11
Kilapotog Chi Pammati
1 Ha pammati ked maligulachuwan un matungpeɏ allaʼn lamlamaon taku. Siya mambyaseɏan taku si cha byaleg un achipun taku miila ked awed cha.
2 Gapu si pammatin cha aappu taku, hachi langiteulan Apudyus kan chicha.
3 Gapu si pammati maawatan taku un lakwa lubung ya losan un miilaʼn byaleg mipagapu si ugud Apudyus, ta cha maila lampeɏpucha si achipun maila.
4 Gapu ta alla pammatin Abel, lakaay-ayu inchatunla kan Apudyus lu ha inchatun Cain. Gapu si pammatila, imbilang Apudyus siya un lalintog ya impailan Apudyus chi alla si langawatala si inchatunla. Ulay lu latoy si Abel, sissiyan awed pay laing ibyegbyegala kan chitaku gapu si pammatila.
5 Gapu si pammati, achipun Enoch pilachas chi otoy ti illaɏan Apudyus siya un sissiyaʼn matattagu, ot achipun laochesan. Ti kalan chi liigiliʼn ugud Apudyus un sakbyey un illaɏan Apudyus siya, ilay-ayula si Apudyus.
6 Ked lappun tagu si makaay-ayu kan Apudyus lu lappun pammatila. Ti lu silu umachali kan Apudyus, masapuɏʼn patiyola un awed si Apudyus ya gunggulaala cha mangipapati mansingit kan siya.
7 Gapu si pammati, chingngeɏn Noah impatubgan Apudyus mipanggop si makmakwa si umaliʼn eɏgew ulay achipunla intullong. Ot lampaud si chakeɏn bapur ta mataguchaʼn simbyeyan. Ked gapu si pammatila, impailala un lawwik chi lubung. Ked siya imbilang Apudyus un lalintog gapu si pammatila.
Ha Pammatin Abraham
8 Gapu si pammati, tummuttuwa si Abraham si langayagen Apudyus kan siya ot ummoy si osaʼn ili un ingkarilaʼn idchon kan siya. Tilelala ilila, un lappun ammula lu udma ayala.
9 Gapu si pammati, illinggew si Abraham un isun chi kakkaili si pitaʼn ingkarin Apudyus kan siya. Illinggew siya si sigey un tinulda, ulay bo cha alaklaʼn Isaac ya apulaʼn Jacob un makatawid kan siya si ingkarin Apudyus.
10 Ti lilamlaman Abraham chi siudad un mallalayun chi lisaachela, un pilaud ya killingwan Apudyus.
11 Gapu si pammati, lakwaʼn gummalak cha Abraham kan Sarah, ulay lu leɏakaɏakay siya ya byasig si Sarah ti imbilangla un mantegochen si Apudyus un tungpaɏola chi ingkarila.
12 Ked isun chi latoy si Abraham ti achipun makagalak, ngim lampeɏpu kan siya chi ummachu-achu un galak un isun chi kaachun cha bituwon ud langit ya kaachun cha legen si teɏanteg chi byeybyey.
13 Lamati losan cha allaʼn tagu kan Apudyus inggala latoycha. Achipuncha ilawat cha ingkarin Apudyus ngim intullongcha abus ya lilamlamacha cha kari ulay lu mabyeyeg chi katungpaɏala. Ked biligbigcha un mangilicha ya kakkailicha utla pita.
14 Cha taguʼn mangibyega si kamatchi ked ipailacha un awed chi singsingtoncha un mismuʼn ilicha.
15 Lu siya sosomkoncha hachiʼn ilin tilelancha, lawayacha otyan un mangulin.
16 Ngim ha lilamlamacha ked labibbiɏu un ili, ked siya ud langit. Ot hachi gapula un achipun mabiin si Apudyus un maawagen un Apudyuscha, ti inyaallala osaʼn siudad para kan chicha.
17 Gapu ta alla pammatin Abraham kan Apudyus, lakasagalan mangichatun kan Isaac un alakla si lamappachasan Apudyus kan siya. Ilawatla cha ingkarin Apudyus ot lakasagalaʼn mangichatun si ossaan un alakla,
18 ulay lu imbyegan Apudyus kan siya, “Mipagapu kan Isaac chi mampeɏpuwan cha galaklu.”
19 Biligbig Abraham un kabyeeɏan Apudyus un mangipuuli malagu si latoy. Ked isun chi katchi lakwa un isun chi langulin kan siya si Isaac malipud si otoy.
