15
यहूदा को गोत्र ख दियो गयो हिस्सा
1 यहूदा कुल को लोगों ख उन्को परिवारों की संख्या को अनुसार चिट्ठी डालन पर एदोम की सीमा मिली,
जो दक्षिन को तरफ सीन को जंगल तक दक्षिन सीमा पर हय।
2 उन्को भाग की दक्षिनी सीमा मृत सागर को छोर सी सुरूवात भयी जो दक्षिन को तरफ बढ़य हय;
3 अऊर अक्रबीम नाम की चढ़ायी को दक्षिन को तरफ सी निकल क सीन होतो हुयो कादेशबर्ने को दक्षिन को तरफ पहुंच गयी, फिर हेस्रोन को जवर सी अद्दार ख पहुंच क कर्का को तरफ मुड़ गयी,
4 वहां सी अम्मोन होतो हुयो वा मिस्र को नाला पर निकली, अऊर वा सीमा को अन्त भूमध्यसागर भयो। यो यहूदा कुल की दक्षिनी सीमा होती।
5 फिर पूर्व दिशा की सीमा को किनार तक खारो तलाव हय,
अऊर उत्तर दिशा की सीमा यरदन को किनार को जवर को तलाव की खाड़ी सी शुरू कर क्,
6 बेथोग्ला ख चढ़तो हुयो बेतराबा की उत्तर को तरफ होय क रूबेन को टुरा बोहन नाम की चट्टान तक चली गयी;
7 अऊर वाच सीमा आकोर नाम की घाटी सी दबीर को तरफ पहुंची, अऊर उत्तर दिशा होतो हुयो गिलगाल को तरफ मुड़ी जो घाटी को दक्षिन को तरफ को अदुम्मीम की चढ़ायी को सामने हय; वहां सी वा एनशेमेश नाम को झरना को जवर पहुंच क एनरोगेल घाटी पर निकली;
8 फिर वाच सीमा बेन-हिन्नोम घाटी सी होय क यबूस जो यरूशलेम कहलावय हय अऊर दक्षिन को तरफ सी चढ़ती हुयी वा पहाड़ी की ऊचायी पर पहुंची, जो पश्चिम को तरफ हिन्नोम की घाटी को सामने अऊर रपाईम की घाटी को उत्तर वालो आखरी छोर पर हय;
9 फिर वाच सीमा ऊ पहाड़ी की ऊचायी सी नेप्तोह नाम को झरना पर पहुंची, अऊर एप्रोन पहाड़ी को नगरों पर निकली; फिर वहां सी बाला ख जो किर्यत्यारीम भी कहलावय हय पहुंची;
10 फिर सीमा बाला सी पश्चिम को तरफ मुड़ क सेईर पहाड़ी तक पहुंची अऊर यारीम पहाड़ी जो कसालोन भी कहलावय हय ओको उत्तर दिशा को तरफ सी होय क बेतशेमेश पर उतर गयी, अऊर वहां सी तिम्ना पर निकली;
11 वहां सी वा सीमा एक्रोन को उत्तर दिशा को जवर सी होतो हुयो शिक्करोन गयी, अऊर बाला पहाड़ी होय क यब्नेल पर गयी; अऊर वा सीमा को अन्त महासमुन्दर पर भयो।
12 अऊर पश्चिम की सीमा महासमुन्दर को किनार ठहरी। यहूदा ख जो हिस्सा उन्को कुलों को अनुसार मिल्यो ओको चारयी तरफ की सीमा याच भयी।
कालेब की हेब्रोन अऊर दबीर पर जीत
(न्यायियों 1:11-15)
13 अऊर यपुन्ने को टुरा कालेब ख यहोशू न परमेश्वर की आज्ञा को अनुसार यहूदियों को बीच म हिस्सा दियो, मतलब किर्यतर्बा जो हेब्रोन भी कहलावय हय ऊ अर्बा अनाक को बाप होतो।
14 अऊर कालेब न वहां सी शेशै, अहीमन, अऊर तल्मै नाम को, अनाक को तीनयी टुरावों ख निकाल दियो।
15 फिर कालेब न दबीर को निवासियों पर हमला करयो; दबीर को पुरानो नाम किर्यत्सेपेर होतो।
16 अऊर कालेब न कह्यो, “जो किर्यत्सेपेर ख हराय क ओख अपनो अधिन कर लेयेंन ओको सी मय अपनी टुरी अकसा को बिहाव कर देऊं।”
17 तब कालेब को भाऊ कनजी को टुरा ओत्नीएल न ऊ नगर पर अधिकार कर लियो; अऊर ओन ओको सी अपनी टुरी अकसा को बिहाव कर दियो।
18 जब वा ओत्नीएल को जवर आयी, तब ओन अकसा ख बाप सी कुछ जमीन मांगन ख कह्यो, वा कालेब को जवर गयी जब वा गधा पर सी खल्लो उतरी, तब कालेब न ओको सी पुच्छ्यो, “तय का चाहवय हय?”
19 वा बोली, “मोख आशीर्वाद दे; तय न मोख दक्षिन देश म की कुछ जमीन त दे दी हय, मोख पानी को सोता भी दे।” तब ओन ऊपर अऊर खल्लो को सोता दोयी ओख दे दियो।
यहूदा कुल को नगर
20 यहूदियों को कुल को हिस्सा त उन्को कुलों को अनुसार योच ठहरयो।
21 यहूदा कुल को नगर दक्षिन देश म एदोम की सीमा को तरफ हि आय, कबसेल, एदेर, यागूर,
22 कीना, दीमोना, अदादा,
23 केदेश, हासोर, यित्नान,
24 जीप, तेलेम, बालोत,
25 हासोर्हदत्ता, करिय्योथेस्रोन, जो हासोर भी कहलावय हय,
26 अऊर अमाम, शमा, मोलादा,
27 हसर्गद्दा, हेशमोन, बेत्पालेत,
28 हसर्शूआल, बेर्शेबा, बिज्योत्या,
29 बाला, इय्यीम, एसेम,
30 एलतोलद, कसील, होर्मा,
31 सिकलग, मदमन्ना, सनसन्ना,
32 लबाओत, शिल्हीम, ऐन, अऊर रिम्मोन; गावों सहित सब नगरों की संख्या उनतीस हय।
33 खल्लो को देश म स्थित नगर : एशताओल, सोरा, अशना,
34 जानोह, एनगन्नीम, तप्पूह, एनाम,
35 यर्मूत, अदुल्लाम, सोको, अजेका,
36 शारैम, अदीतैम, गदेरा, अऊर गदेरोतैम; हि सब गांव सहित सब नगरों की संख्या चौदा हंय।
37 फिर सनान, हदाशा, मिगदलगाद,
38 दिलान, मिस्पे, योक्तेल,
39 लाकीश, बोस्कत, एग्लोन,
40 कब्बोन, लहमास, कितलीश,
41 गदेरोत, बेतदागोन, नामा, अऊर मक्केदा; हि गांव सहित सब नगरों की संख्या सोला हंय।
42 फिर लिब्ना, ऐतेर, आशान,
43 यिप्तह, अशाना, नसीब,
44 कीला, अकजीब, अऊर मारेशा; हि गांव सहित सब नगरों की संख्या नव हंय।
45 फिर नगरों अऊर गांवो सहित एक्रोन,
46 अऊर एक्रोन सी ले क महासमुन्दर तक, अपनो अपनो गांवो समेत जितनो नगर अशदोद को तरफ हंय।
47 फिर अपनो अपनो नगरों अऊर गांवो समेत अशदोद, अऊर अज्जा, बल्की मिस्र को नाला तक अऊर महासमुन्दर को किनार तक जितनो नगर हंय।
48 पहाड़ी देश म हि हय : शामीर, यत्तीर, सोको,
49 दन्ना, किर्यत्सन्ना जो दबीर भी कहलावय हय,
50 अनाब, एशतमो, आनीम,
51 गोशेन, होलोन, अऊर गीलो; हि गांवो सहित सब नगरों की संख्या ग्यारा हंय।
52 फिर अराब, दूमा, एशान,
53 यानीम, बेत्तप्पूह, अपेका,
54 हुमता, किर्यतर्बा जो हेब्रोन भी कहलावय हय, अऊर सीओर गांवो सहित सब नगरों की संख्या नव हंय।
55 फिर माओन, कर्मेल, जीप, यूता,
56 यिज्रेल, योकदाम, जानोह,
57 कैन, गिबा, अऊर तिम्ना; गांवो समेत सब नगरों की संख्या दस हंय।
58 फिर हलहूल, बेतसूर, गदोर,
59 मरात, बेतनोत, अऊर एलतकोन; हि गांवो समेत सब नगरों की संख्या छय हंय।
60 फिर किर्यतबाल जो किर्यत्यारीम भी कहलावय हय, अऊर रब्बा; हि गांव समेत दोय नगर हंय।
61 जंगल म हि नगर हंय : बेतराबा, मिद्दीन, सकाका;
62 निबशान, लवन नगर, अऊर एनगदी, हि गांवो समेत छय नगर हंय।
63 यरूशलेम को निवासी यबूसियों ख नहीं निकाल सक्यो; येकोलायी अज भी यबूसी यहूदियों को संग यरूशलेम म रह्य हंय।