4
1 Ńna gɛ Ɩsɔ́ɔ‑dɛ́ɛ Kezeŋa wooboná Yeésu tɛɛwʊ́lɔɔ́‑daá sɩsɩ ɩyɩ́ yɩ kɔdɔ́sɩ.
2 Wɔjɔ́ɔ wɛ́ nɛɛ́lɛ nuvoowú na ɩdaawʊ́ ideɖi ɩdɔnyɔ́ɔ wɔ́rɔ́ nɛ́, ngɛ nyɔɔ́sɩ waalá yɩ.
3 Ngɛ woogódúu ɩjɔ́ kɩtɔ́ yɩ sɩsɩ: «A nyɛ́gɛ́ɛ , tɔ bɔ́ ana abɩ́sɩ kíɖíím nɖi.»
4 Amá Yeésu woobúsi kɩ sɩsɩ: «Baaŋmáa Ɩsɔ́ɔ‑dɛ́ɛ tɔ́m tákarɩɖá‑daá sɩsɩ bɩdɛkɛ́ɛ kiɖíím riké gɛ ɩrʊ́ wéndíi na ɩcɔ́ɔ weezuú‑daá, bɩ́nbɔɔzɩ́ ŋmatɩrɛ rɩ́ŋa ɖɩ́nlɩɩnáa Ɩsɔ́ɔ nɔɔ́‑daá nɛ́ ɖʊɖɔ.»
5 Ńna gɛ wooboná Yeésu Yerusalɛ́m Ɩsɔ́ɔ‑dɛ́ɛ tɛ́ɛ́dɩ‑daá, ɩdɛ́ɛ ɖaána kʊjʊʊ́‑daá.
6 Ngɛ kɩɩdɔ́ yɩ sɩsɩ: «A nyɛ́gɛ́ɛ Ɩsɔ́ɔ Biyaalʊ́, tɔ nyádɩ nzúu adɛ, káma baaŋmáa Ɩsɔ́ɔ‑dɛ́ɛ tɔ́m tákarɩɖá‑daá sɩsɩ:
"Ɩsɔ́ɔ wánváa ɩdɛ́ɛ malááyɩ́kawá wɛ́ɖɛ
sɩsɩ bɛkpɛ́kɩ nya banʊ́ʊ́zɩ‑daá
na nyánʊvɔ́ íkótuúli bɔ́''».
7 Ńna gɛ Yeésu wɔɔdɔ́ kɩ sɩsɩ: «Baadáŋmáa Ɩsɔ́ɔ‑dɛ́ɛ tɔ́m tákarɩɖá‑daá sɩsɩ: "ńdánɖáázɩ Nyádʊ́ʊ Ɩsɔ́ɔ nbɛ́ɛ sɩsɩ wánbɩɩzɩ́?''»
8 waadásɩ kiboná yɩ bʊ́ʊ kʊ́bɔńgɩ nakɩ́rɩ kʊjʊʊ́‑daá, ngɛ kɩɩwɩ́lɩ yɩ ɖúúlínya rɩ́ŋa na kɩdɛ́ɛ ásícé,
9 ngɛ kɩɩdɔ́ yɩ sɩsɩ: «A nyáágá nyáɖʊná‑rɔ ngúu ma tɛ́ɛ́dɩ, mánváa nya bɩrɩ́ŋa.»
10 Ńna gɛ Yeésu wɔɔdɔ́ kɩ sɩsɩ: «Laná ma bolíni, Sitáánɩ! Káma baaŋmáa Ɩsɔ́ɔ‑dɛ́ɛ tɔ́m tákarɩɖá‑daá sɩsɩ: "Nyádʊ́ʊ Ɩsɔ́ɔ riké gɛ nyónguú tɛ́ɛ́dɩ, bɩka iriké gɛ nyánlám bɔwʊtá.''»
11 Ńna gɛ sitáánɩ wɛɛɖɛ́ɛ kiyéle yɩ. Ngɛ malááyɩ́kawá woogódúu Yeésu‑jɔ́ balá yɩ bɔwʊtá.
