22
Ha Pangngalig Mipanggop Si Kaseɏ
(Luk. 14:15-24)
1 Ot kasin bo lan-alig si Jesus kan chicha un kalala,
2 “Ha Mampangatan Apudyus miyalig si osaʼn Ari un lansagala si kaseɏn chi alaklaʼn bumaru.
3 Ot imbuunla cha uchum un bubùulolaʼn man-ayeg kan cha taguʼn gilamputla ilimbiteɏan. Ngim achipuncha pion un umoy makakaseɏ.
4 Ot kasin bo lambuun kan cha uchum un bubùulola un kalala, ‘Ingkayu ibyega kan cha laimbiteɏan un lakasagala cha makan. Piletik chi byakak ya mangkalungpun ayyubu, ya lakasagala losan. Ibyegayu umalicha.’
5 Ngim cha taguʼn laimbiteɏan lappun chillumngeɏ. Ngim intuytuɏuycha cha pin-acha koon. Ummoy chi osa si taɏunla ya ummoy bo osa lallaku.
6 Cha uchum, lanchokmacha kan cha bubùulola ot pilaligatancha chicha ya intoycha chicha.
7 Chingngeɏn pun Ari kingwacha, amod chi sangala. Ot imbuunla cha susuɏchachula ot intoycha cha langtoy kan cha bubùulola asicha ot singgob chi ilicha.
8 Oli pun kalan chi Ari kan cha bubùulola, ‘Lisasaggala cha losan un masapuɏ si kaseɏ, ngim lappun kalobbongan cha laimbiteɏan un umali.
9 Ked ingkayu kan cha kekkesa ked lan-ayeg kayu kan cha losan un maochesanyu.’
10 Ot ummoy cha bubùulola si kekkesa ot lan-imbiteɏ kan cha losan un tagu, mangkabyaɏu ya mangkaɏawing, ot laplaplu mangkaseɏan si tagu.
11 “Ngim ummoy pun chi Ari itullong cha laimbiteɏan, intullongla osaʼn taguʼn achipun lansilup si ustuʼn kawos chi makakaseɏ.
12 Ot ilimus chi Ari kan siya, ‘Biɏun, mugga ilom un allà utlaʼn lappun kawoslù para kaseɏ?’ Ngim gummigillok.
13 Oli pun kalan chi Ari kan cha bubùulola, ‘Byaɏuchonyu imala ya ikila ked imbyelluyuʼd lasin un manggikbot. Udchi asila man-ibilan ya singngingillotan chi ngiponla.’ ”
14 Ot inyalungus Jesus kalan, “Achu cha maayagen, ngim akit cha mapiliyan.”
Im-imus Mipanggop Si Palagbyayed Chi Bugis
(Mrk. 12:13-17; Luk. 20:20-26)
15 Oli pun ummoyon cha Pariseo ot lantutuɏagencha lu hilu in-ilonchaʼn malikap kan siya gapu si cha ilugudla.
16 Ot lambuuncha kan cha disipuluscha un Pariseo ya uchum un tagun Herod ta umoycha ibyega kan Jesus, “Mistulu, ammumi un tuttuwa losan chi ibyegbyegam ya itudtuchum bo katuttuwaan mipanggop si pion Apudyus. Achipunka manchaleg lu simma ibyegan chi tagu ti achipunka mampili ulay silu kasasaedcha.
17 Ibyegam u lu silu kasomsomkam si allaya. Ha suplingonmi kamma lintog taku lu mambugis kami si Emperador willu achipun?”
18 Ngim ammun Jesus un pionchaʼn sikapan siya, ot kalala, “Chikayuʼn aginpapati! Payuggey sakon siksikkapan?
19 Ipailayu u pilak un para si bugis.” Ot illidchoncha kan siya osaʼn denario.
20 Ot ilimus Jesus kan chicha, “Himma sinlupa ya singngachen si alla?”
21 Kalancha, “Si Emperador Caesar.”
Ot kalan Jesus, “Lu katlat, idchonyu kan Emperador Caesar chi uwala, ya idchonyu bo kan Apudyus chi uwala.”
