47
Adada Bábilọnu
1 “Gụbe nwada Bábilọnu;
lwakwa alị alị;
gwọdoshihukwa l'urwuku!
Hakwaa anọdu l'aba-eze
je anọdu l'alị;
gụbe
nwada ndu Bábilọnu!
Kẹle e tee kuẹdu ngu nwanyị,
dụ bẹlebele bya adụ
nyẹgenyege.
2 Pata mkpuma, eegweje
iphe wata egwe nri!
Phụfunu ẹkwa,
ị phụ-chiru iphu!
Phụ-linaa uwe ngu aphụ-li;
l'ị gbaru ọkpa ọto je
erwughashịa nggele!
3 L'aa-gbabẹkwa ngu ọto;
mee g'a hụma iphe-iphere
ngu.
Mu e-melatakwa; ọphu ọ
dụkwa onye mu a-ha.”
4 Mbụ l'onye agbafụtaje anyi
ono
bẹ ẹpha iya bụ Chipfu.
Ọ bụ Ọkalibe-Kakọta-Ike;
bya abụru Onye nsọ kẹ
ndu Ízurẹlu.
5 Nọdukpoepho nwa
nggujingguji!
Je anọdukpoepho l'ẹka
gbakọtaru ọchii;
gụbe
nwada ndu Bábilọnu.
Kẹle nta-a bẹ e tee kubaẹdu
ngu eze nwanyị,
nwe alị-eze, iche iche.
6 Ndibe mu meru;
ẹhu ghuahaa mu eghu.
Mu tụrwua ndu ono,
bụ okiphe mu onoya.
Mu woru phẹ ye ngu l'ẹka;
ọphu ị phụduru phẹ
obu-imemini.
I bochaa phẹ ivu-ẹrwa
bochaa mẹ ndibe phẹ,
kahụru akahụ.
7 I pfuru sụ l'ịi-bụwaruro
eze-nwanyị jasụ l'ojejoje.
Ọphu ị rị-vukpọdaru
iphemiphe-a;
ọzokwanu chịa ìdzù iphe,
e-mechaa mee l'ikpazụ
iya.
8 Ọo ya bụ lẹ-a;
ngabẹkpodapho nchị;
gụbe nwọphu kpọru obu
ye l'akpa ntụsaru-ẹhu;
mbụ gụbe nwọphu arịje
l'ọ tọ dụdu iphe,
byaru eme ngu nụ;
tẹme ị nọdu asụje onwongu
l'ọwa-a ngu kpoloko dụ;
l'ọ tọ dụedu onye ọzo
gbahaa ngu;
l'ị tị byadu abụ nwanyị,
ji iya nwụhuru;
ọphu ume nwa abyadụ
eme ngu.
9 Iphe labọ-a a-nwụkwaru
ngu lẹ ntabu ẹnya lanụ.
L'ujiku lanụ bẹ ụnwu
ngu a-nwụshihu;
ji ngu anwụhu.
Iphe labọ ono a-zụe ngu phọ
gburumu pfụurii.
I tii metadu iya l'agwụgwo;
ọphu iigwetadu iya
l'ikpoto ngwẹja.
10 Kẹle ị kpọru obu ye l'ẹjo-iphe,
ịinoduje eme.
I pfua sụ l'ọ tọ dụdu onye
hụmaru ngu nụ.
Ọ bụru mmamiphe ngu;
yẹle iphe,
ị nwụtaru bẹ dephuru ngu nụ;
mee ngu;
ị sụ onwongu l'ọwa-a ngu
kpoloko dụ;
l'ọ tọ dụedu onye ọzo
gbahaa ngu.
11 Obenu l'ẹjo-iphe a-nwụru
ngu;
ọphu ịimadu ẹka o shi.
Eze iphe-ẹhuka a-dapfuta ngu;
ị tịi dụdu ike egbobuta
iya.
Ọla-l'iswi a-tụ ngu l'ụpfu;
ọphu ịimadu l'onoo
g'ọo-dụ.
12 Sụ-a; mekpọekwapho
ọmamanshi ngu g'iime
iya!
Gwekpọekwapho ikpoto
ngwẹja, iigwe; bụ iphe,
i shi teke ị bụ nwata
gweta.
?A maru bụ; i -menyaa ya
l'ọogbohuru ngu?
Tọo ?bụ: i -menyaa ya
l'ịikpatsu ndzụ-agụgu?
13 Iphe, bụkpoo idzu,
a chị-koshiru ngu bụ iphe,
o meru
bụ l'ọ tụkoru mee;
ike kabaa ngu abvụbvu.
Ngwanụ gẹ ndu aphụjeru
ngu ọphulenya
kpịritanuru!
Mbụ ndu ono, anọduje ele
ẹnya l'ẹnyanwu yẹle
kpokpode
gude akọru ngu g'ọo-dụru
ngu l'ọnwa l'ọnwa ono.
G'ẹphe dzọnaa ngu l'iphe-a,
abyaru ngu anwụru-a!
14 “Ẹphe dụ g'ẹswa akpe,
kpọhuru nkụ.
Ọ bụru ọku e-mechaa kee
phẹ kefu.
Ọphu ọ bụdu l'ẹphe adụkponu
ike adzọ onwophẹ;
g'ọku ono te nwu
phuruphuru kefu phẹ.
L'ẹka-a bẹ icheku
ọku k'anyaru ta adụkwa;
ọphu ọ dụkwa ọku,
a-dụ iya nụ k'anọdu lẹ
mgboru iya.
15 Nokwa mkpakọ iphe,
ẹphe e-meru ngu bụ ono;
mbụ ndu-a,
unu l'ẹphe shi teke ị bụ
nwata seta akanya-a;
zụta aswa-a.
G'ẹphe ha l'ẹhu l'ẹhu
e-shiswekọtaepho ụzo;
ọphu ọ dụdu g'ọ ka mma
l'ọo onye lanụ,
byaru adụ ike dzọo
ngu nụ.”