12 Yeésu waanɩ́ɩ sɩsɩ bɔɔdɔ Yaayá sáráka. Waanɩ́ɩ bɩlɛ́ nɛ́, ngɛ waalɩ́ɩ ńna ɩɖɛ́ɛ Galilée.
13 Amá idokúti ɩcɔ́ɔ Nazarɛ́tɩ, wɛɛɖɛ́ɛ ɩcɔ́ɔ Kapɛrnawúm lɩɩrɛ́ kʊ́bɔ́nɖɛ‑jɔ́, Zabulɔ́nɩ na Nɛfɩtalí bɛdɛ́ɛ ladásɩ‑daá,
14 na wenti Esáya waaŋmátɩ sɩsɩ:
15 «Zabulɔ́nɩ‑dɛ́ɛ laadɔ́ɔ na Nɛfɩtalíi‑dɛ́ɛ laadɔ́ɔ
mɩ́dɩ́láána tenkú, na yɔrɔdáánɩ buwá‑dɛ́ɛ fɔɔlʊʊ́ kɩɩganáa nɛ́,
Nyɔ́ɔ́ Galilée, ɩráa bɛdɛkɛ́ɛ Yahúɖúwá nɛ́ bɛdɛ́ɛ tɛ́ɛ́dɩ,
16 Zamɔ́ɔ kɩwɛ temeenuú‑daá nɛ́
kɩɩna ɖɛnyɛm kʊ́bɔńgɩ,
bɩka ɖɛnyɛm ɩɖʊ kɩlɩ́ɩ
sɩ́m‑dɛ́ɛ temeenuú tɛ́ɛ́dɩ‑daá» nɛ́, ikóódi.
17 Bɩdɩ́ŋa‑rɔ gɛ Yeésu waabáázɩ waázu lám sɩsɩ: «Ɩgɛ́ɛ mɩ́lákásɩ, káma Ɩsɔ́ɔ‑dɛ́ɛ waajʊʊná.»
18 Waadála Galilée tenkú nɔɔ́‑jɔ́ nɛ́, ngɛ waana ɩráa nɔwɔ́lɛ ɩrʊ́ na igoobú bɔ́nlɔ́ɔ biruú, káma bɛgɛ́ɛ biríni lɔɔráa gɛ; ɩráa bɛḿ bayɩrá gɛ Simɔ́ɔ́nɩ weení baava yɩ yɩ́ɖɛ sɩsɩ nɛ́, na Andirée.
19 Ngɛ Yeésu wɔɔdɔ́ wɛ sɩsɩ: «Igóvú ma bɩka mabɩsɩná mɩ́ɩ wenbá bánÿaá ɩráa sɩsɩ bófú ma nɛ́.»
20 Ńna‑ńna gɛ beeyéle biríni bofu yɩ.
21 Woodúu bolíni nɛ́, ngɛ waana koobíya nɔwɔ́lɛ: banáábɩ́lɛ́ Yaakúbu Zebedée biyaalʊ́ na igoobú Yuháánɩ bɔwɛ bɛdɛ́ɛ kpɩ́ɩ́rʊ́ʊ‑daá, bána bajaa Zebedée bɔ́nnyɔɔzɩ́ bɛdɛ́ɛ biríni. Ngɛ waayáa wɛ.
22 Ńna‑ńna gɛ beeyéle bɛdɛ́ɛ kpɩ́ɩ́rʊ́ʊ na bajaa bofu yɩ.
23 Ngɛ Yeésu woobó wéngilím Galilée laadɔ́ɔ rɩ́ŋa‑daá wánwɩlɩ́ɩ ɩráa Ɩsɔ́ɔ‑dɛ́ɛ tɔ́m , wénveerím wɛ Ɩsɔ́ɔ‑dɛ́ɛ ‑dɛ́ɛ Laabáárʊ Kífeńgi bɩka wánwaazɩ́ ɩráa‑dɛ́ɛ kʊdɔmɩ́nɩ báa wentí na bɛdɛ́ɛ mádáfɩ́yátɩ.
24 Ɩráa waanɩ́ɩ bánŋmatɩ́ Yeésu‑dɛ́ɛ tɔ́m Siríi tɛ́ɛ́dɩwá rɩ́ŋa‑daá, ngɛ bɔ́ngɔgɔná yɩ wenbá barɩ́ŋa bɛ́nÿɛlɛ́m nɛ́, na kʊdɔndɩnáa na wenbá zííniwá wánjaarɩ́ wɛ nɛ́, kazála‑dɛ́ɛ́dɩ‑dɩnáa na gaala‑gáálásɩ, bɩka Yeésu wánwaazɩ́ wɛ.
25 Zamɔ́ɔ kʊ́bɔ́ngɩ fóóna kʊ yɩ. Badaá nɛbɛ́rɛ waagálɩ́ɩ́ná Galilée na tɛ́ɛ́dɩwá fuú tɩdamáa nɛ́, na Yerusalɛ́m na Yudée na Yɔrɔdánɩ buwa‑dɛ́ɛ fɔlʊʊ́ kɩɩganáa.