10
Lamingpingsan Chi Langichuyaan Kristu Si long-egla Para Kan Cha Losan
1 Ha lintog Moses ked alliliwan cha bibiɏuʼn byaleg un gumatong, chakampun un tuttuwaʼn kopya cha allaʼn katuttuwaan. Gapu si alla, achipun pulus mapalintog cha umacheli manchayaw kan Apudyus mipagapu si tilawon un chatun si ayam.
2 Ti lu tuttuwaʼn lamingpingsan un lachuɏsan cha byasbyasuɏn cha manchaychayaw kan Apudyus, lappun otyan lalikliklacha un lakabyasuɏcha ya inyageycha otyan un manchatun.
3 Ngim cha allaʼn ichatu-chatuncha ked tilawon un mangipakagasmok si byasbyasuɏcha.
4 Ti achipun makwaʼn kaalon chi chaɏan cha byaka ya keɏching cha byasuɏ.
5 Ked si ummaliyan Kristu utla lubung, kalala kan Apudyus,
“Chakampun si ayam un michatu-chatun ya cha uchum un chatun chi piom,
ngim insagalam chi long-egku un michatun.
6 Achipunka mas-om kan cha chatchatun un sogsoggoncha
ya cha ichatu-chatuncha para si byasbyasuɏcha.”
7 Oli pun kalak, allaak Apudyus, ummaliyak un mangwa si piom,
un siya liigili mipanggop kan sakon si liblun chi lintog.
8 Umula, kalala, achipunlu pion ya mas-oman cha michatun ya cha chatun un sogsoggoncha ya cha ichatchatuncha para si byasbyasuɏcha, ulay lu siya liilintog kan chicha.
9 Lagamput pun kalala, Allaak, Apudyus, ummaliyak un mangwa si piom. Kilaan Apudyus chi ummulaʼn michatun ot insukatla michatulan Kristu.
10 Gapu ta killingwan Jesu Kristu chi pion Apudyus, pummeɏkas taku kan cha byasuɏ taku mipagapu si lamingpingsan un langichatulala si long-egla.
11 Ileɏgew un mansimsimbi kacha pachi ya ikasi-kasincha manchatun si ayam kan Apudyus. Ngim achipun makwa un kaalon cha chatun cha byasuɏn cha tagu.
12 Ngim si Kristu, lamingsanla inchatun chi long-egla para si byasuɏ taku, ked umalay si ing-inggala. Lagamput pun, ummamuy si machuwalan Apudyus ud langit un makaturay kan siya.
13 Ked udchi man-uwayala inggala abyakon Apudyus cha kabusuɏla.
14 Ked gapu si lamingpingsan un lanchatulan Jesu Kristu, lapalintogla ing-inggala cha pummeɏkas un tagun Apudyus.
15 Ked ha Ispiritun Apudyus takcheɏala bo alla kan chitaku. Umula kalala,
16 “Allaya baruʼn tuɏeg un kook kan chicha si umaliʼn eɏgew, kalan Apudyus.
Imuɏak cha lintogku si pusucha ya igilik si somsomokcha.”
17 Ya kalala bo,
“Achipunku sosomkon cha byasuɏcha ya
cha lawwing un killingwacha.”
18 Si sala lu lapakawan cha byasuɏ, achipun masapuɏʼn awed kasin michatun para si byasuɏ.
Tumeɏod Taku Un Mansagung Kan Apudyus
19 Ked susulud, lawayawayaan taku un makaslok si Kasantuwan un Lugeɏ un igew Apudyus gapu si chaɏan Jesus.
20 Gapu si langichatulala si long-egla, inlukatla kan chitaku chi baru ya mataguwan un chaɏan, isun chi lilumsut si ketila un mamallod si lumlokan si igew Apudyus.
21 Ked si sala awed chi mallakabyelin un pachi taku un mangayyuwan kan chitaku un tagun Apudyus.
22 Ked umacheli taku kan Apudyus un sipupusu ya mantegod chi pammati taku kan siya, ti lachuɏsan chi somsomok taku si cha kilalawwing un isun chi laweɏakgiyan taku si chaɏan Jesus ya isun chi lachuɏsan chi long-eg taku si mampeɏkas un chelum.
23 Ked ooglen taku lamlama taku kan Apudyus un lappun chuwa-chuwala, ti si Apudyus ked mantegochen un tungpaɏola cha ingkarila.
24 Ya somsomkon taku in-ilon taku un mangipakoscheɏ si ayat si kacha osa ya mangwa si bibiɏu.
25 Ya achi taku iyagey un pin-a man-um-ummung kan cha kadwa takuʼn mamati, un isun chi kokòon cha uchum. Ngim man-asisegeg taku, amod gey si salaʼn maila takuʼn chanchali chi eɏgew un mangulilan Apu Jesus.
26 Ti lu igagaɏa taku ituytuɏuy un mangwa si byasuɏ un lagamput taku ilagammu chi katuttuwaan, lappun uchum si michatun un makakaan kan cha byasuɏ.
27 Ya lappun bo uchum si koon taku lu achi taku uwayon chi kaog-ogyat un malusaan Apudyus ya gumilegileb un apuy un mangikisap kan cha bumusuɏ kan Apudyus.
28 Mapatoy un achipun makacheguwan chi taguʼn sumupling si lintog Moses lu awed chuwa willu tiɏu un mansistigu si byasuɏla.
29 Ked sin-umamod bo machusaan chi taguʼn mangikiteg si Alak Apudyus ya manliwliw-ala chaɏa un langipaloklok si katuɏagen Apudyus un siya lameɏkas si cha byasuɏ ya cha langam-amsiw si malagchegu un Ispiritu.
30 Ti ammu taku langibyega, “Sakon chi simbiyang un bumaɏos. Sakon chi mamayed.” Kalala bo, “Kuison Apudyus cha tagula.”
31 Kaog-ogyat cha mallak-am si chusan chi latattaguʼn Apudyus.
32 Somsomkonyu chi kasasaedyu si lummaus un timpu. Si lalawagen chi somsomokyu, ilan-alusanyu amod un ligat ngim achipun kayu lampaabyak,
33 sin-udchuman langig-iggaan ya pilampaligatan chikayu si sangwalan cha achuʼn tagu. Ya sin-udchuman, lakasagala kayu un mipati makaligat kan cha bubuɏun un lamati.
34 Ti kilacheguwanyu bubuɏunyuʼn lamati un labyabyaɏud. Ya ulay silamsamcha kukkuwayu, ilan-alusanyu un lagalas kayu ti ammuyu mismu un awed chi labibbiɏu ya mallalayun un kukkuwayu ud langit.
35 Ked achiyu kaalon chi lamlamayu ya tegodyu ti chakeɏ magunggulayu.
36 Masapuɏ un man-alu-alus kayu ta siyad koonyu chi pion Apudyus ked awatonyu cha ingkarila.
37 Ti kalan chi liigiliʼn ugud Apudyus,
“Achipun mabyeyeg ked umali siya, achipunla byeybyeyegon.
38 Ked ha lalintog un taguk ked matatagu gapu si pammati,
ngim lu man-awichela sakon, achipulak mas-om kan siya.”
39 Ngim achipun taku mibilang kan cha taguʼn lan-awichencha si Apudyus ot lataɏakcha, ngim mibilang taku kan cha mamati ya matagu ing-inggala.