5
ꞌBá bị́lẹ́ ị̃ndụ́ lijó ãwụ̃ sĩrĩ
1 Mâ ngọ́pị, íꞌbã ásị́ ũndũwã mádrị̂ drị̃ gá,
mí are drĩ ị́jọ́ mádrị́ ũndũwã drị́ ꞌdĩ kí sĩ ífí la vãjó múké-múké,
2 ị́jọ́ ꞌdĩ sĩ mi dó sĩ nị̃ ími tãmba sĩ cé,
ãzíla ị́jọ́ pịrị míní jọlé ími tị sĩ rĩ la dó sĩ ị́jọ́ nị̃ŋá mídrị̂ iꞌda.
3 Ị́jọ́ ũkú ãwụ́ꞌbá ru mịfị́ ãcí rĩ ꞌbã jọlé rĩ ị̃lị́kị̃lị́ ru cécé ãnụ́ áni
ị́jọ́ ĩꞌdi ꞌbã jọlé rĩ ũré ru ndẽ ãdu rá;
4 wó ị̃ndụ́lẹ́ la ụ̃jị́kị́rị́lị́lị́ ru cécé ị́lị́jị́ áni,
sị́ la ci ãcíꞌbírítoto cécé ménéŋá sị́ ị̃rị̃lé-ị̃rị̃lé rĩ drị̂ áni.
5 Ídrĩ acị́ ĩꞌdi vú gâ sĩ ĩꞌdi ími agụ drã gá;
ãzíla ĩꞌdi ími drị̃ se ị̃nádrị̃ gá.
6 Ũrã ị́jọ́ gẹ̃rị̃ ídri drị̂ drị̃ gá ku;
ĩꞌdi abá gẹ̃rị̃ agá ꞌdâ, wó nị̃ ꞌí ãvĩ ꞌbo rĩ gá ku.
7 Úꞌdîꞌda ĩmi are drĩ anzị mádrị̂,
ĩmi uja jõ tị bụ́lụ́ gá ị́jọ́ mání jọlé ĩminí rĩ kí agá ku.
8 Ĩse ĩmi ũkú ꞌdĩ áni rĩ ꞌbã andre gá ku,
ĩmụ kẹ̃jị́tị ĩꞌdidrị̂ gá ãni rú ku,
9 drĩ adru íni ku ĩmi ĩmi rụ́ kụlépi kụ̃kụ̃ rĩ kí ãvĩ rá
ãzíla ĩmi drã ꞌbá ũnzí rĩ kí drị́lẹ́ gá ngọ́tị́ŋá ru,
10 ꞌbá ãmị́yọ́ŋá ru rĩ kí dó mụ málĩ ĩmidrị̂ kí nalé nĩ,
ãzíla ꞌbá ãzí la dó sĩ mụ ãko ĩminí ịsụ́lé rĩ kí ꞌdụlé ĩꞌdi ãni la rú.
11 Sáwã ĩminí drãjó rĩ sĩ ĩmi dó nu
ãzíla ĩmi ụrụꞌbá kí ị́sụ́ abe ukó rá.
12 Mi dó amụ́ ími zịlé, “ꞌBá rĩ, ágã ándrá mání ímbátáŋá sĩ áma imbájó rĩ úmgbé ãjó yã!
Ágã ándrá áma itújó rĩ úmgbé ãjó yã!
13 Má are ándrá ímbáꞌbá mádrị̂ kí tị ku,
jõku ꞌbá mání ímbátáŋá imbálépi rĩ kí tị ku.
14 Má iza dó ma ãni rú kpékpé rá,
ꞌbá ru tralépi ũꞌbí rĩ kí drĩdríŋĩ gá.”
15 Lẽ ũkú mídrị̂ ꞌbã ca míní rá,
ífẽ lẽtáŋá mídrị̂ cúcú ĩꞌdinî.
16 Lẽ mí adru cécé ị̃yị́ dịlépi gẹ̃rị̃ agâ sĩ
ũkú pírí ꞌbã kí sĩ ị̃yị́ mvụjó ala gá rĩ rú ku.
17 Lẽ ꞌbã adru míní áꞌdụ̂sĩ,
mí ale ĩꞌdi ꞌbá ãzí be ku.
18 Lẽ ũkú mídrị̂ ꞌbã adru míní kídí drị̃lẹ́ba drị̂ rú,
mí uꞌá ãyĩkõ sĩ ũkú míní ĩgbãlé ꞌdĩ sĩ mi drĩ kãrị́lẹ̃ rú rĩ sĩ.
19 Ĩꞌdi ũniyamba rú mũcé áni, lẽtáŋá uyaŋâ kóru rĩ trũ cécé ị̃ndẹ́rẹŋâ áni,
lẽ ĩbã ĩꞌdidrị̂ ꞌbã fẽ míní ãyĩkõ sáwã pírí sĩ, lẽtáŋá ĩꞌdidrị̂ ꞌbã rụ mi cí.
20 Mâ ngọ́pị, ũkú ãwụ́ꞌbá ru mịfị́ ãcí rĩ la ími rụ ãꞌdu ị́jọ́ sĩ yã?
Mi ími ĩbĩ ꞌbá ãzí ꞌbã ũkú rụ́ ãꞌdu ị́jọ́ sĩ yã?
21 Ãꞌdusĩku Úpí la ị́jọ́ ꞌbá ꞌbã ngalé rĩ kí undré,
ãzíla mịfị́ ĩꞌdidrị̂ la ãngũ ĩꞌdi ꞌbã sĩ mụjó rĩ kí undré pírí.
22 Ị́jọ́ ũnzí ꞌbá ũnzí rĩ ꞌbã idélé rĩ la adru ĩꞌdiní ímbá ru;
ĩbáká ị́jọ́ ũnzí ĩꞌdidrị̂ drị̂ la ĩꞌdi vúŋá rụ.
23 Ĩꞌdi mụ drãlé ĩꞌdi ꞌbã ru tã mbajó ku rĩ sĩ,
Ĩꞌdi ãvĩ rá, ãꞌdusĩku aza ĩꞌdidrị̂ trẹ̃yị́.