4
Ụ̃rọ̃drị́ Ũndũwã drị́ gá rĩ kî
1 Mâ ngọ́pịkâ, ĩmi are ímbátáŋá ĩmi átẹ́pị ꞌbã sĩ ĩmi imbájó rĩ kî;
ĩꞌbã ĩmi bị́lẹ́ ala gá ĩmi dó sĩ ị́jọ́ vã ãzíla ífí la nị̃ múké-múké.
2 Ímbátáŋá mání imbálé míní ꞌdĩ kí múké,
ị́jọ́ ꞌdĩ sĩ íja jõ mi bụ́lụ́ gá ímbátáŋá ꞌdĩ agá rĩ sĩ ku.
3 Sáwã ándrá mání adrujó ĩmbíráŋá ru mâ átẹ́pị be rĩ sĩ,
mání adrujó mâ ãndrẽ ꞌbã ngọ́tị́ŋá kílímgbí rĩ ꞌi rĩ sĩ,
4 má átẹ́pị la ándrá mání ímbátáŋá fẽ agá nĩ, ri ándrá mání jọlé la, “Ímba ị́jọ́ mání jọlé míní ꞌdĩ kí tã pírí ími ásị́ gá;
ímba ãzị́táŋá mádrị̂ kí tã ãzíla mi dó sĩ adru ídri.
5 Índrụ̃ ũndũwã, índrụ̃ míní ị́jọ́ vãŋá;
ími drị̃ ꞌbã ãvĩ jõ ị́jọ́ mádrị̂ kí sĩ ku jõku mí uja tị ị́jọ́ la sĩ bụ́lụ́ gá ku.
6 Lẽ mí aꞌbe jõ ũndũwã ku, ãꞌdusĩku ĩꞌdi mụ ími tã mbalé nĩ;
ílẽ ĩꞌdi ãzíla ĩꞌdi ími tã mba rá.
7 Ũndũwá ĩꞌdi ụ̃rọ̃drị́ ru, ị́jọ́ ꞌdĩ sĩ lẽ mí ịsụ́ míní ĩꞌdi rá.
Ãjẹ̃ la drĩ táni ãko míní trũ adrujó rĩ kí ꞌdụ pírí rá tí, lẽ mí ịsụ́ míní ị́jọ́ vãŋá rá.
8 Ílẽ ũndũwá ãzíla ĩꞌdi ími inga ụrụgá rá,
ídrĩ ími ĩbĩ ĩꞌdi rụ́ mgbemgbe, ĩꞌdi míní ãrútáŋá ají rá.
9 Ũndũwã la ími drị̃ aku bõngó ũniyambamba sĩ drị̃kã umbéjó rĩ sĩ,
ãzíla ĩꞌdi ími ụ̃sụ̃ mãwụ́wã ũnĩ drị̂ kí sĩ.”
10 Mâ ngọ́pị, mí are drĩ, mí ãꞌị̃ ị́jọ́ mání jọlé míní rĩ ꞌi
ãzíla ílí míní adrujó ídri rĩ kí dó sĩ adru ãzo rú.
11 Má imbá mi ũndũwá sĩ
ãzíla gẹ̃rị̃ pịrị sĩ uꞌájó rĩ sĩ ꞌbo.
12 Míní acị́ agá ãko ãzí icó ími pá sị̃lé ku;
ãzíla míní cẹ̃ agá ụ́ngụ́lẹ́ sĩ mí icó aꞌdélé ku.
13 Ímba ímbátáŋá ꞌdĩ kí tã, mí aꞌbe kí ku;
ímba tã la múké-múké, ãꞌdusĩku ĩꞌdi ídri mídrị̂ ꞌi.
14 Mí acị́ gẹ̃rị̃ ꞌbá ũnzí rĩ ꞌbadrị̂ gâ sĩ ku
jõku ítị̃ pá gẹ̃rị̃ ꞌbá ị́jọ́ ũnzí ngalépi rĩ drị̂ gá ku.
15 Mí idé ị́jọ́ ũnzí ku, mí ika mi ĩꞌdi rụ́ ku;
ígã ị́jọ́ ũnzí ngalé sĩ ãzíla mí apá ị́jọ́ ũnzí sĩ apá-apâ,
16 ãꞌdusĩku ꞌbá ũnzí rĩ icó kí ụ́ꞌdụ́ kolé ku kpere ĩꞌbã kí ị́jọ́ ũnzí idé agá rá ká;
icó kí ụ́ꞌdụ́ ꞌbelé ku kpere ĩꞌbã kí ꞌbá adrá agá rá ká.
17 Ị́jọ́ ũnzí idéŋá ĩꞌdi ĩꞌbaní cécé íná najó rĩ áni
ãzíla ãgọ̃bị̃ ĩꞌdi cécé ĩꞌbaní wáyĩnĩ mvujó rĩ áni.
18 Gẹ̃rị̃ ꞌbá ãlá rĩ ꞌbadrị̂ ĩꞌdi cécé ị̃tụ́ ꞌbã dị̃zã ãngũ jilépi ụ̃ꞌbụ́tị sĩ rĩ áni,
ĩꞌdi ãngũ ji jã ꞌdâ kpere ị̃tụ́ ꞌbã sị́ ꞌbã ko agá ãcíꞌbírítoto.
19 Wó gẹ̃rị̃ ꞌbá ũnzí rĩ ꞌbadrị̂ ĩꞌdi cécé mụ́dẹ́ ịnịbịrịcịcị rĩ áni;
nị̃ kí ãko fẽlépi la kí aꞌdé vũ gá rĩ ãꞌdu yã rĩ gá ku.
20 Mâ ngọ́tị̂, íꞌbã ásị́ ị́jọ́ mání jọlé rĩ kí drị̃ gá;
mí are ị́jọ́ mání jọlé rĩ kí múké-múké.
21 Ífẽ jõ ị́jọ́ ꞌdĩ ꞌbã ãvĩ kí míní ku,
ímba kí tã ími ásị́ gá;
22 ãꞌdusĩku kí ídri fẽ ꞌbá kí ịsụ́lépi rĩ ꞌbanî
ãzíla kí ꞌbá ụrụꞌbá adrí rá.
23 Ị́jọ́ ꞌdĩ kí agâ sĩ pírí, ímba ími ásị́ tã,
ãꞌdusĩku ĩꞌdi kídí ídri drị̂ ꞌi.
24 Mí aꞌbe ĩnzõ jọŋá cã;
íjọ ị́jọ́ mũlũmbẽ sĩ ku.
25 Índre ãngũ ími drị̃lẹ́ gá pịrị-pịrị,
mí uja ími tị bụ́lụ́ gá ku.
26 Gẹ̃rị̃ míní acị́jó rĩ ꞌbã adru ị́jọ́ pịrị drị̂ ꞌi
ãzíla ị́jọ́ míní ngalé rĩ kí dó sĩ adru pịrị.
27 Lẽ mí uja mi ị́jọ́ sĩ drị́ ãndá gá jõku ị̃jị́ gá ku;
mí anzé ími pá ị́jọ́ ũnzí agá rĩ sĩ rá.