22 Chingngeɏcha pu hachi, laschaawcha ot tilelancha siya ot ummoyoncha.
Mipanggop Kan Cha Matoy Un Matagu Kasin
(Mrk. 12:18-27; Luk. 20:27-40)
23 Si hachiʼn eɏgew, ummoy cha uchum un Saduceo kan Jesus. Cha Saduceo achipun cha mamati un umuli matagu latoy. Ot lakaim-imuscha kan siya un kalancha,
24 “Mistulu, imbyegan Moses un lu matoy chi leɏaki un lappun alakcha si asawala, masapuɏʼn asaw-on chi suludla hachiʼn labyaɏu ta umalakcha si mibilang un alak chi hachiʼn latoy un suludla.
25 Awed cha pituʼn lelleɏakiʼn mansusulud. Langasawa panguɏu ot latoy un lappun alakcha. Ot ilasawan chi kumadwa hachiʼn labyaɏu.
26 Ked isula bo un latoy siya, ulay bo mikatlu inggalad chi mikapitu.
27 Ot si alungusla, latoy chi byebyai.
28 Lu umuli kasin matagu cha latoy, silu ustuʼn sin-asawa si hachiʼn byebyai? Ti losancha pitu ilasawa siya.”
29 Silongbyatan Jesus chicha, “Laillachu kayu, ti achipunyu maawatan chi liigiliʼn ugud Apudyus willu kilabyelin Apudyus.
30 Ti lu umuli matagu cha latoy, achipun cha mangasawa ngim miyisucha kan cha angheles ud langit.
31 Ked ha mipanggop si umuliyan cha latoy mataguwan, achipunyu kamman bilasa chi imbyegan Apudyus kan chikayu? Kalala,
32 ‘Sakon chi Apudyus Abraham, Apudyus Isaac ya Apudyus Jacob.’ Piolaʼn uguchon siya Apudyus cha latattagu, chakampun si Apudyus cha latoy.”
33 Chingngeɏn pun cha amod un tagu, laschaawcha si intudtuchula.
Cha Kapopotgen Un Bilin
(Mrk. 12:28-34; Luk. 10:27)
34 Chingngeɏn pun cha Pariseo un pilagilok Jesus cha Saduceo, lachagupcha kasin.
35 Ot ha osa kan chicha un lalaing un mistulun chi lintog, ilimusla kan Jesus ta sikapala siya.
36 Kalala, “Mistulu, silu kapotgen un bilin Apudyus?”
37 Ot summongbyat si Jesus, “ ‘Masapuɏʼn ayatom si Apudyus si losan un somsomoklu, si losan un kalichodwam ya si losan un kilalainglu.’
38 Laoy chi kapotogen ya ummulaʼn bilin Apudyus.
39 Ked ha mikadwa un kapotogen ked isula, ‘Masapuɏʼn ayatom chi asintatagum un isun chi man-aayatlu si long-eglu.’
40 Cha allaʼn chuwaʼn bilin Apudyus, chicha lambyaseɏan cha losan un lintog Moses ya intudtuchun cha propeta.”
Ha Mipanggop Kan Kristu
(Mrk. 12:35-37; Luk. 20:41-44)
41 Si lachagupan cha Pariseo, ilimus Jesus kan chicha,
42 “Simma maibyegayu mipanggop kan Kristu? Silu singgalak kan siya?”
Ot kalancha kan siya, “Galak David.”
43 Kalan Jesus kan chicha, “Ngim lu katlat, puggey David kalan un Kristu chi Apula? Ti ha ilugudla impakagasmok chi Ispiritun Apudyus, kalala,
44 ‘Kalan Apudyus kan Apuk: Umamuyka si machuwalanku
inggala ipaabyakku cha kabusuɏm.’
45 “Ked lu kalan David un ‘Apuk’ kan Kristu, mugga in-ilolaʼn si Kristu galak David?”
46 Ngim lappun makasongbyat kan Jesus ot malipud si hachiʼn timpu, lappun uchum un lateɏod un makaim-imus kan siya.