23
1 Ka Paul gosid kpeenmnam la kii ka yel ye, “M zuanama, man potenꞌer a nyain Winaꞌam saꞌan m biilimin sa paae zina.”
2 Ka maalmaan kpeenm Ananias tis noor ye bane ziꞌe kpiꞌe Paul la n nweꞌem o noor.
3 Ka Paul yel o ye, “Winaꞌam na nweꞌ uf. Fu wenne zaŋguom kudug kane ka ba taae. Ka yiŋ venl, ka poogin kaꞌa suꞌum. Fu zinꞌi kad man saria, wada la yela, amaa fu saꞌam wada la, fun tis noor ye ba nweꞌ man la.”
4 Ka bane ziꞌe kpiꞌe Paul la yel o ye, “Fu tuꞌudne Winaꞌam maalmaan kpeenm.”
5 Ka o lebis ye, “M baꞌabiise, m ziꞌ ye o a Winaꞌam maalmaan kpeenm. Bozugo Winaꞌam gbauŋin li sob ye, ‘Da pianꞌ pianꞌabeꞌed n tis kpeenm kane guri fu buudi.’ ”
6 Ka Paul n baŋ ye sieba a Sadusii dim, ka sieba a Farisee dim la, ka yel kpeenmnam laꞌasugin la ye, “M baꞌabiise, mam ne m yaanam ane Farisee dim. Man mor tiꞌir ye bane kpi la na lem vuꞌug la zug ka m be yela nwa ni la.”
7 On yel neꞌeŋa la ka Farisee dim ne Sadusii dim pinꞌil nwaꞌasid ne taaba, ka nidib la welig.
8 Sadusii dim la pu siak kuꞌum vuꞌugir ne maleknam ne siis yelaa, amaa Farisee dim siaki li wusa.
9 Ka tukpeedug due Paul yela. Ka gbauŋmiꞌidib sieba bane a Farisee dim due nwaꞌas ne paŋ ye, “Ti pu nye dau kaŋa nwa tuumbeꞌede. Daasiꞌere li ane siig bee malek n pianꞌ tis o.”
10 Ka noŋgban nwaꞌar la kena galis. Ka sogia kpeenm la zo dabiem ye ba na aans Paul zora zora, ka tis sogianam noor ye ba kem n faaenn o nidib la saꞌan n mor o kpenꞌ sogianam yin.
11 Ka yuꞌuŋ kan ka Zugsob la kenn Paul saꞌan na yel o ye, “Kpeꞌeŋimi fu sunf; ka li nar ka fu tuꞌas m yela Room teŋin, wuu fun tuꞌas m yela Jerusalem ni kpela siꞌem la.”
Paul gbanꞌar la yela
12 Ka beog nie ka Jew dim sieba laꞌas taaba n po noor ye ba ku di diib bee nu kuꞌom asee ban na ti ku Paul.
13 Bane daa laꞌas n gbanꞌe neꞌeŋa la daa gaad nidib piisnaasi.
14 Ka ba keŋ maalmaan kpeenmnam ne kpeenmnam saꞌan yel ye, “Ti laꞌase po noor ye ti ku di siꞌela asee tinam na ti ku Paul.
15 Dinzug fun ne kpeenmnam laꞌasem ka tum sogia kpeenm la saꞌan ye o mor Paul n kenn ya saꞌan na, ka niŋ wenne ya bood ye ya wum o yela suꞌuŋa; ka tinam tiꞌeb ye ti ku o hale ka o nam pu paae naa.”
16 Ka Paul taunn biig baŋ ban gbanꞌe siꞌem ka keŋ sogianam yin la n yel Paul.
17 Ka Paul buol sogia kpeenmnam la yinni yel o ye, “Dasaŋ kaŋa mor siꞌel ye o yeli ya kpeenm la. Dinzugo dol o keŋ.”
18 Ka sogia kpeenm la mor biig la keŋi ba kpeenm la saꞌan n yel ye, “Paul, one a sarega nid la, buole m ye m mor dasaŋ kaŋa keenn fu saꞌan na; ka o mor siꞌel ye o yel uf.”
19 Ka kpeenm la gbanꞌe o nuꞌug mor o yi kpukpeŋ n buꞌos o ye, “Fu mor bo ye fu yeli ma?”
20 Ka o lebis ye, “Jew dim gbanꞌeya ye beog ba na sos uf ye fu mor Paul n keenn ba kpeenmnam laꞌasugin la na. Ka niŋ wenne ba bood ye ba wum o yela suꞌuŋa.
21 Amaa da siake; ka ba nidib gaad piisnaasi suꞌa gur Paul. Ba wusa po noor ye ba ku di diib bee nu kuꞌom, asee ban na ti ku Paul. Ba tiꞌeb ne gur fun na lebis siꞌem.”
22 Ka kpeenm la yel dasaŋ la ye, “Da yel soꞌ ye fu yele m siꞌela.” Ka o ke ka o keŋ.
Sogia kpeenm n zaŋ Paul n tis gomena Felik la yela
23 Ka o buol o sogia kpeenmnama ayi n yeli ba ye, “Laꞌasem sogianam kobus yi, ne wedbanꞌadib piisyopoi ne kpantoondib kobus yi, ka ba tiꞌeb yuꞌuŋ kaŋa karefa awai n keŋ Sizerea.
24 Ka tis Paul widi ka o banꞌ, ka mor o baanlim keŋ gomena Felik saꞌan.”
25 Ka o sob gbauŋ n yel ye:
26 Naa, gomena suŋ Felik.
Man Klaudius Lisias sob gbauŋ kaŋa n tis fun. M puꞌusid uf.
27 Jew dim daa gbanꞌe dau kaŋa nwa ka bood ye ba ku o. Ka mam wum ye o ane Room nid, ka keŋ ne sogianam n faaenn o,
28 ka bood ye m baŋ lin yela ka ba tuꞌadi o yela beꞌed, ka mor o keŋ ba kpeenmnam laꞌasugin.
29 M daa nye ka o yela ane Jew dim wada nwaꞌasug la zug, ka o pu niŋ siꞌel ka li nar kuꞌum bee ba yo o sarega nii.
30 Ka ban yeli m ye Jew dim gbanꞌe yelbeꞌed o yela la, dinzug ka m tum o toꞌoto fu saꞌan, ka tis noor ye bane ziꞌe o yela la kemi fu saꞌan na n yiis ba noor pianꞌad.
31 Ka sogianam la niŋ on yeli ba siꞌem la, ka mor Paul yuꞌuŋ kan n paae Antipatris teŋin.
32 Ka beog nie ka sogianam bane ken ne noba la leb Jerusalem na ka wedbanꞌadib la dol Paul n keŋ.
33 Ka ba mor o n paae Sizerea teŋin n nok gbauŋ la n tis gomena ka nok Paul n tis o.
34 Ka o karem gbauŋ la ka buꞌos on yi soꞌolim siꞌa na. On baŋ ye o yi ne Silisia soꞌolimin la,
35 o yel o ye, “Bane more fu antuꞌa la yaꞌa paae na m na kelis fu antuꞌa.” Ka o tis noor ye ba kpenꞌes o naꞌab Herod yin ka ba gur o.