Kijilikoau oang Mihn
Hebrew
Oarlap
Kijilikoau oang mihn Hebrew insingdahng pwihn in joauloang oau, ma minehla nehn uhpene koalkoalikla, ma enkennoar apwalkihda ahr en kerpwihla ahr pwojon Christ. Jouninsinngo kangoange irai nehn arai pwojon, a in mehlel, jangin ah kajkajalehng irai pwa Jesus Christ ioar ma mehlel in apel imwlahn kajalpen Koahs. Iroa jiluh ioar sihkei nehn ah kadehde: (1) Jesus ioar Nihn Koahs Iehroj joahsuk ma kidalla mehlel in peik oang Jamahu jangin loklok ma Ih ne oaloahdi. Nehn Ah wia Iehroj in Koahs, Jesus laplap pohnangin joukohp kan nehn Kadehde Mering, sohnloanngok, apel pein Moses. (2) Koahs kajapwilda Jesus en wia jamwrou joahsuk men, ma laplap pohnangin jamwrou kan nehn Kadehde Mering. (3) Jesus wiahng joauloang men en maiouda jang dihp, majpwehk, apel mehdi. Jesus, ma ioar Jamwrou Laplap, kihda koamoaur mehlello. Siahk joaroawi kan apel meiroang en mahn kan nehn loapin lamlam in mihn Jew kan johkin kak kamourihla armaj. Joang pwiai ohroj pwen wia mihn kamwomwda doahr en Christ doadoahk ma pirin pwokda mwuhr.
Jangin insingdahn joangjoangoan pwojon in irai armaj indand kan nehn poadpoad in Israel (iroa koalik 11), jouninsinngo kangoange irai kan ma wadek kijilikoau en kolkol arai pwojon, a nehn iroa koalik 12, ih kangoange irai en kolkol arai pwojon lel imwin, jipwoallahngoar Jesus. Irai en kanangmahioang joah lipilpil kahpwal apel koaloklok ma nen indoahng irai. Kijilikoau in mihn Hebrew kan imwkihla lal in kaweid apel keper.
Audoapoan Kijilikoau
Sapkihda: Christ ioar kajalpen Koahs unjek 1:1-3
En Christ laplap jang sohnloang kan 1:4—12:18
En Christ laplap jang Moses apel Joshua 3:1—4:13
Laplap in en Christ kouwa doadoahk en Jamwrou 4:14—7:28
Laplap in en Christ inoau koalik 8:1—9:22
Laplap in en Christ meiroang 9:23—10:39
Kajampwal in pwojon 11:1—12:29
Kaperenda Koahs 13:1-19
Kapkap in kaimwjekla 13:20-21
Kaimwjeklahn kijilikoau 13:22-25
1
Mahjan en Koahs jang ipen Nah Iehroj
1 Mijkoalkoalwa Koahs kin lal oang jamasai mihn mehjjok jang ipen nah joukohppok nehn anjoau dir apel nehn joangoan mwomw dir.
2 A nehn koarjoahklahn rehn kai, Ih ne kin lal oang kisai jang ipen Nah Iehrojjo. Iehroj mene ioar jang Ipoa Koahs kapikda jampah; Ih ioar Koahs ne pilda en johjohki joang ohroj imwin anjoau.
3 Ih kin kajalehda maram in klohrihn Koahs apel Ih ioar ma pwanah doahroar Koahs, kolkol jampah ki Ah lal manman. Mwerin Ah ne oaloahdi mahkpen dipen armaj ohroj, Ih mwindi nehnloannge loap moaun in Koahs, Manman Keiou Koalik.
Laplap in Nihn Koahs Iehroj
4 Iehrojjo ne laplapla jang sohnloanngok, doahroar addo ma Koahs ne kioang Ih pel koalik jang oadoaraihok.
5 Pwa Koahs johpwa pehn oau pwehng emen Nah sohnloanngok:
“Koah ioar Noai Jermweinwa, rehnnoauwe Ngoah wiahla Joamoamw,”
Ke
“Ngoah pirin wiahla Jamah,
A Ih pirin wiahla Noai Jermwein.”
6 A nehn en Koahs ne kadardo Nah mehjeni Iehrojjo nehn jampah, Ih pwa:
“Ohroj nihn Koahs sohnloanngok anahne pwongi Ih.”
7 A pid sohnloanngok Koahs pwa:
“Koahs wiahkihla Nah sohnloanngok ukeng, A Nah sohn papahk umpwul in oai.”
8 A pid Nah Iehrojjo, Koahs pwa:
“Oamw wei, Koahs, pirin poaspoas!
Oamw koaunda Nihmw armaj kan poahjoankihda pwung.
9 Koah mwehuki da ma pwung apel lioassoang da ma japwung;
ioar kahrehda Koahs, Oamw Koahs, ne pilda Koawoa
apel ne kioang koawoa peren in woaun oau inenin koalik
jang da ma Ih ne kioang ioangoamw kan.”
10 Ih pel pwahla,
“Koah, Koaun, kapikda jampah oh sapin kawa,
apel pein poahmmwen kan wiahda nehnloannge.
11 Mehpwiai ohroj pirin johrla, a Koah pirin pwen minmine doahdoahrwahr,
irai nen meringla doahrla likkoau kan.
12 Koah pirin limpene irai doahr joakid,
pel pirin wilialihla doahr likkoau.
A Koah pirin pwen doahdoahrwahr allaluhla,
pel Oamw mour pirin pel joh imwlakoa.”
13 Koahs johpwa pwehng emen Nah sohnloanngok:
“Koah en mwindi oang in loap moaun in Ngoahi, Oaroh Ngoahi en wiahkihla oamw imwinsihsi kan loangin pehn pwoalkoamwen kan.”
14 A doari dahpwi sohnloang kan? Irai pwen ngen pwi ma kin papah Koahs, ma Koahs kadardo pwa en jeuweje irai kan ma pirin oaloahda koamoaur.