7
Jamwrou Melchizedek
1 Melchizedek ioar nahmwarkihn Salem apel jamwrou in Koahs Keiou Laplap. Melchizedek suhwoang Abraham nehn en Abraham japahljang ah kalwehdi nahmwarki pahmennok; ih kapaiahda Abraham.
2 Abraham kioang Melchizedek eijek kij oau in joang ohroj. (Keiou, oadoahu woahwoahki “Nahmwarkihn Pwung;” apel “Nahmwarkihn Salem” ma woahwoahki “Nahmwarkihn Popohl.”)
3 Jangin johpwa janjal inje jamah ke inah, ia ah iroak in kadaudokoa, ia sapin ke imwin rehn in ah mour, doahroarla Nihn Koahs Iehrojjo, Melchizedek wia jamwrou poaspoas men.
4 Pwanah lemehla uhwen laplap in ih: Ken pein koaun in kadaudok Abraham ken kioang ih eijek kij oau in koapwoahk wijikdo jang mahwin.
5 Apkas kojonned koajoanehdi oang kadaudok in Levi kan ma ne Jamwroula en kin rikda eijek kij oau jang ipen mihn Israel kan, ma ioar riarai kan; mihndahr ma riarai kan pwen kadaudok in Abraham.
6 A Melchizedek pwen jaudi kadaudok in Levi, a ih ken oaloa eijek kij oau jang Abraham pel kapaiahda ih ma ne oaloa en Koahs inoau kan.
7 A in mehlel, ih ma kihla kapai laplap jang ih ma oaloa kapai.
8 Nehn irair oang mihn Levi kan, eijek kij oau kin rikrikda ki armaj ma kin mehdi; a oang Melchizedek, eijek kij oau ken rikrikda ki ih ma mour, doahroar en Puk Joaroawi pwa.
9 Doari, kisai en sikoa, nehn Abraham ne kihda eijek kij oau, Levi (ma kadaudokoahk kin rikda eijek kij oau) ne pel kihda eijek kij oau.
10 Pwa Levi kahjik oar noaisikdi, Ih pe minminehr nehn palwoaroan kadaudokoan Abraham anjoauwo ma Melchizedek suhwoang Abraham.
11 A ioar poahjoan in koajoandihn jamwrou in Levi kan wa me ma Kojonneddo ken inlahng mihn Israel kan. Apkas, ma doadoahk in jamwrou in Levi kan kin pwen unjek, a nen joh anahn in joangoan jamwrou sohrohr men en pwokdo, emen ma kijehn iroak in jamwrou in Melchizedek, a jaudi kijehn Aaron.
12 Pwa anjoauwo ma koajoandihn jamwrou kin okdek, a kojonned kin pel okdekla.
13 A asai Koaunno, ma ioar mehpwiai doakdoakoa, wia kijehn oau kainek sohrohr; a joh pehn oau sohn Ah kainekko wia doadoahk in jamwrou men.
14 Inenin janjal mwehu pwa asai Koaunno pwen noaisikdi wia kijehn kainek in Judah; a Moses johpwa sikoa kainek oauwe nehn ah sikoa jamwrou kan.
Emen Jamwrou, Doahroar Melchizedek
15 Irair oauwe ne pel oauwoar ah janjalla; jamwrou sohrohr men, ma doahroar Melchizedek, ne pwokdo.
16 Ih oaloa pwukoahn jamwrou men, jaudi jangin en armaj koajoandi ke kojonned, a pwen jangin manman in mour oau ma joh imwlakoa.
17 Ma doahr Puk Joaroawi ne pwa: “Koah pirin wiahla jamwrou poaspoas men, doahr iroak in jamwrou in Melchizedek.”
18 Doari, koajoandi merinngo ne kasohrohrla, pwa ih jasihkei apel joh kaspoa.
19 Pwa kojonned in Moses johkak kaunjekihla mehkij. A apkas, koapwoarpwoar mwehu oau ne indoahng kisai ma mweidoahng kisai en kin indoa koaroannoang Koahs.
20 Pasoahng oar, mine pel en Koahs inoau. Joh joangoan inoau oauwo wiawihda anjoau pwiok ma epwi oaloa pwukoahn jamwrou.
21 A Jesus wiahla jamwrou men jangin inoauwo Koahs pwehng Ih:
“Koaunno ne wiahda inoau soang oau
ma jehpirin kajpahlihekjang:
‘Koah pirin wiahla jamwrou poaspoas men.’ ”
22 Inoau oauwe kahrehng Jesus ken wiahla kadehdehn inoau koalik mwehuwo.
23 Pel mine mehkij ma inoau oauwe sohrohr ki: dirin jamwrou mehj; pwa ihr ne mehdi johkak poujla arai doadoahk.
24 A Jesus kin mour joh imwin apel Ah doadoahk in Jamwrou kin pel joh imwlakoa.
25 A ioar Ih kak, apkas apel anjoau ohroj, en doaroahla iraihok ma indoa ipen Koahs ki Ih pwa Ih en mour allaluhla pwa en kapkapki irai ipen Koahs.
26 Doari, Jesus ioar ma Jamwrou Laplap ma kin apwalihla asai anahn kan. Ih joaroawi; joh japwung ke dihp Ipoa. Ih ne kasohrohrla jang armaj dipan kan apel kajapwilda pohnangin nehnloannge.
27 Ih johpwa doahroar epwi jamwrou laplap; Ih johpwa anahne wia meiroang rehn ohroj, keiou, oang pein dipoa a mwuhr, oang dipen armaj. Ih ne wia meiroang oau, pehn oauwoar doari, nehn Ah meiroangkihla pein Ih.
28 Kojonned in Moses kin kajapwilda armaj joah unjek pwi pwa en wiahla Jamwrou laplap: A en Koahs inoauwo ma Ih kahukihla, ma indoa mwerin Kojonneddo, ioar kajapwilda Nah Iehrojjo, ma ne unjekla allaluhla.