12
1 Onye aabarụ mba;
ọ dụ iya ree bụkwa
mmamiphe bẹ dụ iya ree.
Obenu l'onye ọ dụ ashị l'aahụ̀
iya ahụ̀hù ta amadụ
iphe.
2 Onye ọma bẹ tụbaru Chipfu
l'ẹnya.
Obenu lẹ Chipfu anmajẹ
onye ẹregede ikpe.
3 Nwoke ta abụkwa eme
ẹjo-iphe bẹ oo-gude ngụru
angụru.
Obenu l'onye pfụberekoto ta
adụdu onye e-phefu
iya ephefu.
4 Ọkpobe nwanyị bụkwa
okpu-eze,
ji iya kpu l'ishi.
Obenu l'ẹjo nwanyị dụ g'ọkpu,
rehuru erehuru nọ
ji iya l'ẹhu.
5 Iphe, ndu pfụberekoto tụberu
k'ememe abụjeru iphe,
pfụru nhamụnha.
Obenu l'ìdzù ndu ẹjo-iphe
achị bụkota ụghoshi.
6 Opfu onye ẹjo-iphe egepajẹru
egeparu achọ onye
oo-gbu.
Obenu l'olu-opfu onye obu
iya gụru ìphóró adzọje
ndzụ.
7 Ndu ẹjo-iphe bẹ ee-mechaa
mebyishikọta;
ẹphe achịhu.
Obenu l'ọnu-ụlo onye
pfụberekoto apfụjeru
jịmujimu.
8 Ọo gẹ nkwamẹnya
onyemonye jeberu bụ
g'aajabejeru iya ajaja.
Obenu l'onye bụ ẹjo-iphe
jiru iya obu bẹ a ta
agụbejedu iphe.
9 Ọ kakwa ree l'ị bụ onye
a gụbeduru iphe;
i nwekanụru onye-ozi;
eme l'ị gụberu onwongu
iphe l'ẹbe ọ dụ nri,
i nweru.
10 Onye pfụberekoto
agụbeje iphe lẹ mkpa,
dụru anụ,
o nweru l'ibe iya.
Obenu l'obu-imemini,
onye ẹjo-iphe aphụjeeru
phẹ bụ adụru phẹ ẹhuka.
11 Onye jeru ozi l'alị iya bẹ nri
a-dụru dụa k'etsutsu iya.
Obenu l'onye achị
iphe-iphoro ọso te nwedu
egomunggo.
12 Onye ẹjo-iphe bẹ iphe,
ndu ẹjo-ememe narụ lẹ nfụ
anọduje agụ ẹgu.
Obenu l'ọgbarabvu onye
pfụberekoto anọduje
abya pulapula.
13 Onye ẹjo-ememe bẹ ẹjo-epfupfu,
oogudeje ọnu iya epfu anmajẹ
g'ọ́nyà.
Obenu l'onye pfụberekoto
anahụje iphe-ẹhuka.
14 Nemadzụ egudeje
opfu-ọnu pfutaru onwiya
iphe-ọma.
Nokwaphọ g'oogudeje iphe,
oome l'ẹka metaru onwiya
obunggo.
15 Iphemiphe, onye-eswe eme
adụje iya ree l'ẹnya nkiya.
Obenu l'onye maru iphe
angabẹje nchị nụma idzu-ọma,
a chị-koshiru iya.
16 Onye eswe abụjeru:
a -kpatsu iya iwe;
oomeẹpho g'a maru teke
ono teke ono l'ẹhu eghu
iya eghu.
Obenu l'onye nweru
egomunggo ta adụdu iphe,
ọogubeje ọkonu.
17 Onye agba ekebe iphe,
bụ ire-lanụ bẹ opfu
iya apfụjeru ọto.
Obenu l'onye ẹjo-ekebe
adzụshi ụka.
18 Mkpọkoro opfu adzụje
paramu g'ogu-echi.
Obenu l'ire onye maru iphe
eguje ẹhu egugu.
19 Ogbogboromọnu,
epfu ire lanụ anọje jasụ
l'ojejoje.
Obenu l'ire, adzụ ụka ta
adụdu g'ọono-bejeru.
20 Ụghoshi dụ l'ọkpoma ndu
achị ẹjo idzu.
Obenu lẹ ndu achị idzu
ẹhu-guu bụ ẹhu-ụtso adụje
l'ọkpoma nkephẹ.
21 Ọ tọ dụdu ẹjo-iphe,
emeje onye pfụberekoto.
Obenu lẹ ndu ẹjo-iphe bụ
iphe,
ejije phẹ ẹka bụ iphe-ẹhuka.
22 Iphe, adụje Chipfu ẹji bụ
ogbogboromọnu,
adzụ ụka.
Obenu lẹ ndu adụje iya ree bụ
unwoke, epfu ire-lanụ.
23 Onye nweru egomunggo ta
arakashịjedu iphe,
ọ maru arakashi.
Obenu l'ọkpoma ndu eswe
anọduje avọshi
jogojogojogo opfu.
24 Onye gude ẹka iya eseshi
akanya ike l'e-mechaa
bụru ishi.
Obenu l'onye eme ẹnyiru
e-mechaa bụru ohu.
25 Ayọ ọshi emeje g'ike bvụ
nemadzụ ẹgwegwa.
Obenu l'opfu-ọma anọduje
ekutse nemadzụ ekutse.
26 Onye pfụberekoto akwajẹ
ẹnya lẹ g'o gude eshi ọ̀nyà.
Obenu l'ụzo, onye ẹjo-iphe
eshi edujeru iya
duswee eduswe.
27 Onye ẹnyiru ta amịjedu anụ,
ọ gburu amịmi.
Obenu l'onye ese akanya
enwejeru iphe,
vu oke aswa.
28 Ụzo, a pfụberekoto eshi bẹ
ndzụ dụ.
Mbụ lẹ gbororo iya bẹ
anwụhu adụkpodaa
ililekpọo.