3
Yoreme huakiam mámakame
(Mt. 12:9-14; Lc. 6:6-11)
1 Júchi éntok Jesús sinagogapo jume judíom nau yayajäpo kibakek. Huämi éntok yoreme aaney, huépülam huakiam mámaka.
2 Huate éntok Jesústachim suaka ä bitchay, ä nätua báreka, jimyore táapo huaka kökoremta ä tüte máchileka.
3 Huanäi jü yoreme huakiam mámakamtau Jesús ínel áu jiaahua:
—Yejtekë ímï násuk kikte.
4 Huanäi jume géntem temajek, ínel jíaka:
—¿Türi jäni jimyore táapo tühuata yáa béchïbo, o kaa tühuata yáa béchïbo? ¿Türi jäni senu jíapsita jínëu béchïbo, o jábeta ä úhuä béchïbo?
Të bempo kaa jíaleka taahuak.
5 Jesús éntok omteka entok sirokaka áme bëkatana reemtek, námakak bem jiápsekä béchïbo. Huanäi hua yoremtau ínel jiaahua:
—Jume em mámamë rútuktia.
Ä rútuktiak éntokim türika taahuak.
6 Huanäi jume pariserom yeu sájaka, noktam nau tütek Herodianommaki, Jesústa mëbáreka.
Juebena gente bahue mayuat aneme
7 Huanäi Jesús bahuéu bíchaa siika, ä discíipulommaki. Gente éntok Galiléa buiära bétana tüisi juebénaka áman au yájjak; álë bénasi Judea buiära bétana,
8 Jerusalén, Idumea buiära, Jordán huáytana bétana, Tiro entok Sidónpo pueblompo chíkola jóakame. Júnëli tüisi juebénaka au nau yájjak, nokta jíkkajaka buéresi jita ä joäu bétana.
9 Huanäi Jesús jume ä discíipulom téjhuak, juka canoata huéchiapo am jípu sáhueka, áma yejte báreka, juka genteta kaa ä pittianakë béchïbo.
10 Bueïtuk Áapo juebenam kökoreme tütelatukay. Júkärim jüneriaka, huame kökoata jípureme áa béppa emo tábbey, at mámte báreka.
11 Jume espíritu chïcha mamachim ä bíchakam tónommey áu japjaptey. Huanärim chayeka ínel jiaahuay:
—¡Émpë jü Diosta Üusi!
12 Áapo éntok kutti ámeu nookak, kaa au yeu machiria nésahueka.
Huame dóoce apóstolim yeu púari
(Mt. 10:1-4; Lc. 6:12-16)
13 Huanäi káhuit jämuka, huame ä huáatiähuim núnnuk; bempo éntok au yájjak.
14 Huanäi ímëi dóocem au yájakame tékiata am mákkak, áamak am annakë béchïbo, entok náasam bíttua báreka, huame gentemmeu am béchïbo,
15 entok áapörik bétana yäura útteata am makkak, huaka kökoata am tütenakë béchïbo, entok lemooniom yeu am bébnakë béchïbo:
16 Ímërim jume yeu púarim: jü Simmom, Peero ti ä téhuaatuakähui,
17 entok jü Jacobo entok Juan ä sailahua, Zebedeota üusim, Boanergem ä téhuaatuakähui, yúku jímmaata jíahui uusim tiau báare,
18 entok Andrés, entok Felipe, entok Bartolomé, Mateo, Toomas, Jacobo Alfeota üusi, Tadeo, Simmom jü cananista,
19 entok Judas Iscariote, hua ä nénkakame.
Espíritu Santota béj‑reka nokhuame
(Mt. 12:22-32; Lc. 11:14-23; 12:10)
Chúkula, Jesústa ä discíipulommak jóau ä yepsak,
20 jü gente júchi au nau yájjak; junëlim kara júne ay jïbuäy.
21 Huanäi jume áamak huéerim ä jíkkajaka au yájjak, yeu ä huéria báreka, bueïtukim ä kóba rókotulä tíiyay.
22 Jume escriibam Jerusalén bétana áma yáij‑lame:
—Beelzebútam ä jiápsipo jípurë tíiyay, entokim Beelzebú lemooniommeu yäutta téhuampo jume lemooniom yeu ä bébä tíiyay.
23 Jesús éntok am núnuka, ejemplota ámeu yétchak, ínel ámeu jíaka:
—¿Jáchisen Satanás juka Satanásta yeu bébnake?
24 Jíta rey yäura júne au näikimtelataka anëtek, ïri rey yäura kaibu jíba béchïbo yäuratunake.
25 Entok jume jóapo emo béj‑reka emo näikimtelatuk, ïri jóuhua kaibu bínhuatunake.
26 Jü Satanás au béj‑reka au tóboktiak, au näikimtenake, entok kaibu bínhuatunake, bueïtuk jíba luutinake.
27 ’Kaabe júne jábe yorem útteakamta jóau kibakeka ára jita ä úhua, kaa bát ä súmako; të ä súmakätek ál‑la ára jita ä úhua.
28 ’Tua lútüriapone ínel enchimmeu jiaahua, sïme jume yoremem Dios bejri yáarimmechim jiokoritunake, entok hua nooki Diosta béj‑reka nokhuame;
29 të kia jábe junne Espíritu Santota béj‑reka nokame kaibu jiokoritunake, të hua bétte noki at chúpatunake jíbapo béchïbo.
30 Ínel jiaahua bueïtuk bempom espírituta chïcha machik ä jípurë tíiyay.
Jesústa áiye entok ä sailahuam
(Mt. 12:46-50; Lc. 8:19-21)
31 Chúkula, jume ä sailahuam entok ä áyehua ámam yájjak. Huanärim päkun tahuaka ä núnutebok, juka Jesústa.
32 Huanäi hua gente juebénaka áa chíkola jokame ínel au jiaahua:
—Ímïrim päku aane, jü em áiye entok jume em sailam enchi jariaka.
33 Áapo éntok, ínel ámeu jiaahua:
—¿Jábesu jü ín áiye, entok jume ín sailam?
34 Jume áa chíkola jokame bíchaka éntok ínel jiaahua:
—Ímëi ámëria jü ín áiye, entok jume ín sailam.
35 Bueïtuk jábe junne Diosta eäu joame, ïri ájäria jü ín saila, entok ín huaayi, entok ín áiye.