22
1 Ọkpobe ẹpha kakwa ree
ahata eme l'enweru iphe,
parụ ẹka.
Tẹme eme odoo ka
mkpọla-ọchaa yẹle
mkpọla-ododo ree.
2 Iphe lanụ, dụ l'ẹhu
onye nweru iphe bya adụ
l'ẹhu onye akpa nri
bụ l'ọo Chipfu mekọtaru
ẹphenebo.
3 Onye nweru egomunggo
ahụmaje iphe, bụ ẹjo-ememe
domia onwiya.
Obenu onye amazidu iphe
anọdujeepho eje dukuu
dukuu g'ooje jeye l'ọdalahu
l'iphe-ẹhuka, nọ iya nụ.
4 Ewoze onwonye alị yẹe atsụ
Chipfu ebvu l'emeje
g'e nweru iphe;
tẹme ọ nọdu emeje g'a
kwabẹ amadụ ùbvù bya
emekwaphọ g'e nweru ndzụ.
5 Iphe, a tọru l'ụzo, onye
ẹjo-iphe eshi bụkwa
óbvú yẹle ọ́nyà.
Obenu l'onye eche ndzụ
iya nche bẹ anọduje
iphemiphe ono ụzenya.
6 Zia nwata ụzo, gbaru iya
l'eshishi.
Ọ -bụerupho ọgerenya;
ọ tọ byadu aha iya ahaha.
7 Ọo onye nweru iphe abụjeru
ishi onye akpa nri.
Tẹme ọ bụru onye ji ụgwo
abụjeru onye-ozi onye
o jitarụ iya.
8 Onye akụ eme ẹjo-iphe
g'akpụru iphe bẹ bụ iphe,
ọonoduje awọko bụ iphe-ẹji.
Tẹme mgbọro ẹhu-eghu,
ọ pa e-mechaa darwua alị.
9 Onye eme iphe-ọma shii bẹ
aa-gọru ọnu-ọma nụ;
kẹle oowojeru nri iya
ekeru ndu ụkpa.
10 A -chịa onye mgbọnu;
opfu alaa.
11 Onye yeru ọkpoma charachara
obu;
tẹme opfu iya nọdu adụje
bẹlebele bẹ e-shita onye
eze ọ̀nyà.
12 Chipfu anọduje eleta ẹnya g'ọ
tọ dụ iphe, e-me onye
maru iphe.
Obenu l'opfu onye eegudedu
ire iya ẹka bẹ oomeje
g'ọ tọ dụ iphe, ọo-bụ.
13 Onye ẹnyiru asụje:
“Tụswekwa! Oduma
nọkwa l'ụzo!
Oo-gbukwa mu mẹ mu lụfu
gbororo!”
14 Ọnu nwanyị ovuọba bụkwa
iduma, dụ wukirima.
Ọ bụru onye Chipfu atukoshi
oke ẹhu-eghu iya
a-daba iya.
15 Eme eswe swekọkwaru
onwiya nọdu l'ọkpoma
nwatanshịi.
Ọ bụru ẹchachi, e gude ahụ̀
iya ahụ̀hù l'a-chị-mihu
iya g'ọ tọ dụhe iya.
16 Onye eme onye ụkpa ewere
gẹ ya a-ka enweru iphe;
yẹle onye anọduje anụ
ndu nweru iphe iphe;
e-mechaa tụko bụru
ndu ụkpa.
Akpụru opfu ụkporo l'iri,
shi l'ọnu ndu maru iphe
17 Ngabẹ nchị nụma olu-opfu
ndu maru iphe.
L'i woru ọkpoma ngu kpọru
ye l'iphe, mu ezi.
18 Noo kẹle ọo-dụru ngu lẹ ree
mẹ i woru iya dobe l'ime
ọkpoma ngu.
L'ị kpụkwaru iya phọ l'ọnu
tekenteke.
19 Ọo ya bụ k'ọphu ịi-kporu obu
yeru Chipfu.
Ọ kwa mu ezi gụbedua
gẹdegede iphe ntanụ.
20 Ẹtu ẹtu ọbu, mu ezi ọbu bẹ
mu dekwaru edede l'ẹkwo
deta iya ụkporo l'iri;
mbụ akpụru-opfu,
l'agba amadụ unme;
tẹme ọ bụru opfu, bụ:
i -mee ya l'ọ dụru ngu
lẹ ree.
21 Ọ bụ opfu, mu pfuru gude zia
ngu ọkpobe opfu;
yẹe opfu, gbaru k'adakobe;
k'ọphu ịi-maru ọkpobe ọnu,
ii-yeru onye ziru ngu nụ.
22 B'anakwa onye ụkpa nwọphu
o nweru opfu l'ọ tọ dụdu
g'ọ dụ iya.
Ọphu i gwekwa onye iphe-ẹhuka
byaru arakabya l'ụlo-ikpe.
23 Kẹle Chipfu e-mechakwaa
gbaaru phẹ ọdzori;
gude ndu ono,
shi ana phẹ nfụ ono nalata
phẹ nfụ nkephẹ.
24 Gẹ gụ l'onye obu-ọku te
eshikwa ọ̀nyà.
Ọphu unu l'onye ẹhu eghuje
eghu ẹgwegwa
aswịkwa ọswi.
25 Ọ -dumeka bẹ ịi-nwụkwa
ẹka iya; l'i je adalahụ l'iphe,
ị gbadụru ẹnya iya.
26 B'abụkwaru onye eyeje ẹka
l'eye iphe l'itumo.
Ọzoo onye anajẹ oji-ụgwo
mkpalẹka;
27 kẹle i nwedu iphe,
ii-gude pfụa ya;
bẹ aa-pachakwa paa iphe,
ị zẹje azẹe.
28 Ta aphọfukwa mkpuma
ndiche unu phẹ gude
kpaa oke alị.
29 Ị -hụmakpoo onye chịru ụpfu
yee l'ozi, ooje ejeshi iya ike;
maẹrupho l'oo-mecha jeeru
ndu eze ozi.
O too jeduru ndu aamadụ
ẹpha phẹ ozi.