62
Egvu-ọma, Dévidi deru nụ onye ishi egvu, bụ Jedutunu
1 Ọ bụ Nchileke nwẹnkinyi;
bẹ mu nọdu; ngabẹru;
kẹ l'ọo ya bụ onye
a-dzọfuta mu nụ.
2 Ọ bụ Nchileke nwẹnkinyi iya
bụ agbara-mkpuma mu;
bụru iya adzọje mu;
bụkwaru iya phụ bụ
a-gbabe-a-dzụru nke mu.
?Bụ onye ha k'onwubata mu enwubata?
3 Unu l'unu ha;
?bụ teke ole bẹ unu
e-tsuberu madzụ kputukputu;
?mbụ onye ike ta nọhedu;
yọ bụwarua egugoru b'o gugoru.
4 Iphe unu eshibeje ite iya
bụ ẹge unu e-shi nwufu
eze madzụ l'ọkwa iya.
Ẹjo-ire bụ iphe adụje unu mma.
Unu egudeje ọnu unu
l'agọru ibe unu ọnu.
Obenu l'ime obu unu;
bẹ unu egudeje atụ ẹphe ọnu.
5 Ọ bụ Nchileke nwẹnkinyi iya bẹ mu nọ l'ẹka;
kẹ l'ọo ya bụ onye mu ele ẹnya l'ẹka.
6 Ọ bụ Nchileke nwẹnkinyi iya
bụ agbara-mkpuma nke mu;
bụru iya adzọfutaje mu;
bụkwaru iya phụ bụ
a-gbabe-a-dzụru nke mu.
?Bụ onye ha kẹ onwubata mu enwubata.
7 L'aa-dzọfuta mu;
mẹ l'aa-kwabẹ mu ugvu
bụ Nchileke b'ọ nọ l'ẹka.
Ọ bụ Nchileke bụ
agbara-mkpuma nke mu;
bụkwaru iya phụ;
bẹ mu nọ l'ẹka ezeru ndzụ.
8 Unu dakobe iya tekenteke;
unubẹ ụnwu eliphe!
Unu gheberu iya obu unu ọnu.
L'ọ kwa Nchileke bụ onye
ayi nọ l'ime iya ezeru ndzụ.
9 Ndu ọphu bụ ohu dụ l'ọ bụ udzu, shi l'ọnu.
Ndu ọphu bụ amadụ abụru iphe-eswe.
Teke a tọru ẹphe ẹbo l'iphe aatọje madzụ;
iphe ẹphe tụko bụru bụ
iphe-iphoro; uphere-ọnu.
10 Unu ba akpọkwaru obu ye
l'ogude ụgho l'ana ndu ọdo iphe;
ọphu unu 'ewokwaru ẹnya tupyoo l'iphura!
O nwekwaruru ẹge ọo-dụ;
ẹku unu abya aka nshinu;
ọle; unu ba kpọkwaru obu yeru iya!
11 Nchileke kfuakwaru iphe-a ugbo lanụ;
mbẹdua anụwa iya ugbo labụ;
l'ọo nggụbe Nchileke bụ onye nwe ike.
12 Ọdo abụru l'ọo nggụbe
Nnajiufu bẹ n-yemobu nọ l'ẹka.
Ọ bụ nggụbe Nchileke
e-bu onyemonye nggo l'ẹge ozi iya dụ.