6
1 Doari, kisai engdehnwe mwowoa oang padahk unjek, apel injang keiouin kaskuhl in padahk in joauloang. Kisai joah koanoahng pwuroahng sikoa poahjoan in wiliakapw jang doadoahk joh kaspoa kan apel pwojon in Koahs,
2 padahk kan ma pid poapdaij kan apel kihekdi poa pohn armaj; padahk ma pid iejda jang mehdi apel koapwung poaspoas.
3 Kisai engdehnwe mwowoa! A ioar mehwa me kisai pirin wia, ma Koahs mweidoahng.
4 Apwa ia mwomwen iraihok ma kerpwihla arai pwojon en kak japahldo wiliakapwla? Anjoau kij, irai mine nehn maram in Koahs; irai ne jongdi kijakij in nehnloannge, apel oaloahdi arai pwaij in Ngen Joaroawi;
5 irai ne kidal jang arai wihwia kan pwa Mahjan en Koahs pwen mwehu, a irai ne poahm manman kan in weiho allaluhdo;
6 Doari, irai ne kerpwihla arai pwojon! Nen wia irair apwal oau en kajpahlihdo irai en pwuroahng wiliakapw, pwa irai ne pel pwuroahng kalohpwuhla nihn Koahs Iehrojjo, apel kamehkihda Ih mwohn armaj.
7 Koahs kin kapaida pwirej ma wud kin kalap mwoardihoang puwoa apel kakoapihda mwehu wehn pwirejjo ma kin kaspoahng irai ma koadoahkoahda.
8 A doar ma pwirejjo nen pwen kakoapihda suhkoa soaksoak apel dipwdipw nauna, a nen uhdahn kejpwihekla, Koahs nen kariahla, a mwuhr nen uhdahn jirepla.
9 A mihndahr ma kamai sikesik doahre, koampoakpamai kan, kamai koapwoarpwoarki kamwai. Kamai kidal pwa kamwai anki kapai mwehuwok ma kijehn amwai koamoaur.
10 Koahs johpwa kin pwung japahrek. Ih jehpirin moalkoahla doadoahkkok kamwai ne wiahda ke ipwillo ma kamwai ne kajalehng Ih janjal nehn jauwaj ma kamwai ne jeuweje apel jeujeuweje epwi joauloang.
11 Koalikin amai inoang pwa emen emen kamwai en kolkol amwai ngoang lel in imwin, pwa joang kan ma kamwai kajik en pwoaida
12 Kamai johpwa nimen kamwai en dangahngahla, a kamwai en wia doahroar iraihok ma kamehlele apel kanangmah, oaroh kamwai oaloa da ma Koahs ne inoaukihdi.
Mehlel in En Koahs Inoau
13 Anjoauwo Koahs ne wiahda Ah inoau oang Abraham, Ih kahukihla pein Ih, pwa joh emen laplap jang Ih ma Ih kak kahuki,
14 Ih pwa, “Ngoah inoaukihoang koawoa pwa ngoah pirin uhdahn kapaiahda koawoa apel kadirihla kadaudok in koawoa kan.”
15 Abraham kanangmah joujowi inoauwo oaroh lel anjoauwo pwoaida.
16 Armaj kin kahukihla oadoan emen ma laplap jang irai; kahulahu kin kadehde inoau apel kin kauhdi akmai ohroj.
17 Jangin en Koahs mwehuki Ah koajoandi, ma johkin okdekjili, en inenin janjal mwehu oang irai ma pirin johjohki da ma Ih ne inoaukihdi, Koahs kamehlelehkihla inoau oau.
18 Koahs wia joanngoauwe pwa joang riau ma johkin okdekla — inoau apel kahula — johkak Koahs en likamw. Kisai ma kaudohng koldi soang koapwoarpwoarro koajoandi mwohn kisai nen kak oar inenin injinohda.
19 Koapwoarpwoar oauwe kisai anki wia pohdek in mour oau ma inenin soang apel sihkei ma pohdeklahng nehn pere joarwiho oaloap kahdenngo,
20 wijahu ma Jesus inla mwohn kisai, ne wilianla kisai. Ih ne wiahla jamwrou laplap poaspoas men, doahr iroak in jamwrou in Melchizedek.