3
Ímbátáŋá fẽlé Kãrị́lẹ̃ ꞌbaní rĩ
1 Mâ ngọ́pị, ími drị̃ ꞌbã ãvĩ jõ ímbátáŋá mádrị̂ kí sĩ ku,
wó ímba ãzị́táŋá mádrị̂ kí tã ími ásị́ gá,
2 ãꞌdusĩku kí ími fẽ uꞌálé ídri rú ílí ãzo rú
ãzíla mi dó sĩ drị̃lẹ́ba ịsụ́.
3 Lẽ mí aꞌbe ꞌbá lẽŋá kí ị́jọ́ mgbã rĩ be ku;
mí umbé ị́jọ́ ꞌdĩ kí ími imbe gá,
ímba ị́jọ́ ꞌdĩ kí tã ími ásị́ gá.
4 ꞌDã ꞌbã ũngúkú gá mi lẽtáŋá ãzíla rụ́ múké ịsụ́
Ãdróŋâ drị̃lẹ́ gá ꞌbá kí abe.
5 Íꞌbã ásị́ Úpí drị̃ gá ími ásị́ pírí sĩ
ãzíla mí ãtị̃ jõ mi ũndũwã mídrị̂ drị̃ gá ku;
6 mí ũrã Úpí ꞌbã ị́jọ́ ãzị́ pírí míní ngalé rĩ kí agá
ãzíla ĩꞌdi dó sĩ gẹ̃rị̃ mídrị̂ kí ꞌbã adrujó ãlá ru.
7 Íꞌbã jõ ími ũndũwã ambamba rĩ gá ku,
íru Úpí ꞌi ãzíla mí idé jõ ị́jọ́ ũnzí ku.
8 ꞌDã ꞌbã ũngúkú gá ími ụrụꞌbá la dó adru ị̃vị́ ru
ãzíla ími ĩfãkã kí dó sĩ adru ũkpó ru.
9 Ífẽ Úpí ní málĩ mídrị̂ kí ꞌbã ãzí kí,
ãkónã pírí mídrị́ ãfũlépi drị̃drị̃ rĩ kí abe ãrútáŋá ru;
10 ꞌdã ꞌbã ũngúkú gá ĩrá mídrị̂ kí dó sĩ ga tré drị̃ la kí dó sĩ ayi vũ rụ̂ sĩ,
ãzíla kére mídrị̂ kí dó sĩ ga wáyĩnĩ sĩ tré.
11 Mâ ngọ́pị, ígã jõ drị̃rịma Úpí ꞌbã fẽlé míní ímbátáŋá ru rĩ ku,
ígã jõ úzáŋá ĩꞌdi ꞌbã uzájó ími drị̃ gá ímbátáŋá ru rĩ ku,
12 ãꞌdusĩku Úpí la ꞌbá ĩꞌdi ꞌbã lẽlé rá rĩ co ímbátáŋá ru,
cécé átẹ́pị ꞌbã ngọ́tị́ ĩꞌdi ꞌbã lẽlé rá rĩ ị̃ndụ́ cojó ímbátáŋá ru rĩ áni.
13 Drị̃lẹ́ba ꞌbá ũndũwã ịsụ́lépi rá
ãzíla ꞌbá ị́jọ́ vãŋá ịsụ́lépi rá rĩ nî,
14 ãꞌdusĩku ũndũwã ꞌbã ụ̃rọ̃drị́ ãmbógó ru ãndânĩ ndẽ sílĩvã rá
ãzíla ífí ĩꞌdi ꞌbã kalé rĩ ndẽ gólũdĩ rá.
15 Ũndũwã ĩꞌdi ụ̃rọ̃drị́ ru ãndânĩ ndẽ írã ãjẹ̃ rú rĩ kí rá;
mí icó ĩꞌdi ụ̃ꞌbị̃lé ãko ãzí míní lẽlé la be ku.
16 Ũndũwã la fẽ la mi uꞌá ídri rú ílí ãzo rú,
ĩꞌdi ími ꞌbã adrulé málĩ trũ ãzíla mi ãrútáŋá ịsụ́ rá.
17 Gẹ̃rị̃ ĩꞌdidrị̂ kí ꞌbání ãyĩkõ
ãzíla ásị́-ị̃gbẹ̃ fẽ.
