23
Bilegbyegaan Jesus Cha Mimistulun Chi Lintog Ya Cha Pariseo
(Mrk. 12:38-39; Luk. 20:45-46)
1 Oli pun kalan Jesus kan cha amod un tagu ya cha disipulusla,
2 “Cha mimistulun chi lintog ya cha Pariseo, ked alla kalobbongancha un mangipakaawat si lintog Moses.
3 Ked kasapuɏan un tuttuwaonyu cha losan un itudtuchucha. Ngim achiyu koon cha kokòoncha ti achipuncha koon cha ibyegbyegacha.
4 Ipappabukudcha si tagu amod chi chegsonlaʼn bukud ngim achipun cha tuɏungan chicha.
5 Losan un kooncha, siyad mangwaancha ta itullong cha tagu chicha. Ti igilicha uchum un ugud Apudyus si mangkachakkeɏ ked itakodcha si kicheycha ya takɏaycha, ya alla wittawit cha mangkalachuʼn silupcha.
6 Ya pioncha umamuy si lapotgen un aammuyan lu piyasta, ya piliyancha bo kabiɏuwan un aammuyan si sinagoga.
7 Pioncha boʼn mapotgen si kaachuwan cha tagu ya maaw-awagen un ‘Mistulu.’
8 “Ngim chikayu, achiyu ipalubus un awagencha chikayu un ‘Mistulu,’ ti man-iisu kayu un mansusulud ked ossaan abus chi mistuluyu.
9 Achiyu awagen ulay siluʼn tagu utla pita un ‘Ama,’ ti ossaan chi Amayu ud langit.
10 Achiyu bo ipalubus un maawagen kayuʼn, ‘Apu,’ ti si Kristu abus chi Apuyu.
11 Ked ha kangatuwan kan chikayu, masapuɏʼn siya bubùulonyu.
12 Lu silu mangipangatu si long-egla, mipabyabya. Ngim lu silu mangikumbyabya si long-egla, maipangatu.”
13 Ot intuɏuy Jesus un kalala, “Kadchegu kayu, chikayuʼn Pariseo ya mimistulun chi lintog. Aginpapati kayu! Ti sillodyu sawang un lumlokan cha tagu si Mampangatan Apudyus. Ngim achipun kayu bo lumlok ked ipalityu bo cha meɏyed un lumlok.
14 “Kadchegu kayu, chikayuʼn Pariseo ya mimistulun chi lintog. Aginpapati kayu! Ti siksikkapanyu cha labyaɏu ta mangkusuwanyu si kukkuwacha. Ked ilanchu-anchuyu bo luwaluyu si sangwalan cha tagu ta matap-ulan cha kokòonyu. Laoy chi gapun chi chumagsolan chi machusaanyu.
15 “Kadchegu kayu, chikayuʼn Pariseo ya mimistulun chi lintog. Aginpapati kayu! Chilemangyu cha byeybyey ya ummoy kayu si achayuʼn ili ta awed maawisyu ulay ossaan un mandisipulusyu. Ked lu laawisyu, ilam-amodyu bo kachusaala ud impiyeɏlu lu kachusaanyu.
16 “Kadchegu kayu, chikayuʼn lakukuɏap un mangipuypuyut! Itudtuchuyu un lu isapatan chi osaʼn tagu chi templo, achipun masapuɏʼn tungpaɏola insapatala. Ngim lu isapata byalituk si templo, masapuɏʼn tungpaɏola chi insapatala.
17 Laog-oggogen kayu tuwaʼn lakuɏap! Simma lapotpotog? Ha byalituk willu ha templo un mampabiɏu si byalituk?
18 Ya kalanyu boʼn lu altar chi isapatan chi mansapata, achipun masapuɏʼn tungpaɏola insapatala. Ngim lu mansapata si michatun si altar, masapuɏ un tungpaɏola insapatala.
