3
A Yuwana Almamadan jaꞌrima gay
(Mätä 3.1–12; Murkuj 1.1–8; Yuwana 1.19–28)
1-2 A Ngwaalu ükäjä ngwujaꞌri ndi Yuwana gïjï gidi Jäkärïyä poor gïtäny. Kaji nggoo, giru ganni gïmätï ge deleny didi ngwelenyinga didi Rumang dani Tïbïrïyü Gayijar yelenya gïdïdlä danni diru ꞌdï na tudini (15), a deleny dani Bilatij Bündï määtä yelenya ngwaalu ngwani Yäwüdïyä, na deleny dani Yïrüdïj dïmätï yelenya ngwaalu ngwani Jälïl, a gwenggen gwani Bïlïpüj määtä yelenya ngwaalu ngwani Yituriya na ngwaalu ngwani Targunitiya, deleny dani Liyaanu, dïmätï yelenya ngwaalu ngwani Äbälïn. Gaji ganni giru ge Anan na Giyaba ngwurꞌdal ngwanni ngwuru yiꞌra.
3 A Yuwana ila gïyündär ngwaalu ꞌdar ngwanni ngwänü genanu gidi Yaw yidi Ordoning. Ngwondaci ngwüjü ngwujaꞌri ngwudi Ngwaalu nunnu aar joꞌrenyana. Aar gatana yiꞌral yanni yiki ngwuje nyïnyï yaw ye nunnu a je Ngwaalu düdänïjänü giyiꞌral yegen yanni yiki.
4 Anaku ullu gu dïjïr didi Ngwaalu dani Ajaya ngwujaꞌri ngwanni ngwullung je kitabanu güngün ngwari,
“Dïjï ndo durnidu poor gïtäny ngwuci ngwüjü,
‘Raꞌtar gay gidi Deleny
ngaa gïꞌtïjï ngway aar dünälü.
5 Yülä ꞌdar ya ꞌrïnyänï ya jalu miꞌder,
yen na yidotr ya jalu miꞌder,
a gay ganni gimamindanu ga räꞌtïnï ga dünälü
a ngway ngwanni ngwuru yederom ngwundu ngwa ru gebed gijayalu.
6 Nunnu a ngwaalu juꞌralu a ngwüjï ꞌdar gïdïdlä engga gilanging gwudi Ngwaalu.’ ”
7 A ngwüjï ngwonyadu ꞌtüdädä ndi Yuwana nding je nyïnyï. A je Yuwana ci, “Nga nga gilee liru yïjï yidi ngwüüngä! Yärü gwuca je ngaa laꞌti la änï küündänü ganni nggo gïndï?
8 Ärrär be yiꞌral yanni yijaw ngaa ye inggidi ndi ari ngaa lima joꞌrenyana. Aaꞌti ngaa la ji ndi ci yigoꞌro yalu ngaa liru yïjï yidi Äbräyïm gwuru dïgüürnä dalu. Nggwa je ci, Ngwaalu ngwätï yiima ndi ape yoꞌrra giyee ngwuje ruji yïjï yidi Äbräyïm!
9 Ngwaalu ngwuma mïꞌrä guuꞌri ngwuwa ngwudi ngwaꞌri, daꞌri danni daꞌti da ꞌriꞌri yuula yanni yijaw, ding üꞌrïdälü mbüny ding gatu gïlïgä.”
10 A ngwüjï otacalu aar ci, “A mine änyängä ladi ärrï ange?”
11 Ngwuje ci nu, “Gwanni gwätï ngwureda rom, ngwape deꞌte ngwätädä dïjü danni daꞌti ätï, na gwanni gwätï yona aar emadi dïjï de danni daꞌti ätï.”
