11
1 Eme iphe, eegudeje atụ̀
ẹrwa iphe l'ụzo ẹregede;
bụkwa ẹbyi l'ẹnya Chipfu.
Obenu l'iphe, adụje Chipfu
ree bụ eme ire-lanụ.
2 Eku-onwonye nọdu eje abya;
iphere etso iya etsotso.
Obenu l'iphe, anọduje etso
adụ àgù l'obu bẹ bụ
mmamiphe.
3 Ụta ta adụ lẹ ndzụ onye
pfụberekoto bụkwa
iya anọduje edu iya.
Obenu lẹ ndu e gudedu
ire phẹ ẹka bụ iphe,
emebyije phẹ nụ bụ
ntuphu-ire phẹ.
4 Ẹku ta adụkwa urwu,
adụkwadu iya nụ mbọku,
ẹhu e-ghu Chileke oke eghu.
Obenu l'apfụbekoto adzọje
nemadzụ l'ẹka ọnwu.
5 Apfụbekoto k'onye ụta adụdu
lẹ ndzụ iya atọgbojeru
iya ụzo nhamụnha.
Obenu l'iphe, akwatsuje onye
ẹjo-iphe bụ eme
ẹjo-iphe iya.
6 Apfụbekoto k'onye obu iya
gụru ìphóró l'adzọje iya.
Obenu l'onye e gudedu ire iya
ẹka bụ ẹgu ẹjo-iphe,
agụ iya nụ anmajẹ
iya g'ọ́nyà.
7 Onye ẹjo-iphe -nwụhu; iphe,
ọori l'oo-mecha mee
l'ẹhu iya; alaru iya l'iyi.
Iphemiphe kpọ, bụ iphe,
o shi dobesụ lẹ ya
e-gude ike iya mee abụru
iphe-mmanụ.
8 Onye pfụberekoto bẹ
aanafụtaje l'ẹka
iphe-ẹhuka.
Iphe-ẹhuka ọbu ejechia
atụ-koru l'ishi onye
ẹjo-iphe.
9 Onye te emedu ele Chileke
bụ opfu ọnu bẹ
oogudeje mebyishia
nemadzụ ibiya.
Obenu l'onye pfụberekoto
egudeje nkwamẹnya
nahụ.
10 Ọobujeru teke iphe ejehuru
onye pfụberekoto;
ndu bu lẹ mkpụkpu ete
ẹswa.
Teke onye ẹjo-iphe larụ
ọla-l'iswi;
ndiphe agbọo ọgboo.
11 Ọnu-ọma k'onye obu iya gụru
ìphóró akwọ-lije
mkpụkpu.
Obenu l'opfu-ọnu onye
ẹjo-iphe emebyije iya emebyi.
12 Onye enwedu egomunggo
akpọje nemadzụ ibiya
ẹbo l'afụ.
Obenu l'onye nweru egomunggo
bẹ l'esedeje ire iya.
13 Onye asụ asụlasu epfuje iphe,
e domiru edomi.
Obenu l'onye e gude ire iya
ẹka edomikọtaje iphe,
dụ ẹgube ono.
14 Ọha, a taa kpọ-ziduru ụzo
adajẹkwa.
Obenu a -dụ igwe akpọ-ziru
ọha ụzo;
l'aadzọta ọha ono.
15 Onye narụ onye ọ madụ
mkpalẹka ta adụkwa iphe,
e-me g'o tọ je iphe-ẹhuka.
Obenu l'onye sụru lẹ ya te
eyekwa ẹka l'iphe,
ana mkpalẹka ta adụkwa iphe,
e-me iya nụ.
16 Nwanyị, eme odoo abụjeru;
a -kwabẹ iya ùbvù;
l'ọ naa ya ẹka labọ.
Unwoke, ewebushi akụrepho
nọdu atụje ẹku
gburumu swịswia.
17 Onye iphe-ọma bụ onwiya bẹ
oome iya edoberu.
Onye dụ ẹhuka bụkwanuru
iphe-ẹhuka bẹ oometaru
onwiya.
18 Iphe, ndu ẹjo-iphe setarụ
l'akanya a-bụru phẹ
iphe-mmanụ.
Obenu l'onye akụ apfụbekoto
gẹ mebyi-iphe,
aakụ l'alị bẹ l'a-wọta ọkpobe iphe,
ọ kụru.
19 Onye pfụberekoto ọkpobe
apfụbe bẹ ndzụ adụje.
Obenu l'onye agba etso eme
ẹjo-iphe agbajẹ tsoru iya
jasụ l'ọ gbaba l'ọnwu.
20 Ndu ọkpoma dụ ẹji emekwa
ẹbyi l'ẹnya Chipfu.
Obenu lẹ ndu ụta adụdu lẹ
ndzụ phẹ adụje Chipfu
ree shii.
21 Ọphu ịi-makaharụ bụ lẹ ndu
ẹjo-iphe bẹ a taa hadụ g'a ta
hụ̀ phẹ ahụ̀hù.
Obenu l'oshilọkpa ndu
pfụberekoto ta adụdu iphe,
ee-me phẹ nụ.
22 Nwanyị, amashị mma ike;
mmamiphe pehukwanu iya l'ẹhu;
dụ g'iphe-nchị,
e gude mkpọla-ododo mee;
woru ye ezi l'imi.
23 Iphe, agụ onye pfụberekoto
bụ ẹka ọosubeje ishi
bụ l'iphe-ọma.
Obenu l'iphe onye ẹjo-iphe
ele ẹnya iya bụ l'ẹka
ọosubeje ishi bụ l'oke-ẹhu-eghu,
Chileke a-tukoshi iya.
24 Onye bụ omeluko bẹ iphe
iya anọduje aka shii eje.
Obenu l'onye aswị aswị
emechajẹ kpabua nvọ.
25 Onye eme iphe-ọma bẹ ẹka
a-nọdu agba ụpete.
Mbụ l'onye agbajẹ nwibe
iya mini l'obu bẹ
aa-gbakwaphọ mini l'obu.
26 Ndiphe anọduje ephu
nemadzụ iphu mẹ o -gbushia
ereshi gbachishia l'iphe.
A nọdu ajajẹ onye reru nkiya
l'orwuberu iya ajaja.
27 Onye achọ iphe,
du ree bẹ atụbaje ndiphe
l'ẹnya.
Obenu l'onye achọ ẹjo-iphe
bẹ ẹjo-iphe abyapfutajẹ.
28 Onye kpọru obu yeru ẹku iya
a-dakwa.
Obenu l'onye pfụberekoto
a-nọdu aja àjàjà
g'ẹkwo oyii.
29 Nwoke, esetaru ndibe
iya opfu bụkwa
phẹrephere bẹ a-bụru
okiphe iya.
Tẹme ọ bụru onye eme eswe
l'e-mechaa bụru onye
ejeru onye maru iphe ozi.
30 Mebyi, onye pfụberekoto amị
bụkwa oshi emeje g'a
nọdu ndzụ.
Ọzo bụ l'ọo onye adụje ike
pfubuta nemadzụ bụ onye
maru iphe.
31 Eshinu aa-pfụ onye
pfụberekoto ụgwo iphe,
oome l'eliphe-a;
bẹ aa-pfụkwa iya phọ ndu te
emedu ele Chileke yẹe
ndu iphe-ẹji;
pfụa phẹ iya pfụgharu
phẹ iya ẹka.