1 “तब तय इस्राएलियों म सी अपनो भाऊ हारून, अऊर नादाब, अबीहू, एलीआजार अऊर ईतामार नाम को ओको टुरावों ख अपनो जवर ले आजो कि हि मोरो लायी याजक को काम करेंन। 2 अऊर तय अपनो भाऊ हारून लायी वैभव अऊर शोभा को लायी पवित्र कपड़ा बनाजो। 3 अऊर जितनो बुद्धि वालो कारागिर हय, जिन्ख मय न बुद्धि देन वाली आत्मा सी परिपूर्न करयो हय, उन्को तय हारून को कपड़ा बनान की आज्ञा दे कि ऊ मोरो लायी याजक को काम करन लायी पवित्र बनो। 4 जो कपड़ा उन्ख बनानो होयेंन हि यो हंय, मतलब सीनाबन्द, अऊर एपोद पोशाक, अऊर बागा, चारखाने को अंगरखा, फेटा अऊर कमर पट्टा; योच पवित्र कपड़ा तोरो भाऊ हारून अऊर ओको टुरावों लायी बनाये जाये कि हि मोरो लायी याजक को काम करेंन। 5 अऊर हि सोनो अऊर नीलो अऊर जामुनी अऊर लाल रंग को अऊर पतलो धागा सी बुन्यो हुयो कपड़ा ले।

6 “हि एपोद ख सोनो अऊर नीलो, जामुनी अऊर लाल रंग को कपड़ा को अऊर पतलो धागा सी बिन्यो हुयो कपड़ा बनाये, जो कि निपुनता सी बुनायी को काम करन वालो को हाथ को काम हो। 7 ऊ यो तरह सी जोड़्यो जाये कि ओको दोयी कन्धों को कोना आपस म मिल्यो रहेंन। 8 अऊर एपोद पर जो ओख पर निपुनता सी बुन्यो हुयो कमर पट्टा होयेंन, ओकी बनावट ओकोच समान हो, अऊर हि दोयी बिना जोड़ को हो, अऊर सोनो अऊर नीलो, जामुनी अऊर लाल रंग वालो अऊर पतलो धागा सी बुन्यो हुयो कपड़ा को हो। 9 फिर दोय सुलैमानी मनि ले क उन पर इस्राएल लोगों को टुरावों को नाम खुदवायजो। 10 उन्को नामों म सी छय एक मनि पर अऊर शेष छय नाम दूसरो मनि पर, इस्राएल को टुरावों की जनम को अनुसार खुदवायजो। 11 मनि खोदन वालो को काम को समान जसो छापा खोद्यो जावय हय, वसोच उन दोय मनियों पर इस्राएल लोगों को टुरावों को नाम मनि पर खुदवायजो; अऊर उन्को सोनो को खाना म जड़वाय देजो। 12 अऊर दोयी मनियों ख एपोद को कन्धों पर लगायजो, हि इस्राएलियों को याद दिलावन वाली मनि ठहरेंन; मतलब हारून उन्को नाम परमेश्वर को आगु अपनो दोयी कन्धों पर याद लायी लगायो रखेंन।

13 “तब सोनो को खाना बनायजो, 14 अऊर डोरियों को समान गूथ्यो हुयो दोय संकली शुद्ध सोनो को बनायजो; अऊर गूथ्यो हुयो संकलियों ख उन खाना म फसाय देजो।

