21
Ha Langichayawan Cha Tagu Kan Jesus Ud Jerusalem
(Mrk. 11:1-11; Luk. 19:28-40; Jhn. 12:12-19)
1 Alla pun un ummachali cha Jesus ud Jerusalem, lichuumcha ud Bethphage un ili si Bilig Olivo. Ot imbuun Jesus cha chuwaʼn disipulusla un kalala,
2 “Umula kayu si anchiyan iliʼd chomang ked lu gumatong kayu, ochesanyu lipupungod un changki un alla ayyubula. Ubyachenyu ked igetongyu chicha kan sakon.
3 Ked lu awed mangimus, ibyegayu kan siya, ‘Masapuɏʼn chi Apumi chicha,’ ked kakmala ipalubus chicha.”
4 Lakwa hachi ta matungpaɏan chi inggilin cha propeta si awi un kalala,
5 “Ibyegayu kan cha taguʼd Jerusalem, Ilanyu, allat un ased chi Ariyu,
lapakumbyabya ya langabkabbyayu si ayyabun chi changki.”
6 Ot ummoy cha chuwaʼn disipulus ot kingwacha imbilin Jesus kan chicha.
7 Inggetongcha changki ya ayyubula ot inyaplegcha cha silupcha si ochog chi changki ot langabyayu si Jesus.
8 Ot amod cha taguʼn langiyapleg kan cha silupcha si kesa, ya lummapngis cha uchum kan cha pangan cha kayu ot inyaplegcha si kesa un ayola.
9 Cha amod un taguʼn lamangpanguwon Jesus ya cha lituntun-ud kan siya inyip-ipkawcha kalan un, “Machaychayaw chi galak David! Pian siya un ummali un imbuun Apudyus! Machaychayaw si Apudyus un Kangatuwan!”
10 Gummatong pun cha Jesus ud Jerusalem, lagulu losan cha umili ot kalancha, “Silu halat?”
11 Ot summongbyat cha amod un tagu un kalancha, “Siya si Jesus un propetan Apudyus un lampeɏpuʼd Nazareth si probinsiya ud Galilee.”
Ha Killingwan Jesus Si Templo
(Mrk. 11:15-19; Luk. 19:45-48; Jhn. 2:13-17)
12 Oli pun ummoy si Jesus si templo ot lampeɏyaw kan cha inggew un mallalaku ya cha pin-a mangngila. Ot ilaminla lilitwed cha lamisaan cha mansusupli si pilak ya cha aammuyan cha mallalaku si kalapati.
13 Ot kalala kan chicha, “Liigili si ugud Apudyus, ‘Ha byeɏoyku ngadloncha byeɏoy un malluwaluwan.’ Ngim lambyalilonyu tataɏɏuwan cha akkawan.”
14 Oli pun ummoy cha lakuɏap ya cha lapilay kan Jesus si templo ot pilalin-awala chicha.
15 Ngim intullong pun cha ap-apun cha papachi ya cha mimistulun chi lintog cha lakaskaschaaw un killingwan Jesus ya chingngeɏcha cha aalak un mangiyip-ipkaw si templo un kalancha, “Machaychayaw chi galak David!” Ot summangacha.
16 Ot kalancha kan Jesus, “Ha achipunlu madngeɏ iyip-ipkaw cha aalak alla?”
“O, chochongɏok!” kalan Jesus. “Ha achipunyu kamman labyasa si liigiliʼn ugud Apudyus un kalala, ‘Tiludtuchuwam cha aalak ya cha mutlok un manchayaw kan sikan ustu-ustu.’ ”
17 Ot tilelan Jesus chicha ot ummoy ummiyan ud Bethany.
Ha Langeɏwagen Jesus Si Kayuʼn Lappun Bungala
(Mrk. 11:12-14, 20-22)
18 Labigat pun un langulilan cha Jesus ud Jerusalem, labitin siya.
19 Ot intullongla kayu un ngadloncha Igus si igid chi kesa. Ot ummoyla ilachali ta itullongla lu awed bungala, ngim lappun inchesala, abus cha tubu. Ot kalan Jesus si kayu, “Achipunka kasin mamunga!” Ot kakma lanchaguyawyaw chi hachiʼn kayu.
20 Si langitullongan cha disipulusla, laschaawcha ot kalancha, “Mugga ilolaʼn kakma gey leɏangu hachiʼn igus?”
21 Ot kalan Jesus kan chicha, “Tuttuwa ibyegak kan chikayu, lu mamati kayu kan Apudyus ya achipun kayu manchuwachuwa, makwaʼn koonyu isun chi killingwak si kayuʼn alla. Chakampun abus hachi ngim makwa boʼn kalanyu si bilig alla, ‘Umopwaska ked man-atunka si byeybyey,’ ked tuttuwaʼn makwa.
22 Lu awed pammatiyu kan Apudyus, idchola losan un chawatonyu si luwalu.”
Ha Kalobbongan Jesus
(Mrk. 11:27-33; Luk. 20:1-8)
23 Oli pun langulin si Jesus si templo. Si lantudtuchuwala, ummoy kan siya cha ap-apun cha papachi ya cha pallakayon cha Judio, ot kalancha kan siya, “Simma kalobbongam un mangwa kan cha laoy? Ya silu langatod si kalobbongam alla?”
