24
1 B'ekokwaru ndu anọduje
eme ẹjo-ememe okophoo!
G'ọgbo phẹ b'agụjekwa ngu
ẹgu etsotso!
2 Kẹle obu phẹ anọduje achị
idzu mkpamẹhu.
Ọ bụerupho eme opfu bẹ
ẹphe egudeje ọnu phẹ
achị idzu iya.
3 Ọo mmamiphe bẹ eegudeje
akpụ ụlo.
Ọ bụru nkwamẹnya bẹ eegudeje
mee ya g'o shihu ike.
4 Ọ bụru egomunggo bẹ eegudeje
dozia ọma-ụlo iya;
chịru ngwa-ụlo, ere ire;
tẹme ọ nọdu ama mma
gude dozia ya.
5 Onye maru iphe bẹ ike
dụkwa shii.
Onye nweru egomunggo
nọdu anọduje anwụta
iphe tekenteke.
6 Ị -nọdu abya eje ọgu bẹ onye
ịi-nọdu ele ẹnya iya bụ
onye e-goshi ngu iphe,
ii-me.
Teke ọ dụkwanu ngu g'i
mekpee ndu unu
l'ẹphe alwụ ọgu;
ndu ịi-nọdu ele ẹnya phẹ
abụru ndu a-nọdu
akpọ-ziru ngu ụzo.
7 Mmamiphe panụkakwaru
phengara l'ẹhu
onye-eswe.
O -jee l'ẹka e dzuru opfu
l'edupfu;
o to nweduru ọnu-opfu.
8 Onye anọduje achị idzu
ẹjo-iphe tekenteke
bẹ aa-sụ l'ọ bụ onye
ẹregede.
9 Achị idzu eme eswe bụ iphe-ẹji.
Ọphu onye mgbọnu adụjedu
ndiphe ree.
10 Ike -adụdu ngu teke iije
iphe-ẹhuka bẹ ị dụkwa
arwụhu ọkpobe adụdu.
11 Dzọtanu ndu a kpụ eje
egbugbu.
Sephunu phẹ azụ;
mbụ ndu ono l'akpọ
galagala eje ala l'ẹka
aa-phụ phẹ tẹrii ono.
12 Teke ị sụru: “?Anyi
makwanụru iphe,
eme nụ?”
bẹ onye ono, enyoje obu
nemadzụ ono manarụ-a
iphe, iime.
Onye ono, bụ iya edozi ndzụ
ngu ono manụrupho iphe,
eme nụ.
Ọ bụru iya e-mechaa pfụa
onyemonye ụgwo g'iphe,
o meru gbaru.
13 Rije manụ-ẹnwu; nwa mu;
kẹle ọ dụ ree.
Mbụ lẹ manụ-ẹnwu,
e metaru l'ẹbakala-ẹnwu
a-tsọ ngu ụtso l'ọnu
shingushingu.
14 Makwarupho lẹ mmamiphe
dụ ree lẹ ndzụ ngu.
Ị -maru iphe bẹ obunggo
dụkwaru ngu iya.
Ọphu iphe ono, agụ ngu nụ
ono ejedụ mgbabirishi.
15 Sụ-a; gụbe onye ẹjo-iphe;
b'ejekwa ibe onye
pfụberekoto je
akwageberu iya;
ọphu i jekwa ibe iya je iya
akwagwo!
16 Kẹle onye pfụberekoto -dakwaa
iko mẹ ọ -daru ugbo ẹsaa;
ọ gbalihujekwaphọ.
Obenu l'onye ẹjo-iphe bụ
ọla-l'iswi akwatsuje iya.
17 G'ọ tọ tsọjekwa ngu ụtso
l'onye opfu ngu daru.
Ọphu i tekwa ẹswa l'ọkpoma
ngu l'ụpfu dụru iya.
18 Ọdumeka bẹ Chipfu
a-nụmakwa ọchi ono
ịichi iya ono;
l'ọ dụ iya ẹji;
l'ọ parụ onye ono haa;
ọ tọ dụedu iphe,
o mekwadụ iya.
19 G'iphe, eme l'ẹhu ndu
eme ẹjo-ememe te
erwujekwa ngu l'ẹhu.
Ọphu i kojekwaru ndu
ẹjo-iphe okophoo.
20 Kẹle onye ẹjo-ememe be e tee
bukwa obunggo-ọma.
Tẹme orọku onye ẹjo-iphe je
l'eme tsụrikitiki.
21 Nwa mu; tsụjekwa Chipfu
ebvu;
l'ịitsukwapho
onye eze ebvu.
Ọphu i tsokwa ndu
ekwefujeru phẹ ike;
22 kẹle Chipfu yẹe onye eze
ono bẹ e-mekwa
g'ọla-l'iswi tụ ngu l'ụpfu.
?Bụ onye maru gẹ mgbupya
phẹ e-jeberu phẹ
l'ẹhu?
23 Ndu ọwa-a bụkwapho opfu,
shikwaphọ ndu
mmamiphe l'ọnu:
Abọ nemadzụ ẹbo mẹ
a -nọdu ekpe ikpe ta
adụkwa ree.
24 Mbụ l'onye sarụ ọnu sụ
onye-ikpe nmarụ l'ọo ya bẹ
iswi dụ mma
bẹ ee-phukwa iphu lẹ
mkpụkpu lẹ mkpụkpu;
tẹme ọhamoha ajịkakota
iya.
25 Obenu l'ọo-dụru ndu ono
lẹ ree;
mbụ ndu ekpeje ikpe nmaa
ya onye o rwuberu.
Ndu ono bẹ ee-kebe l'ọma
ọkpobe ekebe.
26 Epfu ire-lanụ gude yee
ọnu l'opfu bụkwa
n-yemobu bẹ ọ bụ.
27 Vukpọadaru ụzo jechaa ozi,
dụru ngu l'etezi;
L'ị bya ejeẹbekpoo ozi,
dụru ngu l'ẹgu;
tẹme l'ị watawarọ akpụ
ụlo ngu.
28 B'agbakwaru nwibe ngu ekebe
l'ẹbe ọ dụ iphe,
o meru.
Ọphu i gudekwa ọnu ngu ono
duphua nemadzụ.
29 B'asụkwa l'ii-melata iya iphe,
o meru ngu;
l'ịi-pfụ nwoke ono ụgwo
iphe, o meru.
30 Mu ghatajẹru ẹka onye
ẹnyiru kọru opfu.
Mbụ lẹ mu jeru je eshisweta
opfu-vayịnu onye
enwedu egomunggo.
31 Ọ tụkoepho ẹkameka fukọta
ẹwu-óbvú kẹ garawuu.
Tẹme ẹswa mmanụ tụko opfu
ọbu nata.
Igbulọ mkpuma, e shi gude
gbaa ya mgbabu
dakashihụchawaa.
32 Mu bya awata arị iphe ono,
mu hụmaru ono l'ime
ọkpoma mu;
bya egude iphe ono,
mu hụmaru ono gude
nwụta iphe.
33 L'ọ bụ: I -kua mgbẹnya
nwanshịi;
mgbẹnya rwee ngu
nwanshịi.
Mbụ-a; ị -chikọbe ẹka
nwanshịi sụ g'ị
tụta unme;
34 akpa nri afụaru ngu g'onye
abalidebvu byaru
ibe iya.
Mbụ ẹjeka adụe ngu phọ
g'onye nwoke ibe iya
chị ngwọgu bapfuta.