15 “तब न्याय की चपरास ख भी बुनायी को काम को बनायजो, एपोद को समान सोनो, अऊर नीलो, जामुनी अऊर लाल रंग को अऊर पतलो धागा सी बिन्यो हुयो कपड़ा की ओख बनायजो। 16 ऊ चौकोन अऊर डबल हो, अऊर ओकी लम्बायी अऊर चौड़ायी एक एक बिल्लस की हो। 17 अऊर ओको म चार लायीन मनि जोड़जो। पहिली लायीन म त माणिक्य, पुखराज अऊर लालड़ी हो; 18 दूसरी लायीन म मरकत, नीलमनि अऊर हीरा : 19 तीसरी लायीन म लशम, सूर्यकान्त अऊर नीलम; 20 अऊर चौथी लायीन म फीरोज़ा, सुलैमानी मनि अऊर यशब हो; यो सब सोनो को खाना म जड़्यो जाये। 21 अऊर इस्राएल लोग को टुरावों को जितनो नाम हंय उतनो मनि हो, मतलब ओको नामों की गिनती को अनुसार बारा नाम खुदें, बारा वंशों म सी एक एक को नाम एक एक मनि पर असो खुद्यो जसो छाप खोद्यो जावय हय। 22 तब चपरास पर डोरियों को समान गूंथ्यो हुयो शुद्ध सोनो की संकली लगायजो; 23 अऊर चपरास म सोनो की दोय कड़ियां लगवायजो, अऊर दोयी कड़ियों ख चपरास को दोयी कोनो पर लगवायजो। 24 अऊर सोनो को दोयी गूंथ्यो संकली ख उन दोयी कड़ियों म जो चपरास* को कोनो पर होयेंन लगवायजो; 25 अऊर गूंथ्यो हुयो दोयी संकली को दोयी बाकी कोनो ख दोयी खानों म जड़वाय क एपोद को दोयी कन्धों को बन्धनों पर ओको आगु लगवायजो। 26 तब सोनो की दोय अऊर कड़ियां बनाय क चपरास को दोयी कोनो पर, ओकी उच कोना पर जो एपोद को अन्दर की तरफ होयेंन लगायजो। 27 तब उन्को सिवाय सोनो की दोय अऊर कड़ियां बनाय क एपोद को दोयी कन्धों को बन्धनों पर, नीचो सी ओको आगु अऊर ओको जोड़ को जवर एपोद को अच्छो सी बन्यो हुयो पट्टे को ऊपर लगवायजो। 28 अऊर चपरास अपनी कड़ियों को द्वारा एपोद की कड़ियों म नीलो फीते सी बान्धी जाये या रीति ऊ एपोद को काढ़यो हुयो अच्छो सी बिन्यो हुयो पट्टे झूलतो रहेंन, अऊर चपरास एपोद पर सी अलग नहीं होन पाये। 29 जब जब हारून पवित्र जागा म सिरयो करेंन, तब तब ऊ न्याय की चपरास पर अपनो दिल को ऊपर इस्राएलियों को नामों ख लगाये रहेंन, जेकोसी परमेश्वर को आगु उन्को याद हमेशा रहेंन। 30 ✡अऊर तय न्याय की चपरास म ऊरीम अऊर तुम्मीम† ख रखजो, अऊर जब जब हारून परमेश्वर को आगु आये, तब तब हि ओको दिल को ऊपर हो, यो तरह हारून इस्राएलियों लोगों लायी परमेश्वर को न्याय ख अपनो दिल को ऊपर हमेशा लगाये रहेंन।

31 “तब एपोद को पोशाक ख पूरो नीलो रंग को बनायजो। 32 ओकी बनावट असी हो कि ओको बीच म मुंड डालन लायी छेद हो अऊर ओको चारयी तरफ कपड़ा की कालर को जसी गोट बनायजो मतलब पोशाक को ऊ भाग फटनो नहीं पाये। 33 ओको खल्लो को घेरा म चारयी तरफ नीलो, जामुनी अऊर लाल रंग को कपड़ा को अनार जसो गोल बनायजो, अऊर ओको बीच चारयी तरफ सोनो को घन्टी लगवाना, 34 मतलब एक सोनो को घन्टी अऊर एक अनार, लगातार योच रीति सी पोशाक को खल्लो वालो घेरा म चारयी तरफ असोच होना। 35 अऊर हारून उच पोशाक ख याजक को काम करतो समय पहिने, कि जब जब ऊ पवित्र जागा को अन्दर परमेश्वर को आगु जायेंन यां बाहेर निकलेंन, तब तब ओको आवाज सुनायी दे, नहीं त ऊ मर जायेंन।

36 “शुद्ध सोनो की एक पट्टी बनाना, अऊर जसो मुहर म अक्षर खोद्यो जावय हय वसोच ओको पर ‘परमेश्वर लायी पवित्र अक्षर खोद्यो जाये।’ 37 अऊर ओख नीलो फीते सी बान्धजो; अऊर ऊ फेटा को आगु को भाग पर रहेंन। 38 ऊ हारून को मस्तक पर रहेंन, येकोलायी कि इस्राएली जो कुछ पवित्र ठहराये, मतलब जितनो पवित्र चीजो भेंट म चढ़ायो उन पवित्र चीजो को दोष हारून उठाये रहेंन, अऊर ऊ हमेशा ओको मस्तक पर रहेंन, जेकोसी परमेश्वर उन्को सी खुश रहेंन।

39 “अंगरखा ख महीन सूती को कपड़ा चारखाना वालो बनायजो, अऊर एक फेटा भी महीन सूती कपड़ा को बनायजो, अऊर रस्सी जसो बन्यो हुयो एक कमर बन्द भी बनायजो।

40 “तय हारून को टुरावों लायी भी कपड़ा अऊर कमर बन्द अऊर टोपियां बनायजो; यो कपड़ा भी वैभव अऊर शोभा लायी बनेंन। 41 अपनो भाऊ हारून अऊर ओको टुरावों ख योच सब कपड़ा पहिनाय क उन्को अभिषेक अऊर संस्कार करजो, अऊर उन्ख पवित्र करजो कि हि मोरो लायी याजक को काम करेंन। 42 अऊर उन्को लायी सन को कपड़ा की चड्डी बनाजो जिन्कोसी उन्को शरीर झक्यो रहेंन, हि कमर सी जांघ तक लम्बी हो; 43 अऊर जब जब हारून यां ओको टुरा मिलाप वालो तम्बू म सिरेंन, यां पवित्र जागा म याजक को काम करन को वेदी को जवर जाये, तब तब हि चड्डी ख पहिने रहेंन, नहीं त हि दोषी ठहरेंन अऊर मर जाये। यो हारून लायी अऊर ओको बाद ओको वंश लायी भी हमेशा कि विधि ठहरे।