19
1 Onye bụ onye akpa nri
bya abụru onye ụta adụdu
lẹ ndzụ iya kakwa ree
eme l'ọmata,
eegudedu ire iya ẹka.
2 Ọ tọ dụkwa ree lẹ nemadzụ
bụ onye iphe ehe ihee
ọphu o madụ iphe.
Ọzoo gẹ nemadzụ gude eme
ẹgwegwa je eshiswee
ụzo.
3 Eswe, amadụ eme
emebyijekwa ndzụ iya;
e -mechaa l'o woru iya
bobe Chipfu.
4 Ẹku -nọdu abya bẹ ọ̀nyà
adụje igwe etso iya.
Obenu l'ụkpa achịkaje ọ̀nyà.
5 Onye agba ekebe,
abụdu ọkpobe opfu bẹ ta
anahụkwa g'o to je
iphe-ẹhuka iya.
Ọphu onye adzụje ụka aladu
mmanụ g'ọ tọ dụ iphe
e-me iya nụ.
6 Ikpoto nemadzụ anọduje
akpa ụzo g'ẹphe bụru
ndu dụ onye-ishi l'obu.
Tẹme onyemonye bụru
ọ̀nyà onye emejeru
nemadzụ iphe-ọma.
7 Onye akpa nri bẹ adụkotaje
ndu ẹphe l'iya bụ ashị.
Nokwaphọ gẹ ndu ẹphe l'iya
eshi ọ̀nyà anọduje
agbaru iya ọso.
Ọonodujekpoo agba etso
phẹ arwọ phẹ g'ẹphe shịru;
ọle ọ tọ dụedu onye ọphu
ọohuma.
8 Onye maru iphe eyeje onwiya
obu.
Tẹme ọ bụru onye iphe edoje
ẹnya ree bẹ k'ọma
etsoje.
9 Onye agba ekebe,
abụdu ọkpobe opfu bẹ ta
anahụkwa g'o to je
iphe-ẹhuka iya.
Tẹme onye adzụje ụka
l'a-bụkwaru ọla-l'iswi.
10 Ọ kwa g'ọ tọ dụdu nhamụnha
kẹ g'ọmata ri gwọogwoo
bụkwapho g'ọ kabaa ẹji
g'ohu bụru onye-ishi
ụnwu eze.
11 Ọ kwa mmamiphe amadụ
emeje g'ọ tarụ iphe nshi.
Ọ bụkwarupho onwiya bẹ
ookutse mẹ e -mee ya iphe-ẹji;
ọphu o yedụru iya
rọ ọnu.
12 Eze -wata aba mba bẹ
ọodujekwa g'ẹka oduma
asụ ekiri.
Obenu lẹ nemadzụ -dụ iya
l'obu bẹ ọoduje g'ẹka
iji dashịru l'eli ẹswa.
13 Nwa, eme eswe bụkwa
ọla-l'iswi bẹ ọ bụru
nna iya.
Nwanyị, anọduje abapheru
ji iya mba dụkwapho
gẹ mini-odzeru,
shi l'ẹswa-ụlo ada
paapaa.
14 Ụlo yẹle ẹku onye eshijekwa
l'onye nwe iya nụ sweru
nwa iya.
Obenu l'ọkpobe nwanyị bụ
Chipfu bẹ ooshije l'ẹka.
15 Ẹnyiru atụje oke mgbẹnya.
Ọ bụru onye eme ẹnyiru bẹ
ẹgu emeje.
16 Onye emeje iphe,
a sụru g'e meje bụkwa
ndzụ iya bẹ ooche
nche.
Obenu l'onye iphemiphe,
oome jiru ẹpho e-mechaa
nwụhu.
17 Onye emeru ndu ụkpa
iphe-ọma bụkwa
Chipfu bẹ oojie ụgwo.
Tẹme ọ bụru Chipfu
e-mechaa bua ya nggo
iphe, o meru.
18 Hụ̀je nwa ngu ahụ̀hù;
teke iile ẹnya l'ịi-hụ̀ta
iya iphe.
B'ejekwa egude g'ooghu ngu
l'ẹhu woru iya chigbua.
19 Ọ kwa onye obu-ọku
bẹ obu-ọku iya ebutajẹ.
Ị -dzọo ya lẹ nanụ;
bẹ ị dzọjenu iya phọ l'ọzo.
20 Nụjeru nemadzụ opfu;
ngabẹje nchị nata iphe,
aalọru ngu ẹka lẹ nchị iya;
l'e -mechaa bẹ ịi-bụru
onye maru iphe.
21 Amadụ enwejekwaru ikpoto
iphe,
ọonoduje arị k'ememe;
obenu l'ọo ọphu
Chipfu chịru dobe
mefụtaje.
22 Iphe, agụje ẹgu l'ẹhu
nemadzụ bụkwa eme
ree ya.
Ọ kakwa ree lẹ nemadzụ
bụ onye ụkpa eme l'ọ bụ
onye ntuphu-ire.
23 Atsụ Chipfu ebvu edujeru
amadụ duba lẹ ndzụ.
Ọ bụru teke ọ dụ nno bẹ
oojije onye ọbu ẹpho;
ọphu ọ dụdu ẹjo-iphe,
erwuje onye ọbu l'ẹhu.
24 Onye ẹnyiru abụjeru;
o -je etsuta nri;
ẹka akwaa ya l'ochi.
Ọ tọ dụedu ike apali iya
eye l'ọnu.
25 I -chia onye mgbọnu iphe;
onye amazidu iphe egude
iya nwụta iphe.
Teke ị barụ onye iphe
edoje ẹnya ree mba;
l'o gude iya kabaa amaru iphe.
26 Onye ana nna iya nfụ;
bya achịfuje ne iya
bụ iphe-iphere;
bya abụru mkpatsu-aphụ.
27 Nwa mu; ị -haa angabẹ
nchị l'iphe, eezi ngu;
l'i phua ụzo amaru iphe.
28 Onye agba ẹjo-ekebe achị
iphe, pfụru ọto ọchi.
Tẹme ọnu onye ẹjo-iphe
bụerupho ẹjo-ememe bẹ
ọonoduje elwee kwagbụu
kwagbụu.
29 Ndu njọ-opfu bẹ e dobeakwaru
iphe, ee-me phẹ edobe.
E dobeakwaphọ ẹchachi ala
l'okpurukpu ndu-eswe.