20 Gapu si pammati, chilawat Isaac chi binchisyun Apudyus kan cha Jacob kan Esau mipanggop si umaliʼn eɏgew.
21 Gapu si pammati, sakbyey un matoy si Jacob, bilinchisyulala illuwaluwan cha alak Joseph. Lalum-uk si sekudla ot chilaychayawla si Apudyus.
22 Gapu si pammati, sakbyey un matoy si Joseph, imbyegalad chi umoyolan cha iyIsrael ud Egypt, ya imbilinla bo kooncha mipanggop si lechegla.
Mipanggop Si Pammatin Moses
23 Gapu si pammatin cha chachakkeɏn Moses, si liyalak si Moses, intaɏucha siya si tiɏuʼn buɏan. Gapu ta intullongchaʼn laleman chi alak, achipuncha ummogyat un lalupling si illintog chi Ari.
24 Gapu si pammati, si chummakeɏ pun si Moses, illissala un alakon chi byebyai un alak Pharaoh.
25 Ti un-ulloyola makaligligat kan cha tagun Apudyus lu ha lak-amola makaganggalas si byasuɏ si sin-akitan.
26 Imbilangla un lapotpotog chi makaligat gapu kan Kristu lu ha losan un kilabyaklang ud Egypt, ti lamlamaola chi gunggulan Apudyus si umaliʼn eɏgew.
27 Gapu si pammati, tilelan Moses ud Egypt un lappun ogyatla si sangan chi Ari. Ilan-alusala chi ligat un lilak-amla ti isun chi intullongla si Apudyus un achipun maila.
28 Gapu si pammati, imbilinla un ganggalasoncha Piyastan Lallausan ya imbilinla kan cha iyIsrael un weɏakgiyancha si chaɏan chi keɏlilu lap-at chi sawang chi byeɏoycha ta achipun chi Anghel chi Otoy otoyon cha panguɏun alak un leɏaki.
29 Gapu si pammati, chummemang cha iyIsrael ud Mancheɏaeg un Byeybyey un isun chi illoycha mammagan pita. Ngim pilachas pun cha iyEgypt un chumemang, laaludcha.
30 Gapu si pammati, liguɏ-ub chi bilatuʼn aɏed ud Jerico, si lagamputcha langangkalliguwan cha iyIsrael si pituʼn eɏgew.
31 Gapu si pammati, achipun lakakatoy si Rahab un puta si latoyan cha kailiyala un achipun lamati kan Apudyus. Ti limangilila cha libuun malamcheg si hachiʼn ili.
32 Achu pay chi makwaʼn ibyegak ngim umalay chi hachi, ti kumuɏang chi timpuk un mangug-uggud mipanggop kan cha Gideon, Barak, Samson, Jephthah, David, Samuel ya cha propeta.
33 Mipagapu si pammaticha, ilabyakcha cha gilubyatchaʼn ili, lalintog chi lantuturaycha ya ilawatcha ingkarin Apudyus. Gapu si pammaticha, pilaikomcha tupok cha layun,
34 cha uchum, achipuncha lasgob si gumilgillaub un apuy, ya lalisiyancha mapatoyancha si sabli. Lakapsutcha ngim kummoscheɏcha. Ked lambyalin cha kummoscheɏn lakagubyat ot pileɏyawcha cha susuɏchachun cha kakkaili.
35 Gapu si pammati, ilawat cha uchum un byebbyebyai cha latagu kasin un kabyeɏoychaʼn latoy.
Ngim illinggew cha uchum un tagu un lapampaligatan inggala latoycha, issancha un mawayawayaan ti lamlamaoncha labibbiɏuʼn biyeg si umuliyancha mataguwan kasin.
36 Cha uchum, laam-amsiwcha ya labyaubyautancha, ked cha uchum lakawaɏancha ya laibyaɏudcha.
37 Labinbintuk cha uchum inggala latoycha, lalagachi langkadwa cha uchum ya lapatoy cha uchum si sabli. Cha uchum gapu ta kapuscha, lapampaligatancha ya laam-amischa lalliklikwoscha un lansilup si kublit chi keɏlilu ya keɏching.
38 Lalliklikwoscha si lugeɏ un lappun ummili ya si bibbilig ya lilliyang ya abut chi pita. Achipun lumbong cha tagu utla lubung un makikadwa kan chicha.
39 Losan cha ked bibiɏu maibyegbyega kan chicha gapu si pammaticha ngim achipun cha laawat chi ingkarin Apudyus.
40 Ti awed chi labibbiɏun byaleg un simsimmok Apudyus para kan chitaku losan. Ha panggopla ked kadwa taku chicha un umawat si katungpaɏan chi ingkarila ta mambyalilola chicha lappun langkuɏangancha.