2
Lïngïnï gwudi Yicu
(Mätä 1.18–25)
1 Kaji nggoo, a deleny didi ngwelenyinga dani Uguctuj Gayijar Ruma ꞌtüyä ngwujaꞌri ngwondaci ngwüjü ꞌdar giyen yanni yïmätïng gu yelenya ndi ari aar je ïꞌrä ꞌdar.
2 Ïꞌrä nggwee gwuru gwanni gwuru giꞌra, anni mätï deleny dani Kurunij yelenya ken gani Jürïyä.
3 A Ngwüjï ꞌdar ele ndi aar je ülläjï ngwürïny gïyündär yegen.
4 No a Yüjïb ꞌdïꞌrï ngwugatani gündärä gani Najra gidi Jälïlïng. Aar allu kündär gani Bidilam ngwaalu ngwani Yäwüdïyä, kündär ganni gïlïngïtäär gu delenya diru dïgüürnä didi Yüjïb dani Däwüd.
5 Aar ele Märïyäm gwe gwanni gwadi ru daw düngün aar elada ndi aar je ülläjï ngwürïny ngwegen. Nginde gwani Märïyäm gwuju lari le.
6 Anni ma aar ji Bidilam, a gaji ila gading ge lenge.
7 Ngwulingeta gïjü gwüngün giru giꞌra ngwüpä ngwureda nono ngwundriyalu kigoganu gidigaaranu. Anaku aaꞌti gu ngwaalu ju ngwuꞌdun ndi aar gu üllälü.
Ngwooꞌra ngwudi ngwangal na yïꞌrr
8 Ngenone, ngwooꞌra ngwati iye ngwangala aar ji ndi arngaci ngwangala ngwegen dilunga ndoo.
9 A gïꞌrr gidi Deleny ila ngwuje ꞌtäcälü ngwuje oꞌrralu yiima ye yidi Deleny. A je yedeny eny gwulleny.
10 A je be gïꞌrr ci nu, “Aaꞌti yedeny ya je eny! Äny nggwo gwäpïjä je ngwujaꞌri ngwanni ngwujaw, ngwanni ngwadi gäbïcï ngwüjü ꞌdar aar jayanu gwulleny.
11 Gwene kündär gidi Däwüd, lima je lïngïjä ngindeng gwanni gwuru Gilang, gwanni Gwubrutaar yelenya gwuru Deleny.
12 A giꞌremna giru nggee ganni gada je enggaci. Ngaa la mbuji gïjü gïpädäär ngwureda nono gindriyaralu kigoganu gidigaaranu.”
13 No, a yïꞌrr ꞌtädälü yonyadu yidi gerala aar acajidi ndi ortada Ngwaalinga aar ari,
14 “A Ngwaalu näjïnï ꞌtuꞌtu kerala,
a adatalu ji gïdïyängälü ngwüjï ngwanni ngwämnä je Ngwaalu.”
15 Anni ma yïꞌrr oꞌre kerala, a ngwooꞌra ngwudi ngwangal ari, “Ilar ar ele Bidilam ar ombaja yiꞌral giyee yima aar nje ye Deleny ci.”
16 No, aar gu eladanu aar mïnälü aar mbuji Märïyämïng je Yüjïb gwe aar engga gïjü gindralu kigoganu.
17 Anni ma ngwooꞌra engga gïjü, aar je ondaci yiꞌral yanni yaru ye gïꞌrr kïjï.
18 ꞌDar lanni lima ꞌdingini yiꞌral yanni yaru ye ngwooꞌra ngwudi ngwangal, a je le ngwaalu elalu.
19 Aꞌti Märïyäm geꞌte yiꞌral giyee ꞌdar giligoranu lüngün ati ngwuje ïrïyï ngwäy nono.
20 A ngwooꞌra ngwudi ngwangal oꞌra aar näjä Ngwaalinga aar je ortada giyiꞌral ꞌdar yanni yima aar je ꞌdingini aar je engga yima gu ätï ngwäyänü anaku ca je gu gïꞌrr.
Aar ele Yicung gwe kobo
21 Anni ma gomon ele ngwuru ꞌdübä (8), ganni gadi aar ge üꞌrïdä gïjü, aar ätä ngwürïny aar ci Yicu, ngwürïny ngwanni ngwuca ngwe gïꞌrr Märïyämïng gwerre nding ji lari le.
22 A gaji ila gidi gomon gidi ape dïmürä didi ꞌtälü gïdrü anaku ondaja gu yobo yanni yätädï je Ngwaalu Müjäng. Yüjïbïngä Märïyäm gwe aar apada Yicung kobo Üräjälïm ndi aar äpïjï dïmürä didi pï käy ndi inggidi ndi ari giru gidi Ngwaalu.
23 Anaku üllïnäär gu giyobo yidi Deleny ndi ari, “ꞌDar yanni yiru yiꞌra yiru ngwur, aar äbrïnï aar juꞌri aar ru yidi Deleny.”
24 Na ꞌto aar mïꞌrïnï nono amaam gwe rom anaku aru gu yobo yidi Deleny.
25 Gaji ge nggoo, gur geꞌte giju Üräjälïm gani Jamaan ganni gïdünälü ngwudenya Ngwaalinga ngwuji ndi dünïcï gilanging gwudi Yïjïräyïl. A gu Lïgïꞌrïm ji lanni Lijuꞌru,
26 a Lïgïꞌrïm enggaci yïjïrä giligoranu ndi ari gwaꞌti gwa ayi ꞌdi ngwenggani ngindeng gwanni Gwubrutaar yelenya gwaru gwe Deleny diru Ngwaalu.
