20
1 Onye mgbọnu bẹ mẹe bụ;
mbụ lẹ mẹe, atsụ atsụtsu
bụkwa onye aba hanyịhanyi.
Onye o duphuru ụzo ta
amakwa iphe.
2 Ẹhu -wata eghu eze eghu
bẹ ọodujekwa g'ẹka
oduma asụ ekiri.
Onye kpatsukwanụru iya iwe
tuphawaru ndzụ iya.
3 Onye agbalarụ opfu l'ụzo bẹ
ùbvù anọdujekwa etso.
Obenu l'ọo onye-eswe
akwagebeje akwagebe
aba mba.
4 Onye ẹnyiru ta akọjedu
opfu teke aakọje iya.
O -rwua l'akpakpa iya l'ọ
wata arwọ arwọ;
ọ tọ dụdu iphe, ọo-rwọta.
5 Iphe, nemadzụ rịru dobe
l'ọkpoma dụkwa g'ọ nọ
l'ogbu-mini.
Ọ bụru onye iphe edoje
ẹnya ree atsụtaje iya.
6 Ndu dụ igwerigwe asụje
l'ẹphe nweru n-yemobu.
Ọle ?bụ awe bẹ ịihumakwanu
onye apfụshije ike l'iphe,
o pfuru?
7 Onye pfụberekoto bẹ ụta ta
adụjedu l'iphemiphe,
oome.
Ọ -nọchaa laa; ụnwu iya
abụru ndu a gọru
ẹhu-ụtso nụ.
8 Onye eze -nọdu l'aba-eze iya
ekpe ikpe bẹ ọ hụmaje
ẹjo-iphe hụbe
iya ama.
9 ?Bụ onye a-sụ l'obu dụebe iya
sarịsari;
lẹ ya dụebe ree ọphu ya
teke meswee iphe-ẹji?
10 E -gude iphe-ụghoshi gude
atụ ẹrwa iphe;
ọzoo atụ ogologo iya
bụkotaepho ẹbyi l'ẹnya
Chipfu.
11 Ọo umere nwa atụje ọnu iya.
Oomeje g'a maru ?umere
iya guru egugu bya
apfụru nhamụnha?
12 Nchị, anụ iphe; yẹe ẹnya,
aphụ ụzo
bụ Chipfu tụkoru iya mee.
13 Gẹ mgbẹnya ta atsọnukajekwa
ngu ụtso;
ọdumeka bẹ ịi-kpakwa nri.
Nwụjeru ẹnya;
hụma l'ii-nweru nri
nweru k'etsutsu iya.
14 Onye azụ aswa asụje l'aswa,
ọozu renụkaru ire.
Ọle ọ -tụgbuepho l'o gude
iphe ọbu,
ọ zụru ọbu kuahaa onwiya.
15 Mkpọla-ododo dụ; mkpuma,
oke aswa dụ tụko
ẹkameka.
Obenu l'ọnu, epfu opfu,
egoshi mmamiphe
bụkwa ọ-dụ-ụko-lẹ-mba.
16 Nemadzụ -sụ l'ọo onye ọ
madụ bẹ ya a-nọduru l'itumo;
natakwa iya uwe iya.
Gudeshikwaa ya mẹ ọ -bụru
onye ọhozo bẹ ọ nọru
l'itumo ọbu.
17 Nri, a kparụ l'ụgho atsọje ụtso
mẹ a -nọdu eri iya.
Ọle e -mechaẹpho;
ọnu abụru onye riru
iya nụ ẹjirija.
18 Ị -nọdu achị idzu iphe, ii-me;
kpajẹada ishi.
Teke ịibya eje ọgu;
kpaada ishi g'e goshi ngu
g'ii-me iya.
19 Onye asụ asụlasu l'edoje
iphe, a sụru iya g'ọ tọ
dụkwa onye oo-doru
iya.
Ọo ya bụ; ị -hụma onye
phenụkaru opfu;
kparụ iya l'aphara.
20 Onye ephu nna iya;
ọzoo ne iya iphu bẹ ọku,
ọ gụtaru a-nahụkwa iya
nyịhu l'echi abalị-ishi.
21 Ẹku, a kparụ lẹ gburugburu
ta abụkwaru onye
kparụ iya nụ iphe-ọma
l'ikpazụ iya.
22 B'asụkwa l'ọo gụbedua l'a-pfụ
nemadzụ ụgwo iphe-ẹji,
o meru ngu.
Nọdu kwabẹru Chipfu;
l'ọo ya a-dzọ ngu.
23 Ndu gude iphe-ụghoshi gude
atụ̀ ẹrwa iphe bụkwa
ẹbyi bẹ ẹphe eme
ekpu Chipfu.
Mbụ l'egude iphe-ẹregede atụ̀
ẹrwa iphe ta adụdu iya ree.
24 Eshinu ọ bụ Chipfu anọduje
akpọ-ziru nemadzụ ụzo;
?dẹnu gẹ nemadzụ
e-shi mee g'ụzo iya doo
ya ẹnya?
25 Ọ bụkwa agbaru onwonye
ọ́nyà mẹ nemadzụ dobe
iphe iche sụ l'ọ bụ kẹ
Chileke l'ẹbe ọ rị iya arịri.
E -mechaa; ọ taaha onwiya
ụta iphe ono,
o riburu nte iya ono.
26 Onye eze, maru iphe
aphụchaje ọha iya
g'onye aphụcha ẹswa ereshi
shi nno họshia ndu
ẹjo-iphe;
bya egude iphe, e gude
echi ereshi chia phẹ
pyakapyaka.
27 Obu nemadzụ bụkwa iya bụ
ọku orọku Chipfu.
Oogudeje iya avọfutagbaa
iphemiphe, dụ nemadzụ
l'ime.
28 Onye eze, yeru ndu ọ bụ eze
phẹ obu bya apfụbe ire iya
ọto l'iphu phẹ ta adụkwa
iphe-ọnuka,
emeje iya nụ.
Ọ bụru n-yemobu emeje
g'aba-eze iya ono
shihu dụngudungu.
29 Iphe, ụnwokorobya gude etu
onwophẹ ẹpha bụkwa
ike phẹ.
Ẹwó, dụ l'ishi bụkwanuru
iphe, ọgerenya gude
egbu nwịinwii.
30 Ọ kwa ẹka-nchị yẹe echibashị
ọ́nyá l'ẹhu bẹ eegudeje
safụ ẹjo-ememe;
mbụ l'ọo gbabụgbabu bẹ
e gude edozi ime
ọkpoma amadụ.