4
1 Doari, Koahs ne kijkijoahki kisai inoauwo ma pwa kisai en kak oaloa koammoallo Ih siksikoa. Kisai kanaihoang pwadoar emen in kamwai janjalda mwuhr pwa ih luhj jang oaloa koammoallo Koahs inoauki.
2 Pwa kisai ne rong Rongmwehuwo doahroar irai. Irai rong padahkko a pwen joh kamwahu oang irai pwa irai pwen rong a irai joah pwojonla.
3 A kisai kan ma pwojon, kisai pirin dilda oaloa koammoallo wijahu ma Koahs ne inoaukihdi. Ma doahroar Ih ne pwa,
“Ngoah lioasla inoaukihdi:
‘Irai jehpirin dilda nehn jappwo ma Ngoah pwa ngoah en kioang irai en koammoal!’ ”
Ih pwahla joanngoauwe mihndahr ma Ah doadoahk ne imwjekla jang anjoauwo Ih kapikda jampah.
4 Pwa wijahkij nehn Puk Joaroawi sikoa doar rehn kaijuh:
“Rehn kaijuh, Koahs ken koammoal jang Ah doadoahk kan ohroj.”
5 Sikesik in irair oauwe pel pwokda ekij wija ma pwa,
“Irai jehpirin dilda nehn jappwo ma Ngoah pwa ngoah en kioang irai en koammoal!”
6 Iraihok ma sapin rong Rongmwehuwo johpwa koanoahdi koammoal oauwo pwa jangin arai joah kamehlele. A pwen pel mine epwi ma mweimwei oang irai en oaloa koammoallo.
7 Joanngoauwe kajalehda, in mehlel, en Koahs kasohrohrihla oau rehn, ma adanki “rehn oauwe.” Mwerin johnpar dir pwi, Ih sikoa joanngoauwe jangin en David doadoahkki Puk Joaroawi ma pwa: “Ma kamwai rong ngilen Koahs rehn oauwe, kamwai joah koapsakaila.”
8 Ma Joshua pwen kioang armajjok koammoallo ma Koahs inoauki, Koahs nen johpwa sikoa mwuhr oau rehn sohrohr.
9 A ioar mwomwehwa me, minehr koammoal oau oang nihn Koahs armaj kan doahroar en Koahs koamkoammoal rehn kaijuh.
10 Oang iraihok ma oaloa koammoallo ma Koahs inoauki, irai pirin koammoal jang pein ahr doadoahk, doahroar en Koahs koammoal jang pein Ah.
11 Doari, kisai wia uhwen asai kak ohroj en oaloa koammoal oauwo, pwa joh emen in kisai en doahroar irai ma jehpwili koamkoammoal pwa jangin arai japeik.
12 Mahjan en Koahs mour apel mwoakmwoakid, ingkoang jang kodlaij ingkoang loap riau kan. Kodlaij oauwe kin dok pasoahla lel wija ma mour apel ngen kin suhpene, lel wija ma koakon apel joal kin paspene. Kodlaij oauwe kin kadeik inoang apel poapoahm in mohngiong.
13 Joh mehkij kak oakkoak jang Koahs; joang ohroj nehn kapikpik ohroj ne janjalda apel dehde mwohn mijoa. A doari, ioar oang Ih kisai anahne kajalehda asai wihwia kan.
Jesus Jamwrou Laplap
14 Doari, kisai en koanoahng kolkol soangdi oang pwojonne kisai kin kadehde. Pwa kisai anki Jamwrou Laplap men ma ne leldahla ipen Koahs — Jesus, Iehroj in Koahs.
15 Asai Jamwrou Laplappe jaudi Jamwrou men ma johkin kak poahmda asai jasihkei kan. Pwa Ih pel pwili oaloahdi kajongjong in joang ohroj doahroar kisai. A ioarroar Ih johkin wiahda dihp.
16 Doari, kisai en anki koapwoarpwoar, kisai mwoakid koaroanlahng mwoalen Koahsso, wijahu ma kalahngan mine. Ioar wijahwa kisai pirin oaloa mahk apel kapangda kalahnganno ma en jeuweje kisai nehn anjoau kan ma koanoahng in doahr asai anahn.