12 A ngwudulba ilada ndi Yuwana nunnu ngwuje nyïnyï. Aar otacalu aar ci, “Gwani doorta, änyängä ladi ärrï ange?”
13 Ngwuje ci, “Aaꞌti ngaa la gendaci ngwüjü dulba gidulbala danni daru de ngweleny.”
14 A gwuꞌtulu gwoko otacalu ꞌto aar ci, “Nda mine nyängä, ladi ärrï ange?”
Ngwuje ci, “Aaꞌti ngaa lapada dïjü ngwüꞌrïnyä yiima ye, aaꞌti ngaa lüꞌrïdä dïjü yiꞌduru nono ngweleny. Ïtär ngwuy ngwe ngwalu.”
15 A ngwujaꞌri apani ngwüjü a je ngwe ngwaalu elalu ndi geꞌtaji ndi ari Yuwana gwaadi ru gwanni Gwubrutaar yelenya.
16 A no, a je Yuwana ondaci ꞌdar ngwuje ci, “Nggwünyïnyä je yaw ye, a be gwanni nggwo gwïndï gwodan, nginde gwojemana ꞌdünggüny, äny gwaꞌti ädï ngwäyänü ngwüngün ndi ari nyi gwallaci ngwaralu ngwudi ngwüdän ngwüngün. Nginde gwa je nyïnyï Lïgïꞌrïm le lanni Lijuꞌru na lïgä.
17 Nginde nggwo gwapu ngwümülgügünä kuy güngün ngwadi ngwe ürnäjï yona ngwubruti doꞌralu ngwübäläjï yona kïlänü ngwube uꞌdiyi ngwoga lïgä le lanni lati ꞌti miꞌrinyu.”
18 A Yuwana rimalu ngwüjï ngwe yiꞌral ye yonyadu yiꞌter ngwuje päcälü ngwujaꞌri ngwanni ngwujaw ngwudi Ngwaalu.
19 A Yuwana girinya delenya dani Yïrüdïj ndi ari gwagu Yïrüdïyäng gwuru daw didi gwenggen, ngwärrï ꞌto yiꞌral yiꞌter yonyadu yanni yiki.
20 A be Yïrüdïj määtä Yuwanang gwani ngwujaꞌri ngwee ngwülängïtäjï korkon.
Nyïnyïnï gwudi Yicu
(Mätä 3.13–17; Murkuj 1.9–11)
21 Anni ma Yuwana nyïnyï ngwüjü ꞌdar, a Yicu ila ꞌto ngwünyïnyï. Anni ma Yicu ji ndi otaci Ngwaalingalu, a gere ïgïtïnä,
22 a Lïgïꞌrïm lanni Lijuꞌru üllä kerala liru ngwanginu nono amaam ngwaw nono a Ngwaalu ondaca aar ca, “Nga gwuru Gïjï güny ganni gämnïny. Nga gwüjädïnyänü gwulleny.”
Ngwügüürnä gwudi Yicu
(Mätä 1.1–17)
23 Gaji ganni gïꞌdïꞌrü ge Yicu ndi ape yiiru yüngün, nginde gwätï ngwüdläyü ꞌdï täꞌrïl (30). Gwügïꞌtïjä ngwüjï ndi ari gwuru gïjï gidi Yüjïb,
Yüjïb gwanni gwuru gïjï gidi Ali,
24 Ali gwanni gwuru gïjï gidi Matad,
Matad gwanni gwuru gïjï gidi Lawi,
Lawi gwanni gwuru gïjï gidi Maliki,
Maliki gwanni gwuru gïjï gidi Yenna,
Yenna gwanni gwuru gïjï gidi Yüjïb,
25 Yüjïb gwanni gwuru gïjï gidi Matataya,
Matataya gwanni gwuru gïjï gidi Amuj,
Amuj gwanni gwuru gïjï gidi Nawum,
Nawum gwanni gwuru gïjï gidi Ajli,
Ajli gwanni gwuru gïjï gidi Najayi,
26 Najay gwanni gwuru gïjï gidi Maad,
Maad gwanni gwuru gïjï gidi Matataya,
Matataya gwanni gwuru gïjï gidi Jimuyi,
