21
1 Ọkpoma onye eze
bụkwa nggele, nọ l'ẹka Chipfu,
bụ ẹka Chipfu sụru g'ọ
sọru shia bẹ ooshije.
2 Iphemiphe, nemadzụ eme
apfụjeru nhamụnha
l'ẹnya onye ọbu.
Obenu l'ọo Chipfu maru obu
onyemonye.
3 Eme iphe, dụ ree bya apfụru
nhamụnha bẹ Chipfu
kakwa anata eme l'egweru
ngwẹja nụ iya.
4 Ekobe ẹnya l'eli waa ekunuka
onwonye; mbụ ororo,
ndu ẹjo-iphe
atụ bụkotakwa iphe-ẹji
l'iphu Chipfu.
5 Iphe, onye akanya chịru idzu
ememe bẹ eeritajẹ urwu.
Nokwaphọ g'achị iphe ọku
atụje ụkpa.
6 Ẹku, a kparụ lẹ
tuphutuphutuphu ta
adụdu g'ọono-bejeru
l'oophukashịhu.
Tẹme ndu akpa ẹku l'ụzo,
dụ nno bụ ọnwu
bẹ ẹphe achọ.
7 Ọo ẹhuka ẹhuka,
ndu ẹjo-iphe eme bẹ
e-kpofu phẹ ekpofu.
Kẹle ẹphe jịkaru eme iphe,
pfụru nhamụnha.
8 Ndu ẹjo-iphe bẹ anọduje eshi
ụzo, apfụduru-ọto.
Obenu l'umere onye iswi
dụ mma apfụjeru
nhamụnha.
9 Ọ kakwa ree g'ị kwata je
eburu lẹ mgborụlo
eme lẹ gụ lẹ nwanyị,
anọduje abaphe mba
tekenteke bu l'ụlo.
10 Obu onye ẹjo-iphe bụepho
ẹjo-iphe anọduje evu
iya evuvu ememe.
Ọphu ọophujeduru ndu
ẹphe l'iya bu obutobu
obu-imemini.
11 A -hụ̀a onye mgbọnu ahụ̀hù;
onye amazidu iphe
egude iya nwụta iphe.
Teke ị kpọ-ziru onye maru
iphe ụzo;
yẹbedua l'onwiya egude
iya kabaa amaru iphe.
12 Onye ono, pfụberekoto ono
tụbekwaru nvọ l'iphe,
oo-me ụlo ndu ẹjo-iphe.
Mbụ l'ọopalitaje phẹ tụa gbaa;
ẹphe abụru mkpurupyata.
13 Onye tsuchiru nchị gẹ ya ta
nụma olu-ẹkwa onye ụkpa
l'a-ranaa nkiya ujiku lanụ;
ọ tọ dụdu onye angaru
iya nchị.
14 Iphe-ọma, e meru lẹ mpya
egboje ẹhu-eghu.
Tẹme ụphalazu, a phabẹru
l'uwe nụ nọdu
echinyịjekwapho oke
ẹhu-eghu.
15 E -kpee ikpe, pfụru ọto
bẹ ọotsoje ndu
pfụberekoto ụtso.
Ọ nọdu eyejekwanụ ndu
ẹjo-iphe ebvu.
16 Onye lekeberu ẹnya haa eshi
ụzo nkwamẹnya je
eshia ụzo ọzo
bụ ẹka oojeje atụtu unme
bụ l'ẹka ụnwu maa tụru
ndzukọ.
17 Onye yeru obu l'ẹmereme
l'e-mechaa kpaa nri.
Ọphu onye yenụkaru obu lẹ
mẹe yẹe manụ abyadụ
abụru onye nweru iphe.
18 Ndu ẹjo-iphe l'alajẹ l'ọchi ndu
pfụberekoto.
Nokwaphọ gẹ ndu e gudedu
ire phẹ ẹka adabajẹru
ndu obu phẹ gụru
ìphóró.
19 Ọ kakwa ree g'ị kwata je
eburu l'echiẹgu
eme l'ịilu nwanyị, gụ l'iya bụ;
ẹhu nọdu anọduje eghu
iya eghu;
ọ nọdu anọduje abaphe
mba tekenteke.
20 L'ụlo onye maru iphe bẹ
eenwejeru mkpuru,
ọkpobe nri dụ mẹ
ọkpobe manụ.
Obenu l'ọmata atụkoje iphe,
o nweru rifu.
21 Onye achị nta apfụbekoto
yẹe nta n-yemobu
l'achọtaje ndzụ.
L'ọokpaa ẹku bya abụru onye
akwabẹ ùbvù.
22 Onye maru iphe bẹ adụje ike
tsoo mkpụkpu onye
ike ọgu;
kwatsushia akpaa akpaa,
ẹphe kpọ-pheru
onwophẹ dakobe.
23 Onye eche ọnu iya nche bya
eche ire iya nche
bẹ ezehujeru ọla-l'iswi.
24 Onye eku onwiya bya etse
etsetse bẹ ẹpha iya bụ
onye mgbọnu.
Onye ono bẹ umere iya
l'ophu abụkotajeru
eku-onwonye
eku-onwonye.
25 Ọ kwa iphe, agụ onye ẹnyiru
egbuje iya;
kẹle ẹka iya ẹphenebo te
ekwedu eje ozi.
26 Mbọku-mbọku bụ iphe,
anọduje agụ iya nụ bụ
g'ọ kabaa enweru iphe.
Obenu l'onye pfụberekoto
emeje iphe-ọma mịa
ya ẹnya.
27 Ngwẹja, onye ẹjo-iphe
egwe bụkwa ẹbyi bẹ
ọonoduje eme.
Ọphu ọ bụro onye eje epfu
k'ọphu o gude ẹjo
egomunggo bya
egweeru iya.
28 Onye agba ekebe,
abụdu ọkpobe opfu
a-bụkwaru ọla-l'iswi.
Tẹme onye ngabẹru iya nchị
bẹ ee-mebyishikwa jasụ
l'ojejoje.
29 Onye ẹjo-iphe bẹ
agbanwụbeje iphu
ẹhuka ẹhuka.
Obenu l'onye obu iya gụru
ìphóró l'emeje g'ụzo iya
ngụru angụru.
30 Ọ tọ dụkwa mmamiphe;
ọzoo iphe edo ẹnya;
ọzoo idzu, aachị achịchi,
aa-sụ l'ọo g'e mee ya
mebata Chipfu.
31 Ịnya bụ iphe, e meru iya
kwabẹru bụ mbọku
eje ọgu.
Obenu l'onye bụ iya bụ l'e
mekpee l'ọgu ọbu
bụ Chipfu.