24 Ot silongbyatan Jesus chicha, “Imusok bo kan chikayu, ked lu songbyatalak, asik bo ibyega lu silu langatod si kalobbongak un mangwa kan cha laoy.
25 Chilu lampeɏpuwan chi kalobbongan John un mambunyeg, leɏpu kan Apudyus willu tagu?”
Ot lan-is-isikancha un kalancha, “Simma ibyega taku? Lu kalan takuʼn, ‘Leɏpu kan Apudyus,’ kalala un, ‘Payuggey achi pilati si John lù?’
26 Ngim lu kalan takuʼn, ‘Leɏpud chi tagu,’ Umogyat kami lu hilu koon cha tagu, ti mamaticha losan un propetan Apudyus si John.”
27 Ot kalancha, “Achipunmi ammu.”
Ot kalan Jesus kan chicha, “Lu katlat, achipunku bo ibyega kan chikayu lu simma leɏpuwan chi kalobbongak un mangwa kan cha laoy.”
Ha Pangngalig Mipanggop Kan Cha Chuwaʼn Mansulud
28 Oli pun lan-alig si Jesus un kalala, “Simma somsomokyu si alla? Inggew chi osaʼn tagu un chuwa alaklaʼn leɏaki. Kalala si panguɏu, ‘Alakku, ingka mangkawachi si uma un lamuɏ-an si grapes si sala.’
29 “Ot summongbyat, ‘Asngaak,’ ngim lapalos pun lanchachauli ot ummoy langkawachi.
30 “Oli pun ummoy bo chi ama imbyega si uchichi ta umoy mangkawachi. Ot kalala, ‘O, Ama inyak,’ ngim achipun ummoy.
31 Silu kan cha hachiʼn chuwa lalungpeɏ si pion amacha?”
Summongbyatcha, “Ha panguɏu.”
Ot kalan Jesus kan chicha, “Tuttuwa ibyegak kan chikayu un cha mangkaɏawing un tagu un isun cha manchachagup si bugis ya cha puta, umun-ulacha lu chikayu mipati si Mampangatan Apudyus.
32 Ti ummali pun si John un Mambubunyeg, intudtuchula bibiɏuʼn mambibiyeg un masapuɏʼn suɏutonyu, ngim achipunyu pilati siya. Ngim cha lamati kan siya, cha manchachagup si bugis ya cha puta. Ked ulay lu intutullongyu lambyaliwancha, achipun kayu lambyabyawi kan cha byasbyasuɏyu ya achipunyu bo pilati siya.”
Cha Leɏanggas Un Mantatangkon
(Mrk. 12:1-12; Luk. 20:9-19)
33 Kalan Jesus, “Chongɏonyu osaʼn pangngalig. Inggew chi osaʼn tagu un lammuɏà grapes si pitala. Tilupinglaʼn lan-aɏed si lampalikwos ot ummabut si byetu ta asila mangkupisan si bungala. Ot langwa bo si mantaklang un sigey ta inggewan cha man-aachug. Ot impatangkonla ot ummoy si sabyaliʼn ili.
34 “Gummatong pu timpun chi man-aapit, imbuunla cha bubùulola ta umoycha makabuwa si grapes.
35 Ngim cha lantangkon chilokmaancha chicha ot bilokbokcha osa, pilatoycha osa ot bilinbintukcha osa.
36 Kasin bo lambuun chi simpita si ad-achuʼn bubùulon lu ha chamu. Ot katchi bo killingwacha kan chicha.
37 Ot si alungusla, imbuunla mismuʼn alakla kan chicha, un kalala, ‘Mabiincha kan siya.’
38 “Ngim intap pun cha lantangkon chi alakla, lan-uumaɏancha kalan un, ‘Anchiya alaklaʼn sinlaksun si pitan alla. Wayyu ta patoyon taku ta mangkuwa taku laksunla.’
39 Ot chilokmaancha siya ot lilasincha si aɏed ot pilatoycha siya.
40 “Si sala, lu gumatong chi simpita, simma koola kan cha lantangkon?”
41 Ot summongbyat, “Sigulachuʼn kaog-ogyat chi in-ilolaʼn mangtoy kan chicha ti leɏanggaschaʼn tagu. Ked impatangkonla grapesla kan cha uchum un lapiyeɏ un uun-ulancha buwala lu timpun chi apit.”
42 Ot kalan Jesus kan chicha, “Achipunyu kamman labyasa si liigiliʼn ugud Apudyus, un kalala,
‘Ha byetuʼn illissan cha lampaud, siya lambyalilon Apudyus un kapotogen
un byetu un mangimpon-ed un misaachen chi byeɏoy.
Si Apudyus chi langwa si allaya ked lakaskaschaaw
chi mangitullongan taku.’
43 Ked ibyegak kan chikayu, un achipun Apudyus iturayan chikayu ked siya iturayala cha tagu un pin-a mangwa kan cha lumbong si mampangatala.
44 Mipanggop si hachiʼn byetu, lu awed maodcheg si hachiʼn byetu, mamokmokcha. Ked lu awed mituklugen chi hachiʼn byetu, magabuk.”
45 Si chingngeɏn cha ap-apun cha papachi ya cha Pariseo chi pangngaligla, laawatancha un chicha ug-ugguchola.
46 Ot lansingitcha si in-ilonchaʼn malokma kan siya. Ngim ummogyatcha kan cha amod un tagu, ti imbilangcha siya un propetan Apudyus.