18 Ũndũwã ĩꞌdi ife ídri fẽlépi ꞌbá ĩꞌdi ịsụ́lépi rá rĩ ꞌba ní rĩ ꞌi;
ꞌbá ĩꞌdi amvulépi mgbemgbe rĩ kí dó drị̃lẹ́ba ịsụ́ rá.
19 Ũndũwã sĩ Úpí ꞌbã ụ̃nọ́kụ́ ị̃ndụ́ ũkpó ru,
ị́jọ́ vãŋá sĩ ꞌbã ꞌbụ̃ kí ãngũ ĩꞌbã kí adrujó rĩ gá;
20 ũndũwã ĩꞌdidrị̂ sĩ fẽ ị̃yị́ kị́rị́ rĩ ꞌbaní agbẹ́lé angájó vũ gâlé
ãzíla fẽ uzogó ní ꞌdịjó angájó ụ̃rụ́ꞌbụ̃ gá ꞌbụ̃ gâlé.
21 Mâ ngọ́pị, ímba ị́jọ́ lịŋá pịrị rĩ tã ãzíla ị́jọ́ amáŋá mgbã rĩ be;
lẽ ị́jọ́ ꞌdĩ ꞌbã ãvĩ kí ími drị̃ gá ku;
22 kí ími fẽ adrujó ídri rú,
ãzíla adrujó ãyĩkõ sĩ ídri mídrị̂ agá ílí ãzo rú.
23 ꞌDã ꞌbã ũngúkú gá mi dó acị́ gẹ̃rị̃ mídrị̂ kí gâsĩ ụ̃rị̃ kóru,
ãzíla ị́jọ́ ũnzí icó dó sĩ ími pá sị̃lé ku;
24 míní ími la agá vụ̃rụ́, mí icó idélé ụ̃rị̃ sĩ ku;
ãzíla ụ́ꞌdụ́ míní kolé rĩ la adru ãjị́ ambamba rú.
25 Mí idé ụ̃rị̃ sĩ ũcõgõ ími ịsụ́lépi rụ̃gbụ́
cécé lị́kị̃ aꞌdélépi ꞌbá ũnzĩkãnã ngalépi rĩ drị̃ gá rĩ áni rĩ sĩ ku,
26 ãꞌdusĩku Úpí la dó adru ꞌbá ími tãmbalépi rĩ ꞌi
ãzíla ĩꞌdi dó sĩ ími pá tã mba icó dó sĩ ru sị̃lé ku.
27 Lẽ mí uga mũkẽ ꞌbá ãzí ní ku,
ị́jọ́ la ꞌbã ũkpó drĩ adru ími drị́ gá rĩ gá.
28 Lẽ íjọ mî jĩránĩ ní, “Mí amụ́ drụ̃sị̃ ma míní fẽ la ĩndõ íni la ku,”
ãko ꞌdã drĩ adru mí be cí rĩ gá.
29 Mí itú ị́jọ́ ũnzí ãzí mî jĩránĩ
uꞌálépi mí be ãzíla ásị́ tị̃lépi ími drị̃ gá rĩ ụrụꞌbá gá ku.
30 Lẽ ítõ ꞌbá ị́jọ́ kóru
ꞌdĩ sĩ idé ị́jọ́ ũnzí ãzí ími ụrụꞌbá gá ku rú ku.
31 Mí idé ãjã ꞌbá ãgọ̃bị̃ ambamba rĩ sĩ ku
jõku mí ũbĩ ĩꞌdi pámvú ku,
32 ãꞌdusĩku Úpí ngụ̃ ꞌbá ị́jọ́ ũnzí ngalépi rĩ ũnzí,
wó ĩꞌdi tị icí ꞌbá ị́jọ́ pịrị rĩ ngalépi rĩ be.
33 Úpí la lị́cọ́ ꞌbá ị́jọ́ ũnzí idélépi rĩ drị̂ wã rá,
wó ĩꞌdi sụ̃sụ́ wi lị́cọ́ ꞌbá ị́jọ́ pịrị rĩ idélépi rĩ drị̂ ní rá.
34 Úpí la ꞌbá idemará ru rĩ kí ide ĩdẽ
wó ĩꞌdi ásị́ ị̃gbẹ̃ fẽ ꞌbá ru irilépi vụ̃rụ́lẹ́ rĩ nî.
35 Bá ũndũwá ru rĩ la ãrútáŋá ịsụ́,
wó ꞌbá azalépi aza-azâ rĩ ní ĩꞌdi drị̃nzá fẽ.