27 A Lïgïꞌrïm oda ngwänïjï ngwämrä kobo. Anni ma Yüjïbïngä Märïyäm gwe apa Yicung aar gwe änï ndi äpïjï dïmürä anaku aru gu yobo,
28 a Jamaan ape gïjü ngwuyala ngwugeꞌte kiꞌruundu güngün ngwortada Ngwaalinga ngwari,
29 “Gwani Deleny düny, gwene ngwujaꞌri ngwunga ngwanni ngwara ngwe ngwuma mbuti,
gäbïcïny be gwuru dïnäd dunga nyi ayi gwadatalu.
30 Äny gwuma engga gilang gwunga ngwäy ngwe ngwüny
31 gwanni gwuma ang, jaꞌrimada ngwäyänü ngwüjï ꞌdar.
32 Gwuru buri gwunga ndi ꞌtäcï ngwüjälü ngwanni ngwuru Garany buping gwunga.
A ngwenggaci ngwüjü ngwüngün ngwudi Yïjïräyïl ndi ari gwuru näjï gwunga ꞌdenggen.”
33 A Yüjïbïngä Märïyäm gwe, a je le ngwaalu elalu giyiꞌral yanni yima ye Jamaan ondijaji kïjï.
34 A je Jamaan onjaci ngwuci nanning gwudi Yicu gwani Märïyäm nu, “Gïjï nggee gegeꞌta Ngwaalu ndi ari ga gäbïcï ngwüjü ngwonyadu ngwudi Yïjïräyïl ngwa obalu a ngwonyadu ngwa mätïnälü. Übïnälü ngindeng gwa ru giꞌremna
35 a nginde gwa ꞌtäjï yigoralu yidi ngwüjï ngwonyadu. A be nga gwani Märïyäm, runi gwupa gwa ji ꞌdunggunga gwa gäbïcï ligor lunga la ru nono ma aar üꞌrü galal ge.”
36-37 A daw deꞌte dani Anna diru dïmäyïn ngwuru dedel ngwuru ꞌto dïjïr, diru gera gidi gur gani Panwil giru gïïlü gidi Äcïr. Dägïnä aar ji dur de düngün ngwüdläyü kwoꞌra täꞌrïl (7), ngwube ru dedel ꞌdi ngwobani ngwüdläyü ꞌdï ꞌdübä na kwoꞌrongo (84). Dati ꞌti gataca gobo gidi Ngwaalu giꞌra ꞌter, ndi äpïjï Ngwaalu yobo lingen le a dilu de, ati ngwümäätä ngwädä ati ngwotaci Ngwaalingalu.
38 Ngwila gaji ge nggoo geꞌte geꞌte ngwuci Ngwaalinga yäy ꞌtu, ngwondaci ngwüjü ꞌdar gïjï ge ngwanni ngwüdünïcä Ngwaalinga ndi üꞌrä ngwüjälü ngwudi Üräjälïmïng.
39 Anni ma Yüjïbïngä Märïyäm gwe medaji apeng dïmürä ꞌdar anaku bupa gu yobo yidi Deleny, aar oꞌra ꞌdunu kündär gani Najra ngwaalu ngwani Jälïl.
40 A gïjï pe ngwojeme nono gïlïgïꞌrïm, ngwätï bebereng gwupa, ngwujayi Ngwaalinga ngwäy.
A Yicu ji kobo
41 Ngwüdlä ngwüdlä, papanga lidi Yicu lati ele kündär gani Üräjälïm ndi ape yïꞌrïnyïnä yidi Dambdani.
42 Anni ma Yicu ätï ngwüdläyü ꞌdï na rom (12), aar allu anaku ati aar gu allu gïyïꞌrïnyïnä giyoo.
43 Anni ma yïꞌrïnyïnä medada, aar ꞌdïꞌrïꞌtä aar oꞌrada ꞌdunu, a be Yicu ꞌdonyadalu gwodan Üräjälïm. A gu ꞌti papanga lüngün lïngïdï.
44 Aar ji ndi ari nggwo gwïndäär le, no aar ila gangin gangin. Aar be gwurlalu aar gwe otaci ngwüjälü ngwegen a ngwumadanu ngwegen.
45 Aar ꞌti mbuju, aar oꞌre Üräjälïm ndi mïnä.
46 Bïgï nggwoo aar mbuji ngwämrä kobo aar ji ndi jalu ngwoortanga le ngwudi yobo nding je geraji länï ngwuje otacalu.
47 A ngwaalu elalu ngwüjï ꞌdar ngwanni ngwuꞌdingina ngindeng ndi bebere gwüngün ma aar otacalu.
48 Anni ma aar engga, a je le ngwaalu elalu. A nanni gwüngün gwani Märïyäm ci nu, “Gwani gïjï güny, ange gwuru nje gu be ärrï no? Änggädï nje ꞌdi mbumbu gwe gwunga ïcï nje gu dïrbä ndi ar ang mïnï.”
49 Ngwuje be ci nu, “Ange gwuru nyii be mïnï, ngaa laꞌti lïngïdï ndi ari nggwadi ji kobanu gidi Mbumbu gwünye?”
50 Ngindenga aar ꞌti lïngïdï ndi ari gwaraa.
51 No, a Yicunga oꞌra papanga le lüngün aar üllä Najra, ngenone ati ngwuje ꞌdengenaci. A nanni gwüngün gwani Märïyäm ïrïyï ngwäyälü giyiꞌral giyee ꞌdar giligoranu lüngün.
52 A Yicu pe gilingeno na ndi bebere, ngwujayi ngwäy Ngwaalu na ngwüjï.