13
1 Nwa, maru iphe;
angabẹje nchị lẹ mba,
nna iya abarụ iya.
Obenu l'onye mgbọnu ta
angajẹdu nchị l'ụja,
aagbọru iya.
2 Nemadzụ egudeje
opfu-ọnu pfuta iphe-ọma.
Obenu l'onye e gudedu ire
iya ẹka bụ iphe,
ẹkpiri iya adụje iya bụ eme
mkpawere.
3 Onye eche ọnu iya nche bụ
ndzụ iya bẹ ooche nche.
Obenu l'onye epfugbuje g'ọnu
ha iya e-mechaa bụru
ọla-l'iswi.
4 Onye ẹnyiru bẹ ẹkpiri iphe
adụje; ọle ọ tọ dụdu iphe,
erwuje iya ẹka.
Obenu l'iphe, agụ onye
akanya erwuje iya ẹka
ọkpobe erwurwu.
5 Onye pfụberekoto bẹ iphe,
aadzụ ụka adụje ashị.
Obenu l'onye ẹjo-iphe
bụ iphe-iphere yẹe
mkparwụ bụ iphe,
oomeje.
6 Onye ụta adụdu lẹ ndzụ iya bụ
iphe,
anọduje eche iya nche
bụ apfụbekoto.
Obenu l'iphe, emekpeje
onye iphe-ẹji bụ eme
ẹjo-ememe.
7 O nweru onye anọduje eme
onwiya g'onye nweru iphe;
ọle ọ tọ dụkwa iphe,
o nweru.
Onye ọphuu anọduje eme
g'onye akpa nri;
ọle o nwekwanụru iphe
nweshia ya ike.
8 Ẹku nemadzụ l'a-dụkwa ike
gbafụta ndzụ iya.
Obenu l'onye ụkpa bẹ e te
yejedu ebvu.
9 Ìphóró, dụru onye
pfụberekoto anọduje
enwu phoophoophoo.
Obenu l'ìphóró orọku k'onye
ẹjo-iphe bụ aphụnyi bẹ
aaphụnyije iya.
10 Eku-onwonye bụ iphe,
ọonoduje azụshi bụ
aba mba.
Obenu lẹ ndu angabẹje nchị
l'ìdzù,
a chị-koshiru phẹ bụ ndu
maru iphe.
11 Okpoga, a kpatarụ l'ụghoshi
anọduje ala azụ azụ.
Obenu l'onye gude ẹka iya
akpa okpoga nwanshịi
nwanshịi l'emeje iya l'ọoka
shii eje.
12 Iphe, e leru ẹnya iya nọo ọdu
anọduje agbawashị
ọkpoma agbawashị.
Obenu l'ememe,
e meru nemadzụ iphe,
oole ẹnya iya adụje
g'ọ wọtaru oshi,
eerije nọdu ndzụ.
13 Onye akpọfu alọ ẹka lẹ nchị
akpọfu l'e-je iphe-ẹhuka.
Obenu l'onye emeje iphe,
a sụru g'e meje bẹ
obunggo iya dụru.
14 Iphe, onye maru iphe ezi dụ
g'ẹka mini anụje ndzụ
futaru.
Oomeje gẹ nemadzụ ta
adaba l'ọ́nyà,
anwụhu gbabẹru.
15 Iphe edo ẹnya ọkpobe
edodo l'emeje nemadzụ
l'ọ dụ ndiphe l'obu.
Obenu l'ụzo onye e gudedu
ire iya ẹka eshihujeru
iya ike.
16 Onyemonye bụkpoo onye
nweru egomunggo emeje
iphemiphe,
oome l'ọkwenya.
Obenu l'ọmata ewojeru eme
eswe iya tụa jala.
17 Onye ẹjo-iphe, e ziru ozi;
ọ nọdu eje iya adabajẹ
l'iphe-ẹhuka.
Obenu l'ozi, e ziru onye e gude
ire iya ẹka;
ọ nọdu eje iya eguje
ẹhu egugu.
18 Onye ewojeru mba,
aabarụ iya arwụtoshi
arwụtoshi emechajẹ daba
l'ọkpa-nri mẹ l'iphe-iphere.
Obenu l'onye a hụ̀ru ahụ̀hù;
ọ nụma iya bẹ
aakwabẹje ùbvù.
19 Iphe, agụshi ẹgu ike -mee bẹ
ọotsoje obu ụtso.
Obenu l'onye gbakụtaru eme
ẹjo-iphe azụ;
l'eme ẹbyi l'ẹnya ọmata.
20 Onye yẹe ndu mmamiphe
aswị ọswi a-bụru onye
maru iphe.
Obenu l'onye etso ọmata
e-je iphe-ẹhuka.
21 Ẹjo-iphe ẹjo-iphe aanọduje
anwụru ndu iphe-ẹji.
Obenu l'ẹka atụtu bụkwanu
obunggo ndu pfụberekoto.
22 Ọkpobe nemadzụ akpajẹ ẹku
dobe l'e ria ya ria
lẹ nwanwa.
Obenu l'ẹku, onye iphe-ẹji akpa
bụ ndu pfụberekoto bẹ
ọokpaje iya edoberu.
23 Onye akpa nri -kọo opfu
bẹ oomehujekpọ;
nri adụkpoo dụchaa
k'etsutsu iya.
Obenu lẹ be ekpe ikpe,
pfụru ọto atụkoje
iya chịta.
24 Onye esela ẹchachi azụ lẹ
ya te echidu iya nwa iya
bụkwa ashị bẹ ọ kpọru
nwa iya.
Obenu l'onye yeru iya obu
edeje ẹnya lẹ mini hụ̀a
ya ahụ̀hù.
25 Onye pfụberekoto erije nri
gudekpọo obu iya kwe
l'o jiwaru iya.
Obenu l'onye ẹjo-iphe ta adụdu
teke ẹgu ta agụdu iya.