23
1 Unu l'onye bụ ishi -tụko
nọdu abya erigba nri;
makwarụ ẹgube onye gụ l'iya nọ.
2 Wokwaru mma dabẹ
onwongu l'ẹkpiri mẹ
ị -bụru onye ẹkpiri.
3 B'aphụkwaru nri,
ọonu ngu kpaakpaakpaa;
kẹle nri ono bụkwa nri
ọhutama.
4 B'emebyishikwa onwongu lẹ
g'ii-me nweru iphe.
Makwarụ iphe jetajẹ ghaa
ẹnya.
5 Kẹle ẹku abụjekwaru:
a -bya ajị ẹnya birimu
l'ọ bụwaru phuchamu.
Ẹphe asashịchaa ẹ́bà g'ugo
phehuchaa pheba
l'akpaminigwe.
6 B'erijekwa nri, onye ụswara
shiru; mbụ g'ẹguru iphe,
o shiru ta agụjekwa ngu ẹgu;
7 kẹle ọ kwa g'ọriri,
dụ iya bụ g'ọ gbaru.
Ọo-ngụkpokwaru ngu nri
sụ ngu: “Riarọ nri!
Nggẹro ngụa!”
Ọle iphe ono, oopfu ono bẹ
oopfukọta l'eli ọnu.
8 I -ria ya bẹ ịi-gbọkwa
nwọphu i riru.
Ajaja, ị jaru iya abụru ngu
ọla-l'iswi.
9 B'epfujekwa opfu yeru ọmata;
kẹle oo-wokwaru
mmamiphe ono,
shi ngu l'ọnu ono nmaa
phulaphula.
10 Ta aphọfukwa mkpuma,
a kpọberu e -shi lẹ
ndiche gude kpaa
oke alị.
Ọphu i gbuswetakwa ókè
bahụ l'alị onye nna
iya anọedu;
11 kẹle onye agbarụ iya mkpu
shihunụkakwaru ike.
O je l'e-mechakwaa gbaaru
iya ọdzori.
12 Ngabẹje nchị nwụta iphe,
eezi ngu.
Mbụ-a; wojeru nchị gboberu
opfu onye maru iphe.
13 B'ahakwa ahụ̀ nwata ahụ̀hù,
gbaru iya nụ;
l'ọ tọo nwụhukwa mẹ
i chia ya iphe.
14 Chia ya rọ ẹchachi dzọtachia
ndzụ iya g'ọ tọ la maa.
15 Nwa mu; iphe, e-me g'ẹhu
tsọo mu ụtso
bụkwa l'ị bụ onye maru
iphe.
16 Mbụ l'ime obu mu bẹ ẹhu
a-tsọ ntụmatu
mẹ ọnu ngu -nọdu epfuje-a
iphe, pfụru nhamụnha.
17 B'ekwekwa g'i gude obu ngu
koaharụ ndu iphe-ẹji
okophoo.
Iphe, a-nọduje evu ngu
evuvu bụchikwaaru
atsụ Chipfu ebvu.
18 Noo l'ị maru l'iphu a-dụru
ngu lẹ ree.
Ọphu iphe ono, agụ ngu nụ
ono ejedu mgbabirishi.
19 Ngabẹ nchị nwa mu;
maru iphe.
Wojeru obu dobe l'ụzo,
pfụru ọto.
20 B'etsokwa ndu ngụnukaru mẹe;
ọzoo ndu rinụkaru nri.
21 Kẹle ndu ngụnukaru mẹe
yẹe ndu ẹkpiri akpajẹkwa
nri.
Mbụ l'ẹnyiru e-mechakwaa
nmabẹ phẹ nkịrika
ẹkwa.
22 Ngabẹjeru nna ngu nchị;
mbụ onye ono,
bụ iya yeru ime
ngu ono.
Ọphu ị sụkwa lẹ ne ngu ta
adụedu iphe,
ị gụberu iya opfu l'ọ
bụwaa ọgerenya.
23 Zụta ire-lanụ! Be rephukwa
iya azụ!
Maru iphe! Bụru onye a hụ̀ru
àhụ̀hù;
yẹe onye iphe
edoje ẹnya.
24 Nna onye pfụberekoto bẹ ẹhu
atsọje ụtso shii.
Tẹme onye maru iphe nọdu
adụje onye nwụru iya
nụ ree.
25 Gẹ nna ngu yẹe ne ngu
tekwaa ẹswa ẹhu ngu!
Mbụ-a; g'onye ono,
hụru mgbụ ngu ono
tekwaa ebvu ẹhu ngu!
26 Nwa mu; worurọ ọkpoma
ngu nụ mu!
G'ẹnya dụnu ngu l'iphemiphe,
mu eme.
27 Kẹle nwanyị-ovuọba bụkwa
iduma,
dalahụru tukirima.
Nwanyị, eme ẹji bụru obvu,
tụru ẹnu omilomi.
28 Ọ kwa gẹ ndu abalidebvu
akwabẹjeru nemadzụ
l'ẹgbudu-a bụ
g'ọonoduje kwabẹ.
Tẹme ọ nọdu emeje gẹ ndu
e gudedu ire phẹ ẹka
paa igwerigwe
l'echilabọ ụnwu-eliphe.
29 ?Bụ onye bụ onye a tụru
ọnu?
?Bụ onye anọduje agụ aphụ?
?Bụ onye esephe opfu opfu?
?Bụ onye epfuphe l'e mee ya
ọphuu mee ya ọphuu?
?Bụ onye bẹ eemekajẹ
iphe-ẹheni?
?Bụ onye bẹ ẹnya eke
meemee?
30 Ọo ndu anọje ẹriri
nggẹringge lẹ mẹe.
Ndu etsojeru aghaphe achọ
mẹe, a gwagheru
agwaghe.
31 Te elejekwa mẹe ẹnya teke
ooke uswe-uswe;
teke ọota kpịtikpiti l'okoro,
e yeru iya;
teke ọ tọru nwẹhu alwa
kpẹtee.
32 E -mechaa bẹ ọotaje ẹru
g'agwọ.
Ẹru iya nọdu ereje ire
g'ẹru ogiji.
33 Noo teke ẹnya ngu a-wata
ahụma iphe, dụ ọduge.
Egomunggo ngu awata arị
iphe, gbachịru ẹnya.
34 Noo teke ịi-dụ g'onye zẹ azẹe
l'echilabọ eze-ẹnyimu;
mbụ g'onye zẹ l'eli iphe,
e bvuberu l'eli
ụgbo-mini.
35 L'ị wata ara sụ: “Ẹphe
etsugbua mu-o!
Ọle e te mekakwaru
mu iphe.
Ẹphe etsukwa mu otsukputu;
ọle o to rwudu mu l'ẹhu.
?Bụ teke ole bẹ mu
a-gbalihukpọo?
Mu -gbẹshi bẹ mu a-watakwa
achọ mẹe ọzo.”