Jimuyi gwanni gwuru gïjï gidi Yüjïkä,
Yüjïkä gwanni gwuru gïjï gidi Yoda,
27 Yoda gwanni gwuru gïjï gidi Yuwanan,
Yuwanan gwanni gwuru gïjï gidi Raja,
Raja gwanni gwuru gïjï gidi Jirubabil,
Jirubabil gwanni gwuru gïjï gidi Jälätïl,
Jälätïl gwanni gwuru gïjï gidi Nïrï,
28 Nïrï gwanni gwuru gïjï gidi Maliki,
Maliki gwanni gwuru gïjï gidi Adi,
Adi gwanni gwuru gïjï gidi Gwujam,
Gwujam gwanni gwuru gïjï gidi Alimadam,
Alimadam gwanni gwuru gïjï gidi Er,
29 Er gwanni gwuru gïjï gidi Jäjïwä,
Jäjïwä gwanni gwuru gïjï gidi Aliyajir,
Aliyajir gwanni gwuru gïjï gidi Yurim,
Yurim gwanni gwuru gïjï gidi Matad,
Matad gwanni gwuru gïjï gidi Lawi,
30 Lawi gwanni gwuru gïjï gidi Jamaan,
Jamaan gwanni gwuru gïjï gidi Yäwüdä,
Yäwüdä gwanni gwuru gïjï gidi Yüjïb,
Yüjïb gwanni gwuru gïjï gidi Yunam,
Yunam gwanni gwuru gïjï gidi Aliyakim,
31 Älïyäkïm gwanni gwuru gïjï gidi Miliya,
Miliya gwanni gwuru gïjï gidi Menna,
Menna gwanni gwuru gïjï gidi Matata,
Matata gwanni gwuru gïjï gidi Nitaan,
Nitaan gwanni gwuru gïjï gidi Däwüd,
32 Däwüd gwanni gwuru gïjï gidi Yici,
Yici gwanni gwuru gïjï gidi Obed,
Obed gwanni gwuru gïjï gidi Buwaj,
Buwaj gwanni gwuru gïjï gidi Jalimun,
Jalimun gwanni gwuru gïjï gidi Najun,
33 Najun gwanni gwuru gïjï gidi Aminidab,
Aminidab gwanni gwuru gïjï gidi Ram,
Ram gwanni gwuru gïjï gidi Ajirun,
Ajirun gwanni gwuru gïjï gidi Parij,
Parij gwanni gwuru gïjï gidi Yäwüdä,
34 Yäwüdä gwanni gwuru gïjï gidi Yagub,
Yagub gwanni gwuru gïjï gidi Ijaag,
Ijaag gwanni gwuru gïjï gidi Äbräyïm,
Äbräyïm gwanni gwuru gïjï gidi Tera,
Tera gwanni gwuru gïjï gidi Näwür,
35 Näwür gwanni gwuru gïjï gidi Jerog,
Jerog gwanni gwuru gïjï gidi Raw,
Raw gwanni gwuru gïjï gidi Palig,
Palig gwanni gwuru gïjï gidi Eber,
Eber gwanni gwuru gïjï gidi Jela,
36 Jela gwanni gwuru gïjï gidi Kayinan,
Kayinan gwanni gwuru gïjï gidi Aribagad,
Aribagad gwanni gwuru gïjï gidi Jam,
Jam gwanni gwuru gïjï gidi Nuuwa,
Nuuwa gwanni gwuru gïjï gidi Lamag,
37 Lamag gwanni gwuru gïjï gidi Mutujela,
Mutujela gwanni gwuru gïjï gidi Agonog,
Agonog gwanni gwuru gïjï gidi Yarid,
Yarid gwanni gwuru gïjï gidi Malalil,
Malalil gwanni gwuru gïjï gidi Kenan,
38 Kenan gwanni gwuru gïjï gidi Anuj,
Anuj gwanni gwuru gïjï gidi Jed,
Jed gwanni gwuru gïjï gidi Adam,
Adam gwanni gwuru gïjï gidi Ngwaalu.