19 Tuttuwaʼn lakuɏap kayu! Ti simma lapotpotog? Ha michatun willu ha altar un mampapotog si chatun?
20 Ked lu silu mansapata si sangwalan chi altar, isapatala altar ya ipatila bo cha losan un lichatun.
21 Ked lu mansapata chi osaʼn tagu si templo, mansapata bo si templo ya si Apudyus un iinggew si templo.
22 Ya lu langit chi isapatan chi tagu, mansapata bo si tronon Apudyus ya si Apudyus un manturay.
23 “Kadchegu kayu, chikayuʼn Pariseo ya mimistulun chi lintog. Aginpapati kayu! Ti mangtod kayu si ingkasimpuɏun cha mangeanyu un isun cha muɏan mampalamlaw si makan, ngim achipunyu tungpaɏon cha kapotogen un bilin si lintog un masapuɏʼn koonyu isun chi kilalintog, kilachegu ya kilamapiyeɏ. Masapuɏʼn koonyu cha laoy ked achiyu liwatan cha uchum.
24 Chikayuʼn lakuɏap un mangipuypuyut! Sagatonyu chelum un ilumonyu ta achi mipati chi ilok, ngim lukmusonyu chi kameɏ!
25 “Kadchegu kayu, chikayuʼn Pariseo ya mimistulun chi lintog. Aginpapati kayu! Peɏpeɏkasonyu lasin chi tasayu ya paklaanyu, ngim ha chaɏomcha, laplucha si ilaagum ya kilalosop.
26 Tuttuwaʼn lakuɏap kayu, chikayuʼn Pariseo! Ulaonyu peɏkason chi chaɏom cha tasayu ya paklaanyu ta pumeɏkas bo lasinla.
27 “Kadchegu kayu, chikayuʼn Pariseo ya mimistulun chi lintog. Aginpapati kayu! Ti isuyu lobon un lapintuɏan si mamputilak. Bibiɏu tullongla si lasin ngim ha chaɏomla, laplu si tung-eɏ ya labuyuk un lecheg.
28 Katchi kayu. Lalintog kayu si sangwalan cha tagu, ngim ha katuttuwaala aginpapati kayu ya losan un awed si somsomokyu ked lawwing.
Impadtun Jesus Chi Machusaan Cha Pariseo Ya Cha Mimistulun Chi Lintog
(Luk. 11:47-51)
29 “Kadchegu kayu, chikayuʼn Pariseo ya mimistulun chi lintog. Aginpapati kayu! Ti lampaud kayu si lobon cha propetan Apudyus si awi ya ile-eɏkusanyu bo lobon cha lalintog un tagu.
30 Ked kalanyu boʼn, ‘Lu illinggew kami otyan si katattagun cha hachiʼn aappumi, achipun kami lin likakkaila kan chicha si lamatoyancha kan cha propeta.’
31 Ngim hachi mangipudluwanyu un galak chikayu kan cha lamatoy kan cha propeta si awi.
32 Chowot, igamputyu cha illaus cha aappuyu illugi.
33 “Patunged kayu! Galak chi uɏog! Ma in-ilonyuʼn mangilisi si machusaanyuʼd impiyeɏlu?
34 Ked mangibuulak kan chikayu si cha propeta ya cha lasilib un tagu ya cha mimistulun chi lintog. Ngim patoyonyu cha uchum, ilansayu cha uchum si krus, cha uchum bokbokonyu si sinagogayu ya manchogchog kayu kan chicha si cha ili-ili ta paligatanyu chicha.
35 Ked machusa kayu gapu si latoyan cha lalintog un tagu mallugi kan Abel inggala kan Zachariah un alak Barachiah un pilatoyyu si lambyeatan chi templo ya altar.
36 Tuttuwa ibyegak kan chikayuʼn tagu si salaʼn lolap, chikayu mangikaɏu si chusan cha losan gapu si kilalawwingcha!”
Ilay-ayat Jesus Cha IJerusalem
(Luk. 11:34-35)
37 Oli pun kalan Jesus, “O Jerusalem, chikayuʼn iJerusalem cha langtoy kan cha propeta ya lamit-ung kan cha imbuun Apudyus! Langam pigan iluppunku chikayu un isun chi man-aalikon chi angngak kan cha isiwla ngim ummisik kayu.
38 Ked si sala, mangamung kayu ti telan Apudyus chikayu.
39 Ibyegak kan chikayu, achipunyu maila sakon inggalad gumatong chi timpu un kalanyuʼn, ‘Pian chi taguʼn umali si ngachen Apu.’ ”