2
Koamoaur Koalikwa
1 Ioar mehwa kahrehda kisai koanoahng soangdihoang padahk mehlel kan ma kisai ne rong, pwa kisai en joah peila.
2 Padahkko ma sohnloanngok ne kioang asai pahpa koalikkok ne janjal pwa pwen mehlel, a iraihok ma johpwa kapwaihahda ke peikkoang padahkko ne oaloa koaloklokko ma koanoahng irai.
3 A imdoahr kisai en kak pisla ma kisai johpwa kaspoahki uhwen koalik in koamoaurro? Pein Koaunno ioar sapin pakairki koamoaur oauwe, a iraihok ma rong Ih ne kamehlehioang kisai pwa koamoaurro pwen mehlel.
4 Nehn anjoauwohr, Koahs pwili irai kadehde nehn Ah wia joangoan kilel manman kapwuriamwei kan; apel nehn Ah kijkijoahki irai kijakij in Ngen Joaroawi, in doahr Ah koajoanehdi.
Ih ma kahlwa kisai oang koamoaur
5 Koahs johpwa kioang sohnloanngok en koaunda jampah kapw ma pirin indoa, jampah ma kisai siksikoa.
6 A mine wijahkij nehn Puk Joaroawi ma pwa,
“Maing Koahs, dahkij armaj pwa Koah en lemleme irai?
Pwa Koah en apwali irai, armaj mere pwi?
7 Koah wiahda armaj, oang anjoau mwosmwos, irai en mine pehnangin sohnloang kan;
Koah kamwarmwarihkihdi pohn moangoarai klohri apel woaun.
8 Pel kajapwilda irai en koaun pohn me ohroj.”
Puk Joaroawi pwa Koahs wiahng irai en “koaun pohn me ohroj;” me ohroj woahwoahki joang ohroj. A in mehlel, kisai johpwa kapang armaj koaun pohn me ohroj apkas.
9 A kisai kapang Jesus, ma oang anjoau mwosmwos mine pehnangin sohnloang kan, pwa jangin in kalahngan in Koahs, Ih anahne mehkihdi ohroj. Kisai kapang Ih apkas mwaroahdi pohn moange ki klohri apel woaun jangin in mehdiho Ih loklokki.
10 Ioar inenin koanoahng en Koahs, ma kapikda apel kolkol joang ohroj, anahne wia Jesus en unjek jangin loklok, pwa en wahdo jeri dir en anki Ah klohriho. Pwa Jesus ioar Ih ma kahlwahlahng irai koamoaur.
11 Ih kamwkelehda armaj jang diparai kan; Ih apel iraihok ohroj ma kamwkelda ankihpene emennoar Pahpa. Ioar kahrpoahwa Jesus johpwa mehk in pangin ki irai Ah peneinei.
12 Ih pwehng Koahs,
“Maing Koahs, ngoah pirin kalohki Oadoammwen ipen rioai kan.
Ngoah pirin kapinga Koawoa nehn amwai suhpene kan.”
13 Ih pel pwa, “Ngoah pirin kioang oai liklik nehn Koahs.” A Ih pel pwa, “Ngoah me ipen jerihkai ma Koahs ne kioang Ngoahi.”
14 Jangin jerihok, ma ioar Ih panginki irai, ma armaj wiawihkihda uduk apel insa, pein Jesus wia armajla doahroar irai apel pwili poahm ahnpoan armaj. Ih wia me pwa jangin Ah mehdi, Ih en koauwehla Jehsen, ma anki manman pohn mehdi.
15 A in mwomw oauwe kajaldekla irai ma lidu oaroain arai mour pwa jangin arai mijik mehdi.
16 Inenin janjal pwa jaudi sohnloanngok ioar Ih jeuweje. A in mehlel, Ih jeuweje kadaudok in Abraham kan.
17 Joang oauwe woahwoahki pwa Ih anahne en doahroarla Nah armaj kan in joang ohroj, pwa Ih en kak wia nihrai Jamwrou Laplap loalpwoas apel dirin kalahngan nehn Ah papah Koahs, pwa dipen armaj kan en lapwda.
18 Doari apkas, Ih ne kak oang jeuweje irai kan ma kin oaloa kajongjong pwa pein Ih ne pwen pwili oaloa kajongjong apel loklok.