39
राजा गोग की हार
1 फिर हे आदमी की सन्तान, राजा गोग को खिलाफ भविष्यवानी कर क् यो कह्य, हे राजा गोग, हे रोश, मेशेक अऊर तूबल नगर को मुखिया, परमेश्वर यहोवा यो कह्य हय : मय तोरो खिलाफ हय।
2 मय तोख घुमाय क ले आऊं, अऊर उत्तर दिशा को दूर दूर को देशों सी चढ़ाय क ले आऊं, अऊर इस्राएल को पहाड़ों पर पहुंचाऊं।
3 वहां मय तोरो धनुष तोरो बायो हाथ सी गिराय देऊं, अऊर तोरो बान ख तोरो दायो हाथ सी गिराय देऊं।
4 तय अपनो पूरो दलों अऊर अपनो संग की पूरी राज्यों समेत इस्राएल को पहाड़ियों पर मार डाल्यो जाजो; मय तोख अलग अलग को मांसाहारी पक्षियों अऊर जंगली जनावरों को आहार बनाय देऊं।
5 तय खेत म गिरजो, कहालीकि मयनच असो कह्यो हय, परमेश्वर यहोवा की या वानी हय।
6 मय मागोग नगर म अऊर द्वीपों म निडर रहन वालों को बीच आगी लगाय देऊं; अऊर हि जान लेयेंन कि मय परमेश्वर आय।
7 “मय अपनी प्रजा इस्राएल को बीच अपनो नाम प्रगट करूं; अऊर अपनो पवित्र नाम फिर अपवित्र होन नहीं देऊं; तब राज्य राज्य को लोग भी जान लेयेंन कि मय परमेश्वर, इस्राएल को पवित्र आय।”
8 या घटना होन वाली हय अऊर वा होय जायेंन, परमेश्वर यहोवा की या वानी आय। यो उच दिन आय जेकी चर्चा मय न करी हय।
9 “तब इस्राएल को नगरों को रहनवालो निकलेंन अऊर हथियारों म आगी लगाय क जलाय देयेंन, ढाल, अऊर फरी, धनुष, अऊर बान, लाठी, बरछा, सब ख हि सात साल तक हि जलातो रहेंन।
10 येको वजह हि मैदान म लकड़ी नहीं बीनेंन, नहीं जंगल म लकड़ी काटेंन, कहालीकि हि हथियारों खच जलायो करेंन, हि अपनो लूटन वालो ख लूटेंन, अऊर अपनो छीनन वालो सी छीनेंन, परमेश्वर यहोवा की या वानी आय।
राजा गोग को दफनायो जानो
11 “ऊ समय मय राजा गोग ख इस्राएल को देश म कब्रस्थान देऊं, ऊ तलाव को पूर्व दिशा को तरफ रहेंन; ऊ आन जान वालों की घाटी कहलायेंन, अऊर आन जान वालों ख वहां रुकनो पड़ेंन; वहां सब भीड़ समेत राजा गोग ख माटी दियो जायेंन अऊर ऊ जागा को नाम गोग की भीड़ की घाटी पड़ेंन।
12 इस्राएल को घराना उन्ख सात महीना तक माटी देतो रहेंन ताकी अपनो देश ख शुद्ध करे।
13 देश को सब लोग मिल क उन्ख माटी देयेंन; अऊर जो समय तोरी महिमा होयेंन, ऊ समय उन्को भी नाम बड़ो होयेंन, परमेश्वर यहोवा की या वानी आय।
14 तब हि आदमियों ख चुनेंन, जो हमेशा योच काम म लग्यो रहेंन, मतलब देश म घुम घुम क आन जान वालों को संग होय क देश ख शुद्ध करन लायी उन्ख जो जमीन को ऊपर पड़्यो होना, माटी देयेंन; अऊर सात महिना को बितन तक हि ढूंढ ढूंढ क यो काम करतो रहेंन।
15 देश म आन जान वालो म सी जब कोयी आदमी की हड्डी देखे, तब ओको जवर एक चिन्ह खड़ो करेंन, यो ऊ समय तक बन्यो रहेंन जब तक माटी देन वालो ओख राजा गोग की भीड़ की घाटी म गाड़ नहीं दे।
16 वहां को नगर को नाम भी ‘हमोना’ हय। यो देश शुद्ध करयो जाये।
17 “फिर ओ आदमी की सन्तान, परमेश्वर यहोवा यो कह्य हय : अलग अलग को सब पक्षियों अऊर सब जंगली जनावरों ख आज्ञा दे, जमा होय क आवो, मोरो यो बड़ो यज्ञ म जो मय तुम्हरो लायी इस्राएल को पहाड़ियों पर करू हय, हर एक दिशा म जमा हो कि तुम मांस खावो अऊर खून पीवो।
18 तुम शूरवीरों को मांस खावो, अऊर धरती को मुखियावों को खून पीवो अऊर मेंढा, मेम्ना, बकरा अऊर बईलों को भी जो सब को सब बाशान देश को तैयार करयो हुयो होना।
19 मोरो ऊ भोज की चर्बी सी जो मय तुम्हरो लायी करू हय, तुम खातो खातो अघाय जावो, अऊर ओको खून पीतो पीतो मतवालो होय जावो।
20 तुम मोरी मेज पर घोड़ावों, सवारों, शूरवीरों, अऊर सब तरह को योद्धावों सी तृप्त होवो, परमेश्वर यहोवा की या वानी आय।
इस्राएल की फिर सी स्थापना
21 “मय राज्य राज्य को बीच अपनी महिमा प्रगट करूं, अऊर राज्य राज्य को सब लोग मोरो न्याय को काम जो मय करूं, अऊर मोरो हाथ जो उन पर पड़ेंन, देख लेयेंन।
22 ऊ दिन सी आगु इस्राएल को घराना जान लेयेंन कि यहोवा हमरो परमेश्वर आय।
23 राज्य राज्य को लोग भी जान लेयेंन कि इस्राएल को घराना अपनो अधर्म को वजह बन्धुवायी म गयो होतो; कहालीकि उन्न मोरो सी असो विश्वासघात करयो कि मय न अपनो मुंह उन सी मोड़ लियो अऊर उन्ख उन्को दुश्मनों को वश म कर दियो, अऊर हि सब तलवार सी मारयो गयो।
24 मय न उन्की अशुद्धता अऊर अपराधों को अनुसार उन सी बर्ताव कर क् उन सी अपनो मुंह मोड़ लियो होतो।
25 “येकोलायी परमेश्वर यहोवा यो कह्य हय : अब मय याकूब ख बन्धुवायी सी लौटाय लाऊं, अऊर इस्राएल को पूरो घराना पर दया करूं; अऊर अपनो पवित्र नाम को लायी मोख जलन होयेंन।
26 तब ऊ पूरो विश्वासघात को वजह जो उन्न मोरो खिलाफ करयो हि लज्जित होयेंन; अऊर अपनो देश म निडर रहेंन; अऊर कोयी उन्ख नहीं डरायेंन।
27 जब मय उन्ख राज्य राज्य को बीच सी लौटाय लाऊं, अऊर उन दुश्मनों को देश सी जमा करूं, तब बहुत राज्यों को नजर म उन्को द्वारा पवित्र ठहरूं।
28 तब हि जान लेयेंन कि यहोवा हमरो परमेश्वर आय, कहालीकि मय न उन्ख राज्य राज्य म बन्धुवा कर क् फिर उन्को निजी देश म जमा करयो हय। मय उन म सी कोयी ख फिर परदेश म नहीं छोड़ूं,
29 अऊर उन सी अपनो मुंह फिर कभी नहीं फिराऊं, कहालीकि मय न इस्राएल को घराना पर अपनी आत्मा उण्डेल्यो हय, परमेश्वर यहोवा की या वानी आय।”