45
1 Wakwa iphe, Chipfu
epfu anụ onye ono,
ọ họtaru g'ọ bụru eze;
mbụ Sayịrosu,
onye ọ lọtaru l'ẹkutara
gude kwatsushia ọha,
dụ ichiche, byaru iya
l'iphu; gude nashịa
ndu eze ngwọgu phẹ
gbabẹ phẹ ẹka ọto;
gụhashia ụzo gheberu
iya ọnu;
k'ọphu a taa gụ-chihẹdu
iya agụ-chi.
2 Ọ sụru-a: Mu e-vuru ngu ụzo
je egbuzeru ngu úbvú
úbvú egbuze;
je agbakwoshia ọguzo,
e meru l'onyirubvu;
bya egbukashịa mgbọrígwè,
e gude tụ-chia ụzo.
3 Mu a-nụ ngu ẹku,
e doberu l'ọchii;
mbụ iphe-enweru,
e doberu l'ẹka e domiru
edomi.
Ono e-me g'ị maru lẹ mu
bụ Chipfu bya abụru
Chileke ndu Ízurẹlu;
onye ekuje ngu ẹpha
ngu gẹdegede.
4 Ọ kwa onye mu eme ele bụ
Jiékọpu ono,
bụ onye-ozi mu ono;
mbụ Ízurẹlu ono,
bụ onye mu họtaru
l'onwomu ono.
Ọ bụru iya meru g'o gude mu
kua ngu l'ẹpha;
bya eworu ọkwa,
aakwabẹ ùbvù woru nụ
ngu l'ẹbe abụ l'ị maru
onye mu bụ.
5 Ọ kwa mbẹdua bụ Chipfu;
ọphu ọ dụekwa onye ọzo,
dụ nụ.
Mbụ l'a -gụfu mbẹdua ta
adụekwa Chileke ọzo,
dụ nụ.
Ọo mbẹdua e-me g'ike dụ
ngu l'ẹbe abụ l'ị maru
onye mu bụ.
6 Ọ bụru mu -mee ya nno;
ndu nemadzụ eshita l'ẹka
ẹnyanwu awatajẹ jasụ
l'ẹka ọodaje
maru l'ọ tọ dụedu onye ọzo,
dụ nụ, abụdu mbẹdua.
Ọ kwa mbẹdua bụ Chipfu;
ọphu ọ dụekwa onye ọzo,
dụ nụ.
7 Ọ kwa mbẹdua emeje
g'ìphóró dụ; bya emee;
ọchii adụ.
Ọ kwa mbẹdua emeje g'e
nweru ẹku;
mu nọdu emejekwaphọ
g'ọla-l'iswi bya.
Ọ kwa mbẹdua, bụ Chipfu
tụkoru iphemiphe ono
eme.
8 Gụbe imigwe,
nọgbaa l'ephekerephe;
dzenaa apfụbekoto
gẹ mini!
G'urwukpu dzenaa ya
yọyoyo!
G'eliphe l'ophu saa ọnu
gabala!
K'ọphu ndzọta a-tụko
ẹkameka sweta;
apfụbekoto atụko ẹkameka
dzuru.
Ọ kwa mbẹdua, bụ Chipfu
meru iya dobe.
9 Nshịo onye etso onye meru
iya nụ ụswo.
Mbụ onye adụdu iphe ọzo,
ọ bụ gbahaa ite,
a kpụru l'ụrwa.
Ụrwa; ?ọojije onye akpụ ite
sụ iya: “?Bụ gụnu bẹ
ịikpu?”
Iphe, i gude ẹka ngu mee;
?l'ọo-nọnya sụ ngu
l'i mekwarụ iya;
ọphu ya enwedu ẹka?
10 Aphụ tsọru onye asụ nna iya:
“?Bụ gụnu bẹ o gude ị nwụa
mu ẹgube-a?”
Ọzoo onye asụ ne iya:
“?Bụ gụnu bẹ ị nwụru mu
ẹgube ọwa-a?”
11 Wakwa iphe, Chipfu epfu
baa;
mbụ Onye Nsọ kẹ
ndu Ízurẹlu;
tẹme ọ bụru iya bụ onye
meru Ízurẹlu ọbu
dobe.
Ọ sụru-a: “?Unu a-wata
mu ajị njịkpa-ọnu lẹ
k'ụnwegirima mu?
Tọo ?unu a-nọdu atụru mu
ekemu gẹ mu e-me iphe,
mu gude ẹka mu mee?
12 Ọ kwa mbẹdua meru eliphe
dobe.
Mu byakwaphọ bya emee
nemadzụ dobe iya.
Ọ kwa ẹka mu bẹ mu gude
tọsaa imigwe;
bya edokaa ya kpokpode
kpokpode l'ophu.
13 Ọ kwa mbẹdua meru gẹ
Sayịrosu fụta
gude goshi lẹ mu bụ onye
pfụberekoto.
Ọ bụru mbẹdua e-me g'ụzo,
ooshi pfụkotaru
nhamụnha.
Ọo ya a-kpụkwa mkpụkpu
mu ono mee gẹ ndibe mu,
a kpụru lẹ ndzụ
nweru onwophẹ.
Ọphu oomekwa iya g'apfụa ya
ụgwo;
ọzoo g'e bua ya nggo.”
