5
1 Jamwrou laplap ohroj kin pilpilda jang nehn pwungen ioange woal kan apel kapwukoahki en wilian irai papah Koahs, en kihda kijakij in sohnmesei apel meiroang ki diparai kan.
2 Jangin pein ah jasihkei nehn joang dir pwi, ih pel kak kadek oang iraihok ma joaloalkoang apel kin wiahda japwung.
3 A pwa jangin pein ih pwen jasihkei, ih koanoahng wia meiroang jaudihoar oang dipen armaj, apwen pel oang pein dipoa kan.
4 Johpwa emen kin pein kioang ih woaun in wia jamwrou laplap men. Koahs kalahpwuk ma kak poangpoang pwa woal men en wia jamwrou laplap men doahr ah wiahng Aaron.
5 In joangoan mwommwohr, Christ johpwa oaloahng pein Ih woaun in wia jamwrou laplap men. A Koahs pwehng Ih,
“Koah ioar Noai Jermweinwa;
rehn oauwe Ngoah ne wiahla Joamoamw.”
6 Ekij wija Ih pel pwa,
“Koah pirin wiahla jamwrou poaspoas men
doahr iroak in jamwrou in Melchizedek.”
7 Nehn Ah mour pohn jampah, Jesus kin wia Ah kapkap apel poakpoak kan ki joang ngil koalik apel kakoarihla pilen mijoa oang Koahs, ma kak doaroahla Ih jang mehdi. Jangin Ah aksiksik apel poadidi, Koahs ne rong Ih.
8 Mihndahr ma Ih ioar Iehroj in Koahs, Ih woahwoahkihla mwomwen peik jangin Ah loklok kan.
9 Jangin Ah ne wia unjekla, Ih wiahla alin koamoaur poaspoas oang irai ohroj ma peik oang Ih,
10 Kahrehda Koahs ken wiahkihla Ih jamwrou laplap men ma doahr iroak in jamwrou in Melchizedek.
Kalke kerpwihla Pwojonno
11 Oang iroahioauwe, mine joang dir kamai koanoahng pwa, a apwalin in kawoahwoahng kamwai pwa kamwai kin kosin woahwoahkihla.
12 Ne pwen lel anjoau mwehu oang kamwai en wiahla jounpadahk, a joah pwa kamwai pwen anahnehr emen sohrohr en padahkihoang kamwai keiouin kaskuhl in Mahjan en Koahs. Mihndahr kamwai kak kang mwinge masak, a kamwai pwen oaloahr pilen dihdi.
13 Emen ma anahnehr nim pilen dihdi pwen wiahr jeri men, ma pe kahjik poahm irair in da ma pwung apel japwung.
14 A mwinge masak ioar kenen irai kan, ma ne koahiokla jangin da irai kin wia, kak kajawi wikpijoang in mwehu apel nauna.