kin mwindi loap moaun in mwoalen Keiou Laplap nehnloannge.
2 Ih kin papah doahr Jamwrou Laplap nehn Wija Keiou Joaroawi, ma ioar, nehn uhdahn umpwal wa ma pein Koaunno kouda, a jaudi poahn armaj.
3 Jamwrou laplap ohroj kin pilpilda en kihda kijakij apel mihn meiroang [in mahn kan] oang Koahs; a doari, asai Jamwrou Laplappe koanoahng en pel mine Ah mihn meiroang.
4 Ma Ih minmine jampah, Ih nen johkak wiahla emen jamwrou, pwa mine jamwrou pwi ma kin kihda kijakij ma koajoandi jang Kojonned in mihn Jew kan.
5 Doadoahkko ma irai jamwrou kan kin wia pwen kajalehda mwomwen uhdahn doadoahkko apel kajalehda ngenin da mine nehnloannge. Pel doahroar ipen Moses, anjoauwo ma Ih wia kokoudahn umpwal Joarwiho, Koahs pwehng Ih,
“Kanaihoang apel soahk mwehu pwa koah en wiahda joang ohroj doahroar pilahnno ma kajalehk oang koawoa pohn dollo.”
6 A anjoaukije, Jesus ne oaloahdi doadoahk in jamwrou ma pohnangin iraihok, doahroar inoau koalikko ma ne koajoandi nehn pwungen Koahs apel Nah armaj wia koajoandi mwehu oau jang koajoandihn mwowoa pwa koajoandi oauwe poahjoandahjang inoau in joang inenin mwehu kan.
7 Ma pwen joh japwungin keiouin inoau koalikko, a nen pwen johpwa anahne inoau kariauwo.
8 A Koahs kapangda japwung ipen Nah armajjok, ioar Ih ken pwa:
“Koaunno pwa, anjoau oau pirin indoa
ma Ngoah nen kouda Inoau Koalik Kapw oau nehn pwungen Ngoahi apel mihn Israel kan
apel mihn Judah kan.
9 Ih jehpirin doahr Inoau Koalikko ma Ngoah wiahng jamaraihok
nehn rehnno Ngoah kol poahrai kan uk irai jang nehn wein Egypt.
Irai johpwa loalpwoas oang Inoau Koalik ma ngoah wiahng irai,
ioar mehwa Ngoah johla soahk ki irai.
10 Anjoaukije, ioar inoau wa Ngoah pirin wiahng armaj in Israel kan,
Koaunno ken pwa: Ngoah pirin audohkihda
Oai kojonned kan nehn arai lamlam
apel insingehdihoang nehn arai mohngiong.
Ngoah pirin wia arai Koahs apel irai pirin wia Noai armaj.
11 Joh emen in irai pirin padahkihoang arai pirien kan
ke mihn imparai kan, ‘Kidalla Koaunno.’
Pwa ohroj irai pirin kidal Ngoahi,
jang irai siksik lel irai laplap kan.
12 Ngoah pirin mahkoahng diparai kan.
Ngoah johla pirin saman arai japwung kan.”
13 Jangin in sikesik in inoau koalik kappwo, Koahs ne wiahng sapin inoauwo en meringla; apel joah lipilpil joang kan ma ne meringla apel dehnla pirin joaloangla anjoau koaroan.