Nokwa iphe, oopfu;
mbụ Chipfu,
bụ Ọkalibe-Kakọta-Ike.
14 Wakwa iphe, Chipfu epfu:
“Iphe, e metaru l'alị Ijiputu;
mẹkpoo ngwaswa,
shi l'alị Kushi;
mẹkpoo gwagoro-gwagoro
ndu ono,
shigba alị Seba ono;
g'ọ ha a-lwakọtaru ngu;
tụkoru bụkotaru nkengu.
Ẹphe a-tụko etso ngu;
awụ l'odze awụ-pfuta ngu.
Ẹphe abya ephozeta l'iphu
ngu rwọahaa ngu
arwọrwo epfu sụ:
‘Tororo opfu bụ lẹ Chileke
nọkwa swiru ngu
eswiru.
Ọ tọ dụekwa onye ọzo,
dụ nụ;
mbụ l'ọ tọ dụekwa onye ọzo,
dụ nụ gbahaa yẹbedua.’
15 Tororo! Ị bụkwa Chileke,
anọduje edomi onwiya
edomi; gụbe Chileke,
bụ onye dzọtaru ndu Ízurẹlu.
16 Iphe, bụ ndu agwọ ọbvu
bẹ ee-me iphe-iphere
meru bọtorii nụ phẹ.
Mbụ l'ẹphe a-tụko mehu
bọtorii g'ẹphe ha
tụgbua.
17 Obenu lẹ ndu Ízurẹlu bụ
Chipfu a-dzọta phẹ.
Mbụ l'adzọdzo, ọo-dzọ phẹ
a-bụru ojejoje.
Ọphu a byadu eme unu
iphe-iphere;
ọphu unu abyadụ
emephe bọtorii gburu
jeye lẹ gbururu.”
18 Kẹle-a; wakwa iphe,
Chipfu epfu; mbụ onye ono,
bụ iya meru imigwe dobe.
Ọ kwa iya bụ Chileke;
onye bụ iya kpụru
mgboko;
bya abụru iya meru iya.
Ọo ya tọru ọkpa iya;
ọphu o medụru iya g'ọ
nọdu iphoro.
O meru iya dobe g'e buru
iya eburu.
Ọ bụru iya epfu sụ: “Ọ kwa
mbẹdua bụ Chipfu;
ọphu ọ dụekwa onye ọzo,
dụ nụ.
19 Iphe, mu pfuru bẹ mu
te epfukwaru lẹ mpya.
Mu te ejekwaru anọdu l'ẹka
lanụ l'alị,
ọchii agba pfua ya.
Ọphu mu asụkwaru oshilọkpa
Jiékọpu phẹ g'ẹphe chọo
mu kẹ mmanụ.
Mụbe Chipfu epfuje ọkpobe
opfu; mu epfuje iphe,
dụ k'epfupfu.”
20 Unu dzukọbenu onwunu
byakpọdapho!
Unu nọkobe l'ẹka lanụ;
unubẹ ndu ono,
shi ọhamoha tsoru agha
phurii ono!
Ndu amadụ iphe bẹ ẹphe bụ;
mbụ ndu gwọru nshi,
a pyịru l'oshi parụ aghaphe;
ndu epfuje anụ iphe,
ta adzọjedu nemadzụ.
21 Unu pfunaa iphe g'ọ dụ;
unu byanụ edoo g'ọonwuru
unu.
G'ẹphe nọkobe chịaru iya idzu.
?Bụ onye bụ onye pfuhawaru
iphe-a teke dụ ẹnya?
?Bụ onye meru g'a maru
iya teke dụhawaa
ụzenya-ụzenya?
?Tọbudu mbẹdua, bụ Chipfu?
Ọzo bụ l'ọ tọ dụedu Chileke
ọzo, dụ nụ,
abụdu mbẹdua.
Ọo mbẹdua bụ Chileke,
pfụberekoto;
bya abụru onye ndzọta.
Ọ tọ dụedu onye ọzo,
dụ nụ abụdu mbẹdua.
22 Unu ghanaaru mu iphu;
hụma l'aa-dzọta unu;
unubẹ ndu mgboko l'ophu;
kẹle ọo mbẹdua bụ Chileke;
ọphu ọ dụekwa onye ọzo.
23 Mu gudewaa onwomu ria angụ.
Mu gudewaa ọnu mu pfua
opfu onye pfụberekoto.
Ọphu mu abyadụ asụ g'ọ
laa azụ.
Mu pfuru sụ l'iphe,
bụ ikpere ndiphe l'ophu
e-mechaa rwuchaaru
mu alị.
Ọ bụru mbẹdua bẹ ndiphe
l'ophu e-mechaa gude
erije angụ.
24 “Ẹphe e-pfu opfu ẹhu mu sụ:
‘Ọo Chipfu nwẹka iya
pfụberekoto;
bya abụru
iya bẹ ike dụ kpẹekpu.’
Ndu ono g'ẹphe ha, shi
abarụ mu hanyịhanyi
ono l'a-byapfuta mu
gude iphere bya.
25 Obenu lẹ-a; iphe,
bụkpoo oshilọkpa Ízurẹlu
l'a-nọdu l'ẹka Chipfu
bụru ndu pfụberekoto;
bya egude Chipfu
eku onwophẹ.”