25
Paul n sos ye o keŋ Room naꞌatitaꞌar koto ni la yela
1 Ka Festus paae teŋ kane ka o soꞌe la ni ka zinꞌi anina daba atanꞌ, ka naam Sizerea teŋin n keŋ Jerusalem.
2 Anina ka maalmaan kpeenmnam ne Jew dim tuongatib mor Paul na tis Festus,
3 ka sos o ye o suŋi ba yiis Paul lebis Jerusalem, ka ba gbanꞌe ye ba suꞌa n ku o sueren.
4 Ka Festus lebis ye, “Paul be sarega ni Sizerea teŋin. Mam meŋ na leb anina daba ayi nwa.
5 O yaꞌa tum tuumbeꞌed siꞌa, yanam kel ka ya tuongatib n dol m keŋ Sizerea ka ba pianꞌ o pianꞌad.”
6 Ka Festus zinꞌi ne ba ka li pu gaad dabisa piigaa, ka naan keŋ Sizerea teŋin. Ka beog nie ka o kpenꞌ koto ni n zinꞌin, ka tis noor ye ba mor Paul na.
7 Ka Paul n kpenꞌ na la ka Jew dim bane yi Jerusalem duꞌe ziꞌen gilig o, ka pianꞌa ye o tum taal bedego, taal bane ka ba ku nyaŋe nie li gbin nyain ne.
8 Ka Paul tuꞌa ye o yiis o meŋ ka yel ye, “M pu niŋ siꞌel ka li a beꞌed Jew dim wada ni bee Winaꞌam puꞌusum yir bee Room naꞌatitaꞌar saꞌane.”
9 Ka Festus n bood ye o niŋ line na malis Jew dim la zug, o buꞌos Paul ye, “Fu siak ye fu na keŋ Jerusalem ka m kad uf saria ne antuꞌa bama yelaa?”
10 Amaa ka Paul lebis yel ye, “M be ne Room naꞌatitaꞌar meŋ koto ni; ka anina nar ne ban na kadi man saria. Fu meŋ miꞌ suꞌuŋa ye m pu tum beꞌed n tis Jew dima.
11 Ka m yaꞌa saꞌamin wada ka niŋin siꞌel line ka m narin ne kuꞌum, m naani ku zanꞌasinee. Amaa m antuꞌa lin ka ba mor la ye ba pianꞌ la yaꞌa kaꞌa sidaa, soꞌ ku nyaŋe noki m n tisi baa. M bood ye ba kadi m saria Room naꞌatitaꞌar koto ni.”
12 Ka Festus ne o suŋidib pianꞌa gbanꞌe, ka o lebis Paul ye, “Fu yel ye, fu bood ye ba kad uf saria Room naꞌatitaꞌar koto ni. Dinzugo naꞌatitaꞌar la saꞌan ka fu na keŋ.”
Paul n ziꞌe Agrippa ne Benis tuon la yela
13 Ka dabisa biꞌela gaad la ka naꞌab Agrippa ne o taunn Benis kenn Sizerea na ye ba puꞌus Festus.
14 Ka ban be anina n yuug biꞌela la, ka Festus tienn naꞌab Agrippa Paul antuꞌa yela ye, “Dau be kpela, ka Felik bas o ka o kpelim be sarega ni.
15 Ka man keŋ Jerusalem la, ka Jew dim maalmaan kpeenmnam ne teŋ la kpeenmnam mor o antuꞌa kena tienn m, ka sos m ye, m koosim ye o tum tuumbeꞌed.
16 “Amaa ka m lebisi ba ye, li kaꞌa Room dim malima ye niŋkan ka ba ke ka ba gbanꞌe o la ye ba niŋ o siꞌel la, asee on ne bane ke ka ba gbanꞌe o la kpaꞌa taaba, ka o nye suer kan ka o na nyaŋe kiꞌis bane yel siꞌel ziꞌil o la.
17 Bane ke ka ba gbanꞌe dau la daa kenn kpela na la, m pu ke ka li yuuge, amaa beog nie la, ka m kpenꞌ zinꞌin koto ni, ka tis noor ka ba mor o kpenꞌ na,
18 ka tenꞌes ye ba na yel ye o tum tuumbeꞌed. Amaa bane due ziꞌen la ba pu nyaŋe yel on tum tuumbeꞌed siꞌaa.
19 Amaa ba nwaꞌas taaba ne o ba puꞌusum suer yela maꞌaa, ne dau soꞌ one yuꞌur buon Yesu, one kpi ka Paul yel ye o vuꞌugiya la yela.
20 Ka m pu nyaŋe gbanꞌe man na niŋ siꞌem baŋ yel bama gbin ne, ka buꞌos Paul ye o bood ye o keŋ Jerusalem ka m kad o saria aninaa?
21 Ka Paul yel ye o bood ye o kpelim sarega ni, ka keŋ Room naꞌatitaꞌar koto ni ka o koosi o pianꞌad la. Ka m naan tis noor ka ba mor o keŋ naꞌatitaꞌar la saꞌan.”
22 Ka naꞌab Agrippa yel Festus ye, “M bood ye m meŋ wum dau kaŋa nwa pianꞌad.” Ka Festus lebis ye, “Beog yaꞌa nie fu na wum o pianꞌad.”
23 Ka beog nie ka Agrippa ne Benis kena duꞌosid naꞌam bedego, ka kpenꞌ pianꞌad doogin ne sogia kpeenmnam ne teŋ la tuongatib. Ka Festus tis noor ye ba mor Paul na,
24 ka yel ye, “Naa, naꞌab Agrippa, ne bane wusa laꞌas na. Ya nye dau kaŋa, one ka Jew dim wusa yel o yela Jerusalem ni ne kpela, ka tansid ye o pu nar ye o kpelim voeya.
25 Amaa mam pu nye on niŋ siꞌel ka li nar ne on na kpii. Ka o meŋ yel ye o bood ye ba taꞌasi o pianꞌad la naꞌatitaꞌar saꞌan. Ka m gbanꞌe ye m na ke ka o keŋ.
26 Amaa m pu mor antuꞌa zug o yela na sob n tis naꞌatitaꞌar laa. Alazug ka m ke ka ba mor o ya saꞌan na, fun naꞌab Agrippa meŋ meŋ, ye ya yaꞌa buꞌos o buꞌosa naae, m na nye yel siꞌa o ni n sob.
27 Ka m tenꞌes ka li kaꞌ suꞌum tis m ka m zaŋ sarega nid n tis naꞌatitaꞌar ka pu paꞌal suꞌuŋa ban gbanꞌe o siꞌel yelaa.”