46
Agwa ndu Bábilọnu
1 Balụ phozeakwaru;
Nebo nọdu ekpuwa
ekpukpu.
Mbụ lẹ ntẹkpe phẹ ono
bụwaa onye vu iya nụ
bụ anụ, evuje iphe.
Mbụ l'iphe, o vu anyị iya
ntụmatu.
Tẹme ọ bụru ivu l'ẹhu nwanụ,
ike bvụru.
2 Agwa ọbu g'ẹphe ha tụkoru
ekpu ekpukpu bya
atụko phozeta.
Ọphu ẹphe adụdu ike
dzọta onwophẹ.
Ọchia l'ẹphebedua l'onwophẹ
bẹ a kpụru lẹ ndzụ.
3 Unu ngabẹnuru mu nchị;
unubẹ ọnu-ụlo Jiékọpu;
mbụ g'ụnu ha bụru ndu
phọduru nụ l'ọnu-ụlo
Ízurẹlu;
mbụ unubẹ ndu ono,
mu gudeshi eshinu a tsụru
ime unu ono;
mu nọdu ehe unu eshinu a
nwụru unu.
4 Mbụkpoo jasụ unu kahụ;
ẹwó tụko unu ishi sweta;
bẹ mu bụekwapho onye
mu bụ;
mu bụekwapho onye
gude ndzụ unu.
Ọo mu meru unu;
ọ bụru mu a-nọdu apa
unu geleegelee.
Ọo mu a-nọdu edobe unu
ndzụ;
tẹme ọ bụru mu a-nọdu
agbafụtaje unu.
5 ?Bụ onye bẹ unu a-tụru
mu yeru?
?Bụ onye bẹ unu a-sụ lẹ mu
l'iya ha?
?Bụ onye bẹ unu a-sụ l'ọ kwa
onye dụ ẹgube-a bẹ ọ
dụ g'a tụru yeru mu?
6 O nweru ndu evushije
mkpọla-ododo l'ẹkpa phẹ.
Ẹphe achịkoo mkpọla-ọchaa
tụ̀a àtụ̀tùù l'iphe,
aatụ̀je iphe.
Ẹphe eje ebuta onye-ụ́zú
mkpọla-ododo g'ọ bya
egude iya kpụtaru phẹ
ntẹkpe.
A -kpụchaa ya;
ẹphe awata iya abarụ ẹja.
7 Ẹphe apata iya tụa l'ukuvu
phẹ parụ iya tụgbua.
Ẹphe eje eworu iya kpọbe
l'ẹka ọo-nọdu.
Ọ bụru ẹka ono, a kpọberu
iya ono bẹ oo-kpọru.
Ọ tọ byadu eshi l'ẹka ono,
a kpọberu iya ono
kpịriberu.
Teke nemadzụ byaru bya
echiku iya lẹ mkpu;
ọ tọo zadụ iya ẹnu.
Ọphu ọ dụdu ike adzọta iya
l'iphe-ẹhuka, byaru iya nụ.
8 Sụ-a; unubẹ ndu ono,
emeje iphe,
Chileke sụru g'e be meshi
ono;
unu nyatakwa iphe-a!
Unu mekwaa ya g'ọ kwaa
unu l'egomunggo!
Unu yekwa iya eyeye l'ọkpoma!
9 Mbụ-a; unu nyatakwa
akahụ iphe; mbụ iphe,
shihawaa ụzenya.
Ọ kwa mu bụ Chileke.
Ọ tọ dụekwa onye ọzo.
Ọ kwa mu bụ Chileke;
ọ tọ dụekwa onye ọzo,
dụ gẹ mu dụ.
10 Mu eshijeẹpho lẹ mbụ mee
g'a maru iphe,
a-bụru ikpazụ iphe.
Mbụ lẹ mu anọdujero teke
ndiche mee g'a maru iphe,
eteke medu nụ.
Mu sụru-a: Iphe,
mu tụberu k'ememe bẹ
mu mefụtajekwa.
Tẹme ọ bụru iphe,
dụ mu ree bẹ mu e-me.
11 Mu jekpọruro l'ụzo
ẹnyanwu-awawa je ekua
ẹnu, erije odzu;
bya ejemihu l'alị ẹka dụ
ẹnya je ekua onye e-me iphe,
mu tụberu.
Iphe, mu pfuru bẹ mu e-me!
Iphe, mu chịru idzu iya bẹ
mu e-mekwaphọ.
12 “Unu ngabẹru mu nchị;
unubẹ ndu ono,
ọkpoma kpọru gbengu ono!
Mbụ unubẹ ndu ono,
apfụbekoto kwata dụ
ẹnya ono.
13 Apfụbekoto nkemu bẹ mu
gudeakwa akpịritaru ntse.
Ọ tọ dụhekwa ẹnya.
Ọphu ọ dụekwa g'ọo-nọ-beru;
ndzọta mu erwua.
Mbụ lẹ mu a-dzọta ndu bu
l'eli úbvú Zayọnu.
Mu eworu akpabiri mu nụ
ndu Ízurẹlu.”