63
Egvu-ọma, Dévidi deru teke ọ nọ l'echi-ẹgu Júda
1 Nggụbe Nchileke;
ọ bụ nggu bụ Nchileke mu!
Obu ngu egbu mu
egbugbu: eswe l'ẹnyashi.
Ẹkpiri ngu akpo mu nkụ.
Obu ngu meekwaru;
ike agvụ mu l'ọ bụ onye nọ l'echi-ẹgu;
mbụ l'ọ bụ onye nọ l'alị
ọkponku, mini ta nọdu.
2 Mu ta madu ẹge mu e-me
phụa ike ngu;
mẹ ọdu-biribiri ngu;
ẹge mu shi aphụje iya l'ụlo ngu, dụ nsọ.
3 Mu e-gude ọnu mu jaa ngu ajaja;
kẹle n-yemobu ngu ka ndzụ mma.
4 Mu a-nọdu ekele ngu ekele
jeye teke mu a-nọ-bebe.
Yọ bụru ẹpha ngu;
bẹ mu e-gudeje chilia
ẹka imeli ekfu anụ ngu.
5 Obu mu; bẹ ẹpho e-ji l'ọ bụ
onye riru nri, e gude ẹba anụ;
mẹ ụmi-ọkpu shia.
Mu e-gude ọnu gụa egvu
ẹhu-ọtso-ẹna, gude tua ngu ẹpha.
6 Ọobujeru; mu -zẹru azẹe;
mu anyata ngu;
ọriri ngu anọdu mu l'obu ẹnyashi ophu.
7 Mu nọ lẹ mkpuli ẹ́bà ngu
agụ egvu ẹhu-ọtso-ẹna;
kẹ l'ọ bụ nggu bụ onye eyejeru mu ẹka.
8 Mu anọje ngu ntse tekenteke.
Yọ bụru ike ngu;
b'i gudeje kwakọbe mu.
9 Ẹge ẹphe ha; mbụ ndu achọ
ishi mu a-lakọta l'iyi;
a chịru ẹphe ye l'ime alị.
10 Ee-gbushi ẹphe l'ọgu;
ẹphe abụru nri, a kparu
wụshiru nkụta-ọswa.
11 Obenu lẹ Nchileke e-me
t'ẹhu tsọo eze ẹna.
Iphe bụ ndu egudeje ẹpha
Nchileke ekwe ụkwa a-ja iya ajaja.
Ọle ndu ntuphu-ire phẹ;
bẹ ọnu a-bụru kpụrukudungu.