27
होमबलि की वेदी
(निर्गमन ३८:१-७)
1 परमेश्वर न मूसा सी कह्यो, “तब वेदी ख बबूल की लकड़ी सी, पाच हाथ लम्बी अऊर पाच हाथ चौड़ी बनायजो; वेदी चौकोन हो, अऊर ओकी ऊंचायी तीन हाथ की हो।
2 अऊर ओको चारयी कोनो पर चार सींग बनायजो; हि ओको सहित एकच तुकड़ा को हो, अऊर ओख पीतल सी मढ़वायजो।
3 अऊर ओकी राख उठान को सुपड़ी, अऊर पावड़ा, अऊर कटोरा, अऊर दोय दाती पावड़ा, अऊर आगी सामान बनायजो; ओको सब सामान पीतल को होना।
4 ओको लायी पीतल की एक जाली बनायजो; अऊर ओको चारयी कोनो पर पीतल को चार कड़ा लगवायजो।
5 अऊर वा जाली ख वेदी को चारयी तरफ की मेज को नीचो असो लगवायजो कि ऊ वेदी की ऊचायी को बीच तक पहुंच्यो।
6 अऊर वेदी लायी बबूल की लकड़ी को डन्डा बनायजो, अऊर उन्ख पीतल सी मढ़वाजो।
7 अऊर डन्डा ख कड़ों म असो डाले कि जब वेदी उठायी जाये तब हि ओको दोयी किनार पर रह्य सके।
8 वेदी ख तक्तों सी खोखली बनवायजो; जसी ऊ पहाड़ी पर तोख दिखायो होतो वसोच बनवाजो।”
पवित्र तम्बू को आंगन
(निर्गमन ३८:९-२०)
9 “फिर निवास को आंगन ख बनायजो। ओको दक्षिन की तरफ लायी पतलो धागा बिन्यो हुयो कपड़ा को परदा हो, ओकी लम्बायी सौव हाथ की होय; एक किनार पर इतनोच हो।
10 अऊर उन्को लायी बीस खम्बा बनेंन, अऊर इन्को लायी पीतल की बीस तक्ता होना, अऊर खम्बा को कुन्दा अऊर उन्की पट्टियां चांदी की होना।
11 अऊर उच तरह आंगन को उत्तर की तरफ की लम्बायी म भी सौ हाथ लम्बो परदा होना, अऊर उन्को लायी भी बीस खम्बा अऊर इन्को लायी भी पीतल को बीस खाना होना; अऊर उन खम्बों को कुन्दा अऊर पट्टियां चांदी की होना।
12 फिर आंगन की चौड़ायी म पश्चिम की तरफ पचास हाथ को परदा हो, उन्को लायी खम्बा दस अऊर खानो भी दस हय।
13 पूर्व की तरफ आंगन की चौड़ायी पचास हाथ की होना।
14 आंगन को फाटक की एक तरफ पन्द्रा हाथ को परदा हय, अऊर उन्को लायी खम्बा तीन अऊर खाना तीन होना;
15 अऊर दूसरी तरफ भी पन्द्रा हाथ को परदा हो, उन्को लायी भी खम्बा तीन अऊर खाना तीन होना।
16 आंगन को फाटक लायी एक परदा बनायजो, जो नीलो, जामुनी अऊर लाल रंग को कपड़ा अऊर पतलो बुन्यो हुयो सूती कपड़ा सी बन्यो होयेंन, ओको लायी खम्बा चार अऊर खाना भी चार होना।
17 आंगन को चारयी तरफ को सब खम्बां चांदी की पट्टियां सी जुड़्यो हुयो हो, उन्को कुन्दा चांदी को अऊर खाना पीतल को हो।
18 आंगन की लम्बायी सौ हाथ की अऊर ओकी चौड़ायी सब जागा पचास हाथ की हो, ओको परदा की ऊचायी पाच हाथ की हो, तब ऊ पतलो बुन्यो हुयो सूती कपड़ा सी बन्यो हो, खम्बों को खाना पीतल को होना।
19 निवास जागा को अलग अलग तरह को बर्तन अऊर सब सामान अऊर ओको सब खूटा अऊर आंगन को भी सब खूटा पीतल को हो।
दीया लायी देख-भाल
(लैव्यव्यवस्था २४:१-४)
20 “तब तय इस्राएलियों ख आज्ञा देजो, कि मोरो जवर दीया लायी पीस क निकाल्यो हुयो जैतून को शुद्ध तेल ले आजो, जेकोसी दीया हमेशा जलतो रहेंन।
21 परमेश्वर को उपस्थिति को तम्बू म, उच बीच वालो परदा सी बाहेर जो साक्षी चिट्ठी को आगु होयेंन, हारून अऊर ओको टुरा दीया शाम सी सुबेरे तक परमेश्वर को आगु सजाय क रखो। या विधि इस्राएलियों की पीढ़ियों लायी हमेशा बन्यो रहेंन।”