26
Paul n tuꞌa yiis o meŋ Agrippa tuon la yela
1 Ka Agrippa yel Paul ye, “Suer be ka fu yiis fu noor pianꞌad.” Ka Paul uk o nuꞌug, ka tuꞌa ye o yiis o meŋ,
2 Ka yel ye, “Naꞌab Agrippa, m tenꞌes ka li malis man ka m na tuꞌa yiis m meŋ fu tuon zina nwa lin wusa ka Jew dim ke ka ba gbanꞌe m la ni.
3 Fun sadigim miꞌ Jew dim malima ne ba gbanꞌar suꞌuŋa la zug, m sosid uf ye fu mor suguru ka kelisi m pianꞌad la.
4 “Jew dim wusa miꞌ man a siꞌem m biilimin sa, ka miꞌ m duꞌamin sa ye m bene m meŋ teŋin ne Jerusalem.
5 Ba baŋiya ka li yuug. Ba yaꞌa bood, ba tunꞌe ziꞌeni di m kaset ye m ane Farisee dim nid yinni bane tiꞌa ba puꞌusum la hale.
6 Nannanna m ziꞌe saria kadib zinꞌigin kpela, mam mor tiꞌir ne noziꞌel kan ka Winaꞌam da yeli ziꞌeli ti yaanam la zug.
7 Noziꞌel kan ka ti buudi nidib pii na ayi bane puꞌusid Winaꞌam nintaŋ ne yuꞌuŋ la mor tiꞌir ye ba na nye li. Naa, li ane tiꞌir kaŋa zug ka Jew dim ke ka ba gbanꞌa m.
8 Bo ka li toe tisi ya ye Winaꞌam na nyaŋe vuꞌug kuꞌum?
9 “Mam meŋ daa tenꞌes ye m niŋ siꞌel wusa line na saꞌam Yesu one a Nazaret nid la yuꞌur.
10 Man tum neꞌeŋa Jerusalem ni. Maalmaan kpeenmnam daa tis m paŋ ka m gbanꞌe Winaꞌam nidib bedego kpenꞌes sarega ni. Ka bane ka ba daa kadi ba saria ye ba nar ne kuꞌum la, mam meŋ daa siaki ba kuub.
11 Saŋa bedego ka m namisi ba laꞌasug doodin n kpeꞌeŋi fendigi ba ka ba basi ba puꞌusum la. Ka m sunf daa pelig ne ba hale ka m keŋ teens bane kaꞌ Jew dim soꞌolim ni, ye m namisi ba.
Paul n tuꞌasi o tiaker la yela
(Tuuma 9.1-19; 22.6-16)
12 “Li daa ane neꞌeŋa zug ka m daa diꞌe noor maalmaan kpeenmnam saꞌan n keŋ Damaskus teŋin.
13 Naa, ka m be suer zug nintaŋ tisoos ka m nye neesim ka li nie gaad nintaŋ n yi saazug na n gilig m ne bane dol m la.
14 Ka ti wusa lu teŋin ka m wum kukor ka li yel m ne Hibiru pianꞌad ye, ‘Saul, Saul, bo ka fu namisid ma? Li na a toog n tis uf wenne naaf na tonꞌ o daan balaar.’
15 “Ka m buꞌos ye, ‘Naa, fu a anoꞌone?’
“Ka Zugsob la yel m ye, ‘M ane Yesu one ka fu namisid la.
16 Amaa duom ziꞌen ka m nie m meŋi fu saꞌan ka gaŋi uf ye fu lieb m tumtum. Fu na tuꞌas nidib fun nye siꞌel m saꞌan zina ne m yela lin ka m na ti paꞌal uf.
17 M na suŋ uf ka fu yi Jew dim nuꞌusin ne bane kaꞌ Jew dim buudi la nuꞌusin, bane saꞌan ka m tum uf.
18 M na lake ba potenda, ka fendigi ba n yiis likin n lebisi ba neesim ni, ka fendigi ba n yiis Sutaana nuꞌusin n lebisi ba Winaꞌam saꞌan. M na ke ka ba niŋi m yadda ka Winaꞌam yiisi ba tuumbeꞌed n bas, ka laꞌase ba ne Winaꞌam nidib.’
Paul n tuꞌasi o tuuma la yela
19 “Naꞌab Agrippa. M nye dau one yi arazana ni n nie siꞌel paꞌal m la, ka m pu zanꞌas oo.
20 Ka m pinꞌil Damaskus ne Jerusalem ne Juuda soꞌolim wusa ne buudi bane kaꞌ Jew dim la saꞌan n mool ye ba fendigim keŋ Winaꞌam saꞌan, ka tum line paꞌal ye ba tiakeya.
21 Neꞌeŋa zug ka Jew dim daa gbanꞌa m Winaꞌam puꞌusum yin n zig ye ba kuum.
22 Lin paae zinkaŋa nwa Winaꞌam suŋi m, ala ka m ziꞌe kpela n tuꞌasid man nye siꞌel n tisidi ya wusa, kpiꞌemnam ne tadimnam. Man yel siꞌel wusa ane line ka Winaꞌam nodiꞌesidib ne Moses da yel ka li na niŋ la.
23 Ye, asee ka Kiristo namis ka lieb one vuꞌug kumin yiiga, ka mool labasuŋ n tis Jew dim ne bane kaꞌ Jew dim buudi la.”
24 Ka Paul n tuꞌad ye o yiis o meŋ neꞌeŋanam ni la, ka Festus tans Paul ye, “Fu geenm ne. Fune zamis zuꞌe hale la yela kpenꞌesid uf geenmis.”
25 Ka Paul lebis ye, “Naa, m pu geenm. M pianꞌade yelsida ne yaꞌam.
26 “Naꞌab Agrippa. M na nyaŋe pianꞌa tis uf ne sukpiꞌeuŋ, fun miꞌ neꞌeŋanam wusa la zug. M baŋ ye fu nye neꞌeŋanam wusa line niŋ paalo ni. Li pu niŋ likin ne.
27 Naꞌab Agrippa, fu siak Winaꞌam nodiꞌesidib la yelaa? M miꞌ ye fu siakeya.”
28 Ka Agrippa yel Paul ye, “Fu tenꞌes ye fu na ke ka m kilim Kiristo nid saŋa biꞌela nwaa?”
29 Ka Paul yel ye, “Li yaꞌa yuug bee li pu yuuge, m puꞌusid Winaꞌam ye fun ne bane wusa kelisidi man zina na kilim wuu man a siꞌem la. Amaa m pu bood ye ba loo ya ne bana wuu ban lo man siꞌem laa.”
30 Ka gomena Festus ne naꞌab la ne Benis ne nidib la wusa due
31 yi ka yel taaba ye, “Dau kaŋa pu niŋ siꞌel ka li nar ye o kpi bee ba kpenꞌes o sarega nii.”
32 Ka Agrippa yel Festus ye, “Dau kaŋa nwa yaꞌa pu yelin ye o bood ye o keŋ naꞌatitaꞌar la saꞌane, fu naani yiisin o.”