9
Ha Chachaan Ya Baruʼn Palagchaychayaw Kan Apudyus
1 Ot si sala, ha ummulaʼn intuɏeg Apudyus ked awed cha bilinla mipanggop si palagchaychayaw ya pilaudchaʼn sigey un tinulda un manchaychayawancha utla pita.
2 Hachiʼn sigey un tinulda ked awed chi chuwaʼn kuwetula. Ha lasinla un ummulaʼn kuwetu ked lingachelancha un Lasantuwan un Lugeɏ, un inggewan cha papattayan si silaw ya lamisaan un lipapattayan cha tilapay un lichatun kan Apudyus.
3 Ha mikadwaʼn kuwetu un labyebyechak si ketila ked lingachencha Kasantuwan un Lugeɏ un para kan Apudyus.
4 Cha inggew ked cha bilalituk un altar un sosoggen si insenso ya kasun un lapuntuɏan si byalituk, un kalancha, Kasun chi Tuɏeg. Si chaɏom chi Kasun inggew chi bilalituk un angang un inggewan chi manna ya inggew bo si kasun chi sekud Aaron un summimit ya chuwaʼn tappitap un byetuʼn ligiliyan chi simpuɏuʼn bilin Apudyus.
5 Ked ha ngatuwon chi kasun, awed cha anghel un ngadloncha cherubim un mangipaila si kilaawed Apudyus. Tilalikchungan chi payakcha chi tangub chi kasun un laweɏakgiyan si chaɏa si tilawon ta matap-ulan cha byasuɏn cha tagu. Ngim chakampun si salaʼn timpu chi mangipakaawatak kan cha laoy.
6 Lu laleman cha losan un awed si Sigey un tinulda, ked biligat un lumlok cha papachi si ummulaʼn kuwetu ta kooncha biyangcha.
7 Ngim abus chi kangatuwan un pachi si makaslok si langinchaɏom un mikadwaʼn kuwetu, ked mamingsan si sintawon chi lumlokala. Ked masapuyʼn awed illokla si chaɏa un ichatunla kan Apudyus gapu si byasuɏla ya byasuɏn cha tagu un achipuncha gilagaɏa.
8 Ked gapu si alla, impakaammun chi Ispiritun Apudyus un achipun makaslok chi tagu si Kasantuwan un Lugeɏ lu sissiyan awed chi ummulaʼn kuwetu.
9 Losan cha alla awed chi miyaligela si salaʼn timpu. Ti cha sagut ya chatchatun un ayam un inchatun cha papachi ked achipuncha makacheɏus si somsomok cha manchaychayaw.
10 Cha allaʼn bilbilin mipanggop si makan, mailum ya cha kalasin chi in-ilon un manchiɏus si long-eg. Losan cha alla ked langinlasin un bilbilin un makwa inggala umali timpuʼn mamaliwan Apudyus si losa-losan.
11 Ngim ummali si Kristu un kangatuwan un pachin cha bibiɏuʼn byaleg un pin-a taku mapachas si sala. Lilumlok siya si langatngatu ya simbumaɏu un sigey un tinulda ud langit, un achipun chi tagu pilaud ya lappun si allaʼn lubung.
12 Lamingpingsan lilumlok si Kristu si Kasantuwan un Lugeɏ. Ked chakampun si chaɏan cha keɏching ya ayyubun cha byaka chi inyawitla un inchatunla ngim ha mismuʼn chaɏala inchatunla ta makaan cha byasuɏ taku ya matagu taku ing-inggala.
13 Si lintog, lu ha osaʼn tagu ked mibilang un kaisaw, masapuɏʼn iweɏakgiyancha si chaɏan cha keɏching ya lakiʼn byaka un lakamsan si chebun chi lasgob un bumalasang un byaka ta mapapeɏkascha si kilalawwingcha.
14 Ked sinchumadlu kilabyelin chi chaɏan Kristu! Mipagapu si mallalayun un Ispiritu, inchuyala long-egla un lappun kabyasbyasuɏala kan Apudyus. Ked ha chaɏala mameɏkas si somsomok taku ta man-awichen taku cha lawwing un lappun puupuutla ta mansimbi taku kan Apudyus un latattagu.
15 Ked hachi gapulaʼn si Kristu pin-a mangiyugud si baruʼn tuɏeg Apudyus kan cha tagu, taplu cha chilutukan Apudyus awatoncha mallalayun un tawid un ingkarila. Gapu si latoyala, silakala chicha ta mawayawayaan cha lakabyasuɏ si ummulaʼn katuɏagen.
16 Lu awed liigili si kasuɏatan chi osaʼn tagu mipanggop si tawid, lappun makaaɏa si tawidla inggalà mapaloklokan un latoy chi langwa si hachiʼn kasuɏatan.
17 Ti lappun makwaan chi kasuɏatan lu sissiyan matatagu chi taguʼn langwa. Alla kakwaala lu latoy chi taguʼn langwa.
18 Hachi gapulaʼn ulay chi ummulaʼn tuɏeg Apudyus ked lappun lakwaala lu lappun chaɏa un siya mampaloklok un awed latoy.
19 Ti ha killingwan Moses si awi si langibyegbyeg-ala kacha bilin chi lintog kan cha tagu, langaɏa si chaɏan cha ayyubun byaka ya keɏching ot kilamsala si chelum. Ot langaɏa si chutchut chi keɏlilu un lakoleɏan si mancheɏaeg ot impakatla si pingin chi kayuʼn hysop. Ot illusongla si chaɏa ot inweɏakgila si liblun chi lintog ya losan un taguʼn illinggew.
20 Kalala, “Ha allaʼn chaɏa siya mangipaloklok si intuɏeg Apudyus kan chikayu un imbilinla un masapuɏʼn tuttuwaonyu.”
21 Ot liweɏakgiyan bod Moses si chaɏa chi Sigey un tinulda ya cha losan un mauseɏ si manchaychayawancha.
22 Ha katuttuwaala, kalan chi lintog un allà akit un losan un byaleg ked machuɏsan si chaɏa, ya lu lappun mibukbuk si chaɏa lappun bod mapakawan si byasuɏ.
Ha Lichatulan Jesu Kristu Machuɏsan Cha Byasbyasuɏ Taku
23 Ked losan cha allaʼn byaleg un isun chi liglatun cha awed ud langit ked masapuɏʼn machuɏsancha gapu si katlaʼn chatun. Ngim cha awed ud langit ked masapuɏcha labibbiɏuʼn michatun lu cha alla.
24 Ti achipun lilumlok si Kristu si Lasantuwan un Lugeɏ un pilaud chi tagu ya lagechawan chi tuttuwaʼn lugeɏ. Ngim lilumlok ud langit mismu ked awed si sala un mangitakcheɏ kan chitaku si sangwalan Apudyus.
25 Ked chakampun si lilumlok ud langit ta umoyla ikasi-kasin ichatun chi long-egla un isun chi kangatuwan un pachi un tilawon un lumlok si Kasantuwan un Lugeɏ un mangichatun si chaɏan cha ayam.
26 Ti lu katchi killingwala, ikasi-kasinla bò amin malligat malipud si lakwaan chi lubung. Ngim si alungus chi timpu lamingpingsan ummali taplu si mangichuyaala si long-egla un matoy, ked makwaʼn kaalola byasuy.
27 Lakodchongan chi tagu un matoy mamingsan, ked lu magamput, kuison Apudyus.
28 Isun Kristu, lamingpingsan un inchuyala long-egla ta kaalola cha byasuɏn cha tagu. Ked asi umali kasin, chakampun un gapu si byasuɏ, ngim taguwola cha manguuway kan siya.