3
Jesus Laplap jang Moses
1 Rioai joauloang joaroawi kan, kamwai kan ma Koahs ne pangin! Lemleme Jesus, ma Koahs ne kadardo pwa Ih en wia Jamwrou Laplap in pwojonno kisai kin kadkadehde.
2 Jesus loalpwoas oang Koahs, ma ne pilda Jesus en wia doadoahk oauwe; doahroar en Moses loalpwoas nehn ah doadoahk nehn Umwen Koahs.
3 Armaj men ma kin kou umw kin oaloa wahu koalik jang ummwo. In joangoan mwommwoauwe, Jesus ioar koanoahng oaloa wahu koalik jang Moses.
4 Umw ohroj, uhdahn, kin mine armaj men kouda; a Koahs ioar ma kapikda me ohroj.
5 Moses wia jounpapah poadidi men nehn umwen Koahsso; ih pel sikoa joang kan ma Koahs pirin sikoa nehn anjoau kan pirin indoa mwuhr.
6 A Christ kin loalpwoas nehn Ah wia Iehrojjo ma pwukoahki Umwen Koahs. Kisai ioar wia Umwen Koahs ma kisai kolkol asai sihkeiki apel koapwoarpwoarki mourro ma kisai kajkajik.
Koammoal oang Nihn Koahs Armaj kan
7 Ma doahr Ngen Joaroawi sikoa:
“Ma kamwai rong Ngilen Koahs rehn oauwe,
8 Kamwai joah koapsakaila doahr anjoauwo ma jamamwai koalikkok pallanda Koahs
doahr irai wia rehnno nehn japwsoahn nehn irai kajongjongi Ih.”
9 Koahs pwa, “Mihndahr ma irai ne kapang da Ngoah ne wihwia oaroain johnpar pahijek (40) nehn japwsoahn,
irai jong Ngoahi apel kajongjongi Ngoahi.
10 A ioar Ngoah lioaski oang joangoan armaj pwiok,
Ngoah pwahla ‘Irai kin anjoau ohroj joaloalpwoas
apel joikla kapwaihahda Oai kojonned kan.’
11 Ngoah lioasla wiahda inoau soang oau ma,
‘Irai jehpirin dilda nehn jappwo ma Ngoah pirin kioang arai koammoal.’ ”
12 Rioai joauloang kan, kanaihoang kamwai pwa joh emen kamwai en anki mohngiong oau ma inenin nauna apel joah pwojon ma pirin kahrehng en pwurjang Koahs mourro.
13 A pwa en joh emen kamwai en lohdi pehn widing in dihp apel koapsakaila, kamwai anahne jeuweje emen emen rehn ohroj, oaroain “rehn oauwe” nehn Puk Joaroawi pid kisai.
14 Pwa kisai ohroj ne wiahla ioangoan Christ ma kisai kolkol soang jang sapin asai koapwoarpwoarro kisai sapkihda lella imwin anjoau.
15 Ioar ma Puk Joaroawi ne pwa,
“Ma kamwai rong Ngilen Koahs rehn oauwe,
Kamwai joah koapsakaila doahr anjoauwo ma jamamwai koalikkok pallanda Koahs.”
16 Doari, inje ma rong ngilen Koahs, a ken pallanda? Ioar armajjok ohroj ma Moses ukjang nehn Egypt.
17 Inje ma Koahs lioas oang oaroain johnpar pahijek? Ih lioas oang iraihok ma wiahda dihp, iraihok ma ne mehdi nehn japwsoahnno.
18 Anjoauwo ma Koahs wiahda Ah inoau soanngo, “Irai jehpirin dilda nehn jappwo ma Ngoah pirin kioang irai en koammoal loaloa.” A inje ma Koahs pwahki me? Koahs pwahki iraihok ma pallanda Ih.
19 A doari, kisai ne kapang doahr irai johla kak dilda nehn jappwo pwa jangin arai joah kamehlele.