24
Jew dim n yel Paul la yela
1 Ka daba anu daar ka maalmaan kpeenm Ananias kena ne kpeenmnam sieba ne kpeenm kane miꞌ antuꞌa, ka o yuꞌur buon Tertullus. Ka ba zaŋ Paul antuꞌa tis gomena la.
2 Ka ba buol Tertullus. Ka o pinꞌil tuꞌasid Paul yela ye, “Naa, naꞌasuŋ Felik. Fu yaꞌam suŋ la tisi ti yolisim, ka tiak bunbeꞌed bedego ka li a teŋ la suꞌum.
3 Ti siak neꞌeŋa wusa zinꞌis wusa ka puꞌusid uf suꞌuŋa.
4 Naꞌaba, man pu bood ye m saans uf la, dinzug ka m sosid uf ye fu di suguru ka kelis m antuꞌa giŋ nwa, Paul yela.
5 “Ti nye niŋkaŋa ka o ane nimbeꞌug ne one bood yela. O tugul Jew dim nidib dunia wusa, ka ba zab. O ane bane dol Nazaret nid la tuongat.
6 O zig ye o miligi ti Winaꞌam puꞌusum yir. Ka ti gbanꞌe o,
7 ka gbanꞌe gbanꞌar ye ti kad o saria ne tinam meŋ wada. Amaa ka sogia kpeenm Lisius kena ne paŋ n faaenn o ti saꞌan,
8 ka tis noor ye bane mor antuꞌa ne o la kemi fu saꞌan na. Fu yaꞌa buꞌos o, fu meŋ na wum o saꞌan lin wusa ka ti pianꞌ o yela.”
9 Ka Jew dim me paꞌas pianꞌ o yela, ka yel ye, neꞌeŋa wusa a sida.
Paul n tuꞌa yiis o meŋ Felik tuon la yela
10 Ka gomena la tis Paul suer ye o pianꞌam. Ka Paul yel ye, “M miꞌ ye fu niŋ sariakat ne soꞌolim kaŋa nwa ni ka yuma lal. Alazug ka m siak ye m pianꞌ yiis m meŋ.
11 Li a naꞌana ka fu na nyaŋe baŋ ye li pu gaad dabisa piinayi nwa ka m daa keŋ Jerusalem ye m puꞌus Winaꞌam.
12 Ka Jew dim la pu nye m ka m nwaꞌas ne soꞌ Winaꞌam puꞌusum yire. Ba me pu nye m ka m tugul nidib laꞌasug doodin bee teŋ la zinꞌisiꞌa nii.
13 Ba me ku nyaŋe nie bigise m line ka ba yel ye m maaliyaa.
14 Amaa m siak neꞌeŋa ye m dolne suer kan ka ba ye li bee li gunni la, n puꞌusid Winaꞌam on ka ti yaanam da puꞌusid la. M siak lin wusa n sob Moses wada gbauŋin ne Winaꞌam nodiꞌesidib gbana ni.
15 M mor tiꞌir Winaꞌam ni wenne ban mor tiꞌir siꞌem, ye nidib wusa, bane a suꞌum ne bane kaꞌ suꞌum na vuꞌug kumin la.
16 Dinzug ka m kpeꞌeŋidi m meŋ saŋa wusa ye m potenꞌer nie Winaꞌam saꞌan ne nidibin.
17 “M daa yi Jerusalem ka yuma lal ka m mor ligidi leb ye m tis m meŋ nidib bane a tadimnam ka maal maana n tis Winaꞌam.
18 M daa niŋid neꞌeŋa ka ba nye m Winaꞌam puꞌusum yin. Ka m naae pier maluŋ. Ka nidib bedego daa kaꞌa anina ka daauŋ me daa kaeꞌ.
19 Amaa Jew dim sieba bane yi Asia soꞌolim daa be. Ba yaꞌa moren yela ne man, ba meŋ naani moren m antuꞌa keen fu saꞌan.
20 Nimbama yaꞌa nye m tuumbeꞌed siꞌa saŋkan ka kpeenmnam la kat man saria la, ba yelim li nannanna.
21 Asee yel yinni maꞌaa yela ka m tans ba saꞌan, line a kuꞌum vuꞌugir yela, ka m ziꞌe ya tuon ka ya kat man saria la.”
22 Ka Felik n miꞌ labasuŋ la suer suꞌuŋa la, o bas pianꞌad la, ka yeli ba ye, “Sogia kpeenm Lisius yaꞌa paae na, m na gbanꞌe ya pianꞌad la.”
23 Ka tis sogia kpeenm one gur Paul la noor ye o gosim o, amaa ka tis o yolisim biꞌela, ka ke ka o zuanam tis o, on bood siꞌel.
Paul n ziꞌe Felik ne Drusilla tuon la yela
24 Ka dabisa yuug biꞌela ka Felik ne o poꞌa Drusilla one a Jew nid kena. Ka o buol Paul ka ke ka o pianꞌ Yesu Kiristo yadda niŋir yela.
25 Ka Paul n pianꞌad popielim ne meŋ luakir ne sariakadib line ken na yela la, ka dabiem gbanꞌe Felik, ka o yel Paul ye, “Kem, ka m yaꞌa ti nye saŋa m na buol uf.”
26 Ka lee mor tiꞌir ye Paul na tis o ligidi dinzug ka tuom biꞌela ka o buol o, tuom biꞌela ka o buol o n sonsid ne o.
27 Ka yuma ayi gaad ka Porsius Festus yuꞌun diꞌe Felik zinꞌig. Ka Felik bood ye o maal line na malis Jew dim la zug, o ke ka Paul kpelim be sarega ni.