4
A dijegoꞌrr ïdäjï Yicung
(Mätä 4.1–11; Murkuj 1.12–13)
1 A Yicu oꞌra ngwaalu ngwani Ordon gwonjadu gu Lïgïꞌrïm lidi Ngwaalu lanni Lijuꞌru. A Lïgïꞌrïm ape nggwe ele poor gïtäny
2 ngwujalu poor gïtäny yomon küüꞌrï rom (40) ati dijegoꞌrr ïdïtäjï giyomon ꞌdar. Ating ꞌti ïtï gony gere giyomon giyoo, anni ma yomon medadi giyoo a ngwamu enyanu.
3 A dijegoꞌrr ci nu, “Manari nga gwuru Gïjï gidi Ngwaalu, ca goꞌrra nggee ngwuru gon ang eny.”
4 A be Yicu ci nu, “Yüllïnä ndi ari nu, ‘Dïjï dümnä dati ꞌti midu eny gwe ꞌdogo.’”
5 Oꞌre a dijegoꞌrr oda nggwe allu kenala ngwenggaci yelenya yidi dïdlä ꞌdar aar elalu ngwäyänü no
6 ngwube ci nu, “Äny gwa ang ätädä yelenya yegen ꞌdar na näjï gwegen. ꞌDar giyee giyo yätädäär nje kuyanu güny yati nje ätädä dïjü danni dïmïnïny.
7 Ngwong ngwee ꞌdar ngwa be ru ngwunga manari nga gwuminy kwucalu yirku ye.”
8 A Yicu ci, “Yüllïnä ndi ari nu, ‘Kwuca Delenyalu diru Ngwaalu ngwunga yirku ye nga je äpïjï yiiru jücü.’”
9 A dijegoꞌrr apa nggwe ila Üräjälïm ngwugeꞌtalu korrala ngwüjärmädï ngwudi gobo ngwube ci nu, “Manari nga gwuru Gïjï gidi Ngwaalu, gätï ligoꞌro lunga ꞌtuꞌtu ngene ang üllï gïdïyängälü.
10 Yüllïnä ndi ari,
‘Ngwaalu ngwa ondaca yïꞌrrä yüngün gwani nga
aar gu etadi mama
11 ya ang määtädälä ngwuy ngwe ngwegen,
nunnu aaꞌti ngaa gwa obalu gora ge koꞌrr.’”
12 A be Yicu gwüꞌräcänü ngwuci, “Yüllïnä ndi ari, ‘Aaꞌti nga gwa ïdäjï Delenya diru Ngwaalu ngwunga.’”
13 Anni ma dijegoꞌrr medaji ïdäjïng Yicung ngwujaꞌri ngwee ꞌdar, ngwugatani ngwele ꞌdi a gaji ila giꞌter.
A ngwüjï ꞌdonya Yicung Najra
(Mätä 13.53–58; Murkuj 6.1–6)
14 A Yicu kwodalu ngwila Jälïl gwonyadu gu yiima yidi Lïgïꞌrïm lidi Ngwaalu a ngwüjï ngwaalu ngwoo ꞌdar ꞌdingini nginde gwe.
15 Ating enggaci ngwüjü ngwujaꞌri ngwudi Ngwaalu ngwämrä, ati ngwüjï ꞌdar ortada.
16 A Yicu ꞌdïꞌrï ngwele kündär ganni gïꞌrünäär gu gani Najra. Komon ganni giru Kwoꞌra täꞌrïl, ngwele ngwänï ngwämrä anaku äbräjïng gu.Ngwüdünälä nunnu ngwuli gitab gidi Ngwaalu.
17 Aar ätädä gitab gidi Ngwaalu ganni gullu dïjïr dani Ajaya. Anni mung ngiral gitabanu, ngwumbuji ngwujaꞌri ngwanni ngwaru nu,
18 “Lïgïꞌrïm lidi Ngwaalu gilo ꞌdünggüny,
gwuminy äbrï nyi ondaci ngwuwaya
ngwujaꞌri ngwanni ngwujaw.
Ngwaalu ngwükäjïny ndi nyi ondaci ngwüjü ngwanni ngwugekanalu aar gätïnï linginalu
na ngwanni ngwürïmü ngwäy aar uꞌri ngwäy,
na ngwanni ngwärrïnä yïnädä, nje äbräjï,
19 na nyi urnidi ngwüjü nje enggaci ndi ari
gaji gidi Ngwaalu gima ila ganni gading ge enggaci ngwüjü yïmïꞌrä yüngün.”
20 Ngwülängïtï gitab ngwätädä dïnädä ngwüllï ngwujalu. A ngwüjï ꞌdar ngwoo ngwuju ngwämrä ombaji jicom,
21 ngwuje ci, “Gwene yima mbuti yanni yüllïnä yima je ꞌdingini ngwänï ngwe ngwalu.”
22 Ngwüjï ꞌdar aar gwe ondaji yiꞌral yijaw a je ngwe ngwaalu elalu gwani ngwujaꞌri ngwüngün ngwanni ngwuru yïmïꞌrü ngwati ꞌtüdä ngwulemanu ngwüngün. Ati aar utalu aar ari nu, “Gïjï nggee gäꞌtüdï mene gidi Yüjïbe?”
23 A je Yicu ci nu, “Nga nga ladiny äpïjä mïꞌrïng ngwujaꞌri ngwee ngwaru nu, ‘Dima, apana yiima giligoꞌro lunga.’ Ärrä yiꞌral ngene ꞌdunu kündär gunga yanni yiꞌdingini nje yärrä je ngenone Kaprnawum.”
24 A je Yicu ci nu, “ꞌDiꞌdidanu nggwa je ci, dïjïr dere daꞌti dati aar ämnï ꞌdunu kündär güngün.
25 Nggwa je enggaci ꞌdidanu ndi ari luubu kaji gidi dïjïr dani Ïlïyä, ngwedel ngwuju ngwonyadu ken gidi Yïjïräyïl. Anni dünü gere ndi ne ngwüdläyü täꞌrïl na ngwüüwä nyärläl a drü ji dipa ngwaalu ꞌdar,
26 aaꞌti be Ngwaalu ükäjä Ïlïyäng gïdïjï dere, ngwube ükäjï ngwuꞌdun ngwudi dedel kündär gani Jarbad gito gito kündär gani Jäyïdä.
27 Na ngwüjï ngwonyadu luubu Yïjïräyïl ngwümätï je yaamu gaji ganni giju ge dïjïr dani Älïjä. Aar ꞌti uꞌriya dïjï nono dere aar be uꞌriyi guru nono ꞌdogo gani Noman gwudi gen gani Jürïyä.”
28 Anni ma gu ngwüjï ngwanni ngwuju ngwämrä ꞌdingini no, aar kanu gwulleny
29 aar ꞌdïꞌrï aar määtä Yicung aar gwe ele poor ꞌdi aar gwe ombani ngwüjärmädï ngwudi gen ganni godana gu gündärälä gegen, aar mïnï ndi gatu ngwüllï kimbar.
30 Ngwube ꞌtädä gidiliganu ngwüjänü ngwonyadu ngwele gay ge güngün.
A Yicu ꞌtüyï dïꞌrïllä gïdïjänü
(Murkuj 1.21–28)
31 A Yicu üllï kündär gani Kaprnawum ngwaalu ngwani Jälïl, ngwenggaci ngwüjü ngwujaꞌri ngwudi Ngwaalu komon ganni ru Kwoꞌra täꞌrïl.
32 A ngwüjï dibi ngwujaꞌri ngwüngün ndi ari gwondaja yiima ye yidi Ngwaalu.
33 Ngwämrä, gur geꞌte giju gu ganni gätïnä dïꞌrïllä nono ngwürrï dula gwulleny
34 ngwuci Yicung, “Äjï garang ganni gäpädängä ꞌdänggärï kaji nggee gwani Yicu gwudi Najrang? Nga gwïndädï be ndi nje ꞌrinye? Nggwülïngïdängä ndi ari nga gwani yärü. Nga gwuru gwanni Gwujuꞌru gwükäjä Ngwaalu!”
35 A Yicu girinya ngwuci, “Gwugwundu! ꞌTüdï ꞌdünggüngünänü!” A dïꞌrïllä ïꞌdïyï guru ngwäyänü ngwegen ꞌdar, ngwüꞌtü ngwuꞌti akana nono.
36 Anni ma ngwüjï engga yiꞌral giyee, aar dibi aar otajidalu ndi ari, “Ngwujaꞌri ngwuru ange ngwee? Nginde gwätï yiima ngwätï yelenya ndi girinya ngwüꞌrïllä ati aar ꞌtü.”
37 A ngwujaꞌri ngwani Yicu badalu ngwaalu ngwoo ꞌdar.
A Yicu uꞌriyi ngwüjü nono ngwonyadu
(Mätä 8.14–17; Murkuj 1.29–34)
38 A Yicu gatani ngwämrä ngwele ngwuꞌdun gwudi Jamaan, kaji nggoo nanni gwüngün gwuru düünä gwübüdü nono a ngwüjï ondaci Yicung nunnu ngwuꞌriyi nono.
39 No, ngwele ngwüdünäcälä ngwugirinya büdïng nono a nginde jïlädï ngwuꞌri nono. Ngwüꞌdïꞌrälü kaji geꞌte geꞌte ngwuje äpïjï yiiru.
40 Anni ma lingen ji ndi üllï, a ngwüjï äpïjä Yicung ngwüjü ꞌdar ngwanni ngwümä dümdänü rung rung, ngwuje alliji guy nono lere lere ꞌdar ngwuje uꞌriyi nono.
41 Mana ngwüꞌtüyï ngwüꞌrïllä ngwonyadu ngwüjänü aar ürrï dula aar ci, “Nga gwuru Gïjï gidi Ngwaalu!” A je be Yicu girinya ngwuje ꞌti gäbïcä ndi ondaji nunnu ngwülïngïdï ndi ari nginde gwuru gwanni Gwubrutaar yelenya.
A Yicu ondaci ngwüjü ngwämrä kobo
(Murkuj 1.35–39)
42 Dilu danu, a Yicu ꞌtü ngwele poor ngwaalu ngwüjïnälü. A ngwüjï ji ndi mïnï. Anni ma aar ila ngwaalu ngwoo ngwujung gu, aar mïnï ndi ari aaꞌti ling je gatani.
43 Ngwuje be ci nu, “Nggwadi ele ndi ondaci ngwüjü ngwudi yündär yiꞌter ngwujaꞌri ngwudi yeleny yidi Ngwaalu ꞌto. Yiru yanni yükäjäär nje gu Ngwaalu.”
44 Ating ji ndi ondaci ngwüjü ngwujaꞌri ngwudi Ngwaalu ngwämrä ngwaalu ngwani Yäwüdïyä.