14
यरदन को पश्चिमी भाग को बंटवारा
1 जो जो हिस्सा इस्राएलियों ख कनान देश म मिल्यो, जिन्ख एलीआजार याजक, अऊर नून को टुरा यहोशू, अऊर इस्राएली गोत्र को पूर्वजों को घराना को मुख्य मुख्य आदमियों न उन्ख दियो हि यो आय।
2 जो आज्ञा परमेश्वर न मूसा को द्वारा साढ़े नव गोत्रों लायी दी होती, उन्को अनुसार उन्को हिस्सा चिट्ठी डाल क दियो गयो।
3 मूसा न त ढायी गोत्रों को हिस्सा यरदन को पार दियो होतो; पर लेवियों ख ओन उन्को संग कोयी हिस्सा नहीं दियो होतो।
4 यूसुफ को वंश को दोय गोत्र होतो, मतलब मनश्शे अऊर एप्रैम; अऊर ऊ देश म लेवियों ख कुछ हिस्सा नहीं दियो गयो, केवल रहन लायी नगर, अऊर जनावर अऊर धन रखन लायी चराइयां उन्ख दी गयी।
5 जो आज्ञा परमेश्वर न मूसा ख दी होती ओको अनुसार इस्राएलियों न करयो; अऊर उन्न देश ख बाट लियो।
हेब्रोन नगर कालेब ख दियो जानो
6 तब यहूदी लोग यहोशू को जवर गिलगाल म आयो; अऊर कनजी यपुन्ने को टुरा कालेब न ओको सी कह्यो, “तय जानत होना कि परमेश्वर न कादेशबर्ने म परमेश्वर को सेवक मूसा सी मोरो अऊर तोरो बारे म का कह्यो होतो।
7 जब परमेश्वर को दास मूसा न मोख यो देश को भेद लेन लायी कादेशबर्ने सी भेज्यो होतो तब मय चालीस साल को होतो; अऊर मय सच्चो मन सी ओको जवर सन्देश ले क आयो।
8 अऊर मोरो संगी जो मोरो संग गयो होतो उन्न त प्रजा को लोगों को मन निराश कर दियो, पर मय न अपनो परमेश्वर यहोवा की पूरी रीति सी बात मानी।
9 तब ऊ दिन मूसा न कसम खाय क मोरो सी कह्यो, ‘तय न पूरी रीति सी मोरो परमेश्वर यहोवा की बातों को अनुसरन करयो हय, यो तरह बिना सक जो जमीन पर तय पाय रख्यो हय ऊ हमेशा लायी तोरो अऊर तोरो वंश को हिस्सा होयेंन।’
10 अऊर अब देख, जब परमेश्वर न मूसा सी यो वचन कह्यो होतो तब सी पैतालीस साल भय गयो हय, जिन म इस्राएली लोग जंगल म भटकतो रह्यो; उन म परमेश्वर न अपनो वादा को अनुसार मोख जीन्दो रख्यो हय; अऊर अब मय पच्यासी साल को हय।
11 जितनी शक्ति मूसा को भेजन को दिन मोरो म होती उतनी शक्ति अभी भी मोरो म हय; युद्ध करन, यां बाहेर आन-जान लायी जितनी शक्ति ऊ समय होती उतनीच शक्ति अभी भी मोरो म हय।
12 येकोलायी अब ऊ पहाड़ी देश मोख दे जेकी चर्चा परमेश्वर न ऊ दिन करी होती; तय न त ऊ दिन सुन्यो होना कि ओको म अनक वंशी रह्य हंय, अऊर बड़ो बड़ो गढ़ वालो नगर भी हय; यदि परमेश्वर मोरो संग रहे, त ओकी प्रतिज्ञा को अनुसार मय उन्ख उन्को देश सी निकाल देऊं।”
13 तब यहोशू न ओख आशीर्वाद दियो; अऊर हेब्रोन नगर यपुन्ने को टुरा कालेब ख हिस्सा दे दियो।
14 यो वजह हेब्रोन नगर कनजी यपुन्ने को टुरा कालेब को हिस्सा अज तक बन्यो हय, कहालीकि इस्राएल को परमेश्वर यहोवा को पूरी रीति सी अनुसरन करयो होतो।
15 पहले हेब्रोन नगर को नाम किर्यतर्बा होतो; ऊ अर्बा नाम को व्यक्ति अनाकियों म सब सी बड़ो आदमी होतो। अऊर युद्ध खतम होन को बाद ऊ देश